មណ្ឌលគិរី៖ មន្ត្រីកាំកុងត្រូល បានសហការជាមួយមន្ទីរពាណិជ្ជកម្មខេត្ត និងនគរបាលប្រឆាំងបទល្មើសសេដ្ឋកិច្ចខេត្តមណ្ឌលគីរីនៅព្រឹកថ្ងៃទី១៦ ខែសីហា ឆ្នាំ២០១៧បាន ចុះត្រួតពិនិត្យទំនិញ និងចំនីអាហារ ដែលអាជីវករដាក់តាំងលក់ នៅក្នុងផ្សារសែនមនោរម្យ ក្រុងសែនមនោរម្យ ។លោក ចាន់ វាសនា ប្រធានសាខាកាំកុងត្រូលខេត្ត បានឲ្យដឹងថា ការចុះត្រយតពិនិត្យ គោលបំណងសំខាន់គឺ ដើម្បីការពារផលប្រយោជន៍ និង សុខភាពអ្នកប្រើប្រាស់ ព្រោះកន្លងមកក្រោយពីមន្ត្រីកាំកុងត្រូលធ្វើការណែនាំឃើញថា អាជីវករ និងប្រជាពលរដ្ឋមានការយល់ដឹងច្រើន ពាក់ព័ន្ធនឹងការប្រើប្រាស់ និងការដាក់តាំងលក់ទំនិញ តែក៏នៅមានអាជីវករមួយចំនួនតូចនៅមិនទាន់យល់ដឹងផងដែរ។ ការត្រួតពិនិត្យនេះផ្តោតសំខាន់ទៅលើទំនិញ វេចខ្ចប់ស្រាប់ ទំនិញហួសកាលបរិច្ឆេទប្រើប្រាស់ ទំនិញគ្មានអនាម័យ គ្មានសុវត្ថិភាព និងទំនិញដែលមានលាយសារធាតុគីមីហាមឃាត់ ។
ក្នុងការត្រួតពិនិត្យនោះ មន្ត្រីជំនាញកាំកុងត្រូល បានធ្វើតេស្តរកសាធាតុគីមីបូរ៉ាក់ទៅលើ ប្រហិតសាច់គោ សាច់ក្រក ត្រីងៀត យីហ៊ឺ សរសៃមីលឿង សរសៃគុយទាវ លតឆា នំបញ្ចុក ជាលទ្ធផលពុំមានសារធាតុគីមីហាមឃាត់នោះទេ ។ធ្វើតេស រកសាធាតុគីមី Sodium Hydrosulfite លើមុខទំនិញ ស្ករត្នោត សណ្តែកបណ្តុះ ខ្ចីហាន់ តៅហ៊ួ ជាលទ្ធផលគ្មានសារធាតុគិមីទាំងនោះទេ និង បានធ្វើតេសរកសារធាតុអ៊ីយ៉ូតទៅលើ អំបិលម៉ាក់ លីលីដា ម៉ាក់អង្គរវត្ត កៅសម្បត្តិ ជាលទ្ធផលមានជាតិអ៊ីយ៉ូតត្រឹមត្រូវ រីឯអំបិល ម៉ាក ហ្គូវ ឆាយតិច គ្មានសារធាតុអ៊ីយ៉ូតនោះទេ មន្ត្រីកាំងកុងត្រូល បានធ្វើកំណត់ហេតុហាមមិនអោយដាក់តាំងលក់ រួចអោយម្ចាស់អំបិល ម៉ាក ហ្គូវ ឆាយតិច ដែលមានចំនួន០១តោន ដើម្បីបញ្ចូលជាតិអ៊ីយ៉ូតឡើងវិញ។
ទន្ទឹមនឹងការចុះត្រួតពិនិត្យទំនិញនេះដែរ មន្ត្រីកាំកុងត្រូល បានធ្វើការណែនាំបន្ថែម ដល់អាជីវករពាណិជ្ជករឲ្យមានយល់ដឹង និង មានការប្រុងប្រយ័ត្ន ចំពោះទំនិញទាំងឡាយណាដែលមិនមានគុណភាព និងហួសកាលបរិច្ឆេទប្រើប្រាស់ ដូចជា កំប៉ុងកំពិត ប៉ោង ច្រេះស៊ី ទំនិញដែលមានសារធាតុគីមីហាមឃាត់ និង ត្រូវរៀបចំទំនិញលក់ដូរទុកដាក់ឲ្យមានសណ្តាប់ធ្នាប់ល្អ និងបាន បិទរូបភាព ដែលរៀប ចំដោយ អគ្គនាយកដ្ឋានកាំងកុងត្រូល ជូនដល់អ្នកលក់ និង អ្នកប្រើប្រាស់ អោយបានយល់ដឹងពីរូបភាព ជាបឋមនូវទំនិញណាដែលគួរប្រើ និងទំនិញណាមិនគួរប្រើប្រាស់។
បន្ទាប់ពីធ្វើតេស្តរួចមក មន្ត្រីកាំកុងត្រូលបានបន្តស្វែងរក ទំនិញដែលមិនមានគុណភាព ក៏ដូចជាទំនិញហួសកាលបរិច្ឆេទប្រើប្រាស់ ដែលអាជីវករដាក់តាំងលក់រួមមាន៖ ប៊រចំនួន០៣កំប៉ុង និងទឹកក្រូចម៉ាក KingCaca NaNa sting និង ម៉ាក sweet សរុបចំនួន១០០គីឡូក្រាម ហួសកាលបរិច្ឆេទ ត្រូវបានមន្ត្រីជំនាញសាខាកាំកុងត្រូលធ្វើការដកហូត និង ធ្វើការដុតកំទេចចោលនៅមន្ទីរពាណិជ្ជកម្មខេត្តតែម្តង ៕