ភ្នំពេញ៖ រដ្ឋបាលរាជធានីភ្នំពេញបានបើកវគ្គបណ្តុះបណ្តាលស្ដីពីការគ្រប់គ្រងប្រពន្ធ័កាម៉េរ៉ាសុវត្ថិភាពជូនដល់មន្ត្រីសាលា រាជធានីភ្នំពេញ មន្ត្រីនគរបាល និងមន្ត្រីកងរាជអាវុធហត្ថរាជធានីភ្នំពេញក្នុងគោលបំណងឲ្យមន្ត្រីពាក់ពន្ធ័ទាំងអស់មានការយល់ដឹង និងប្រើប្រាស់ប្រពន្ធ័កាម៉េរ៉ាសុវត្ថិភាពដែល បានបំពាក់តាមភ្លើងស្តុបប្រមាណ៦០០គ្រឿងតាមគោលដៅសំខាន់ៗចំនួន៥៧៧ទីតាំងក្នុងរាជធានីភ្នំពេញ។ ពិធីនេះ បានប្រព្រឹត្ដទៅកាលពីថ្ងៃទី១៧ សីហា ឆ្នាំ២០១៧ ។
ក្នុងឱកាសបើកវគ្គបណ្តុះបណ្តាលនេះ លោក មាន ចាន់យ៉ាដា អភិបាលរងរាជធានីភ្នំពេញ បានលើកឡើងថា៖រដ្ឋបាលរាជធានីភ្នំពេញបានរៀបចំស្ថានីយ៏មេបញ្ជារួម ស្ថិតនៅជាន់ទី៩នៃអគាររដ្ឋបាលថ្មីក្នុងបរិវេណសាលារាជ ធានីភ្នំពេញដែលជាទូរបញ្ជា និងត្រួតពិនិត្យ តាមដាមតាមរយះប្រពន្ធ័កាម៉េរ៉ាសុវត្ថិភាពទាំងអស់ដែលដាក់ពង្រាយតាម ភ្លើងស្តុបក្នុងទីក្រុងដោយរៀបចំឲ្យមានក្រុមប្រចាំបញ្ជាចំនួន៥ក្រុមប្តូរវេនគ្នា២៤ម៉ោងលើ២៤ម៉ោង រួមទាំងការបង្កើតប្រពន្ធ័ទំនាក់ទំនងទាន់ហេតុការណ៏(Hotline)ដើម្បីធានានិរន្តរភាពសកម្មភាពស្របតាមស្មារតីនៃប្រកាសលេខ ៣៦៣៥ ប្រ.ក ចុះថ្ងៃទី១៨កក្កដាឆ្នាំ២០១៧របស់ក្រសួងមហាផ្ទៃ។
លោក មាន ចាន់យ៉ាដា បានបន្តថា៖ ការងារនេះពិតជាមានសារៈសំខាន់ក្នុងការពង្រឹងសមត្ថភាពមន្ត្រីនៃក្រុមប្រចាំបញ្ជាទាំង៥ក្រុម ឲ្យមានសមត្ថភាពជំនាញបច្ចេកទេសគ្រប់គ្រាន់ក្នុងការប្រើប្រាស់ និងគ្រប់គ្រងប្រពន្ធ័កាម៉េរ៉ាសុវត្ថិភាពនេះ ហើយក៏ជាយន្តការសំរាប់គាំទ្រដល់វិសយ័សន្តិសុខសង្គម និងបញ្ហាចរាចរក្នុងទីក្រុងសព្វថ្ងៃដែលកំពុងកកស្ទះយ៉ាងខ្លាំងតាមដងផ្លូវ ដែលរដ្ឋបាលរាជធានីភ្នំពេញបានដាក់ចេញនូវការប្តេជ្ញាចិត្តក្នុងការរៀបចំសន្តិសុខសណ្តាប់ធ្នាប់ក្នុងរាជធានីភ្នំពេញឲ្យបានកាន់តែប្រសើរ និផ្តលភាពកក់ក្តៅដល់ការប្រកបរបរប្រចាំថ្ងៃរបស់ប្រជាពលរដ្ឋយើង៕