ខេត្តបន្ទាយមានជ័យ ៖ ពលករខ្មែរចំនួន៣២នាក់ត្រូវបានក្រុមតម្រួតថៃ សហការជាមួយកម្លាំងអន្តោប្រវេសន៍ថៃធ្វើការឃាត់ខ្លួននៅក្នុងទឹកដីខេត្តស្រះកែវ ប្រទេសថៃ ការចាប់ខ្លួននោះ បន្ទាប់ពីពួកគេទាំងអស់គ្នាបានចាញ់បោក មេខ្យល់ដោយ សន្យាថានឹងនាំពួកគេទៅដល់ទីក្រុងបាងកក ដើម្បីធ្វើការងារ ដោយមិនចាំបាច់មានលិខិតស្នាមអ្វីនោះឡើយ ។
ការឃាត់ខ្លួនពួកគេនេះគឺបានធ្វើឡើងនៅល្ងាចថ្ងៃទី ១៤ ខែសីហា ឆ្នាំ២០១៧ត្រង់ចំណុចខាងមុខវត្តស្រះហ្លួង ក្នុងឃុំណងសាំង ស្រុកអារញ្ញប្រាក់ថេត ខេត្តស្រះកែវប្រទេសថៃ ។ សមត្ថកិច្ចថា ដោយមានការសង្ស័យទៅលើរថយន្តតួរីសមួយគ្រឿង ពាក់ស្លាកលេខបាងកក ៣២.០៨៤១ ដែលបានបើកបរក្នុងល្បឿនលឿនដោយមានទិសដៅចេញពីស្រុកគោកខ្យូង ឆ្ពោះទៅកាន់ទីក្រុងបាងកក ពោលគឺរថយន្តនោះមានចេតនាចង់បុកទម្លុះបារ៉ាស់តម្រួតទៀតផង ។
ដូច្នេះទើបសមត្ថកិច្ច សង្ស័យថា មានបទល្មើសទើបឈានដល់ធើ្វការបង្ក្រាប ហើយបានឃាត់ខ្លួនអ្នកបើកបរមានឈ្មោះ អ៊ុស្មាន ស៊ូឡុង ភេទប្រុស មានអាយុ៣៦ឆ្នាំ រស់នៅភូមិ៧ ឃុំតាលុពោធិ ស្រុកមឿងខេត្តប៉ាតានី ចំណែកនៅក្នុងរថយន្តនោះមានពលករខ្មែរសរុបចំនួន៣២នាក់ដែលក្នុងនោះប្រុស១៩នាក់និងស្រី១៣នាក់ ។ នៅចំពោះមុខសមត្ថកិច្ច អ្នកបើកបររថយន្តបានសារភាពថាខ្លួនគ្រាន់តែជាអ្នកសុីឈ្នួល បើករថយន្តអោយគេតែប៉ុណ្ណោះ ដោយក្នុងមួយជើងៗទទួលបានប្រាក់ពី១៥០០ បាតទៅ ២០០០ បាត គឺដឹកពីស្រុកគោកខ្យូង ទៅកាន់ទីក្រុងបាងកក ។
ចំណែកពលករខ្មែរដែលគ្មានឯកសារពាក់ព័ន្ធទាំងនោះ បានសារភាពថា ពួកគេទាំងអស់គ្នាគឺធ្វើដំណើរមកពីខេត្តកំពង់ធំ និងខេត្តបន្ទាយមានជ័យ និងមានបំណងទៅធ្វើការនៅក្នុងទីក្រុងបាងកកប្រទេសថៃ តាមការអះអាងនិងធានាពី មេខ្យល់ខ្មែរ ដោយពួកគេក្នុងម្នាក់ៗត្រូវបង់លុយអោយទៅមេខ្យល់នោះ ៣០០០បាត ជាថ្នូរនិងការឆ្លងដែនខុសច្បាប់ ។
បច្ចុប្បនរថយន្តដឹកធ្វើពលករ រួមនិងតៃកុង ព្រមទាំងពលករខ្មែរទាំងអស់ ត្រូវបានក្រុមតម្រួតជំនាញនាំយកទៅកាន់អធិការដ្ឋានស្រុកអារញ្ញប្រាក់ថេត ដើម្បីធ្វើការសាកសួរបន្ត នឹងចាត់ការតាមផ្លូវច្បាប់ស្តីអន្តោប្រវេសន៏ខុសច្បាប់ ៕
