ខេត្តក្រចេះ ៖ កម្លាំងសមត្ថកិច្ចចម្រុះបានចុះបង្ក្រាប និងចាប់រថយន្តកាមរីហាយប្រីដមួយគ្រឿង ពណ៌ស្ករ គ្មានស្លាកលេខ កាលពីម្សិលមិញ ខណៈកំពុងដឹកឈើចេញពីស្រុកសំបូរ ចូលមកក្រុងក្រចេះនៅតាមបណ្ដោយផ្លូវមាត់ទន្លេមេគង្គ ស្ថិតនៅចំណុចខាង ក្រោយកំពង់ដ-ចម្លងឫស្សីចារ ក្នុងភូមិឫស្សីចារ ឃុំថ្មគ្រែ ស្រុកចិត្របុរី ខេត្តក្រចេះ ។
មន្ត្រីជំនាញបានឲ្យដឹងថា ការចុះបង្ក្រាបរថយន្តដឹកឈើប្រណីតមួយគ្រឿងខាងលើនេះ បន្ទាប់ពី ទទួលបានសេចក្ដីរាយការណ៍ពីប្រជាពលរដ្ឋមកថា មានរថយន្ដកាមរីហាយប្រីដ ១គ្រឿង ដឹកឈើប្រណីតប្រភេទធ្នុងពេញចេញពីស្រុកសំបូរ ឆ្ពោះចូលមកកាន់ក្រុងក្រចេះ នឹងបន្តទៅប្រទេសវៀតណាម ។ ដូច្នេះហើយកម្លាំងចម្រុះបានចេញទៅឃ្លាំមើល រហូតដល់វេលាម៉ោង១ និង៣០នាទី ក៏ប្រទះឃើញរថយន្ដនោះមកដល់ ហើយក៏ធ្វើការតាមចាប់តែម្ដង។ ខណៈនេះនៅពេលសមត្ថកិច្ចព័ទ្ធចាប់នោះតៃកុងរថយន្ដបានបើកទ្វារចុះរត់គេចខ្លួនបាត់ស្រមោលតែម្តង៕
