សម្រាប់ប្រជាជនកម្ពុជា ស្រទាប់យុវជនក្មេងៗកាន់តែមានការយល់ដឹងគោលដៅ បន្ថែមទៀតពី អង្គហេតុនានា ដែលនាំមកឲ្យមានគ្រោះថ្នាក់ចរាចរដែលកើតមានឡើង គួឲ្យ រន្ធត់ជារៀងរាល់ថ្ងៃ នៅទូទាំងប្រទេស ។ នេះជាប្រសាសន៍លោកអភិបាលរងខេត្តបាត់ដំបង ប៊ុត គិមស៊ាន ក្នុងយុទ្ធនាការ ផ្សព្វផ្សាយស្តីពីការប្រគុំតន្ត្រីសប្បុរសធម៌ តារាបៃតងកម្ពុជា ក្រោមប្រធានបទ រួមគ្នាគោរព និងអនុវត្តច្បាប់ចរាចរផ្លូវគោកនៅកម្ពុជា សហការរវាងសាលាខេត្តបាត់ដំបង ជាមួយ ហូមមេឌា កាលពីពលេកន្លងទៅថ្មីៗនេះ ក្រោមការចូលរួមពីឯកឧត្តម ជា ច័ន្ទបរិបូរ រដ្ឋសេនាធិការ ក្រសួងពត៌មាន។
លោកបានបន្តទៀតថា ក៏ដូចជាខេត្តបាត់ដំបងផងដែរ ទោះបីជាកំលាំងសមត្ថកិច្ច ខិតខំ អនុវត្តច្បាប់តឹងរឹងយ៉ាងណាក្តី បើគ្មានឆន្ទះចូលរួមពីប្រជាពលរដ្ឋ សិស្ស និស្សិតក្នុងការគោរព ច្បាប់ទេនោះ គ្រោះថ្នាក់ចរាចរ ពិតជាពុំអាចកាត់ផ្តាច់ទាំងស្រុងបានឡើយ។ ដូចនេះកម្មវិធី យុទ្ធនាការផ្សព្វផ្សាយ រួមគ្នាគោរពច្បាប់ចរាចរ នៅកម្ពុជាគឺជាផ្នែក សម្របសម្រួលយ៉ាងសំខាន់ សំដៅរួមចំណែកអនុវត្តយុទ្ធសាស្ត្រ ចតុកោណដំណាក់កាលទី៣ និងផែនការយុទ្ធ សាស្ត្រ របស់រាជរដ្ឋាភិបាល ពិសេសសំដៅពង្រឹងកិច្ចសហការ អនុវត្តច្បាប់ចរាចរ និងកាត់ បន្ថយគ្រោះថ្នាក់ចរាចរក្នុងសង្គមឲ្យមានការថយចុះ និងមានការយល់ដឹង ពីច្បាប់កាន់តែ ប្រសើរឡើងថែមទៀត។
ឯកឧត្តម ជា ច័ន្ទបរិបូរ បានបញ្ជាក់ថា ប្រជាពលរដ្ឋកម្ពុជាយើងធ្លាប់បានទទួលរងគ្រោះ ជាបន្តបន្ទាប់ ដូចជាសង្គ្រាមបច្ចុប្ននេះ ស្របតាមការវិវឌ្ឍន៍រីកចំរើនលើគ្រប់វិស័យក្នុងនោះ សេដ្ឋកិច្ចជីវភាពរស់នៅរបស់ប្រជាពលរដ្ឋ ក៏មានកំណើនកើនទាំងរថយន្ត ទោចក្រយានយន្ត ហើយបញ្ហាប្រឈមនោះគឺ គ្រោះថ្នាក់ចរាចរគួរឲ្យព្រួយបារម្ភ។គ្រោះថ្នាក់ទាំងនោះភាគច្រើន បង្កឡើងដោយកត្តាមនុស្សជាអ្នកបង្កើត ហើយមនុស្សក៏អាចលុបបំបាត់វិញបានដែរ ដោយរួម គ្នា រៀងសូត្រនិងគោរពច្បាប់ចរាចរឲ្យបានគ្រប់ៗគ្នា ៕
