តាមប្រសាសន៍របស់លោកពូ ញឹម ម៉ែន ត្រូវជាកូនប្រុសបង្កើតរបស់លោកយាយ ញឹម ហេង បានរៀបរាប់ប្រាប់ក្រុមអ្នកយកព័ត៌មានថា ឥឡូវនេះ ម្តាយរបស់គាត់ (លោកពូ ញឹម ម៉ែន) បានស្លាប់បាត់បង់ជីវិតបាត់ទៅហើយ លោកពូមិនដឹងជាត្រូវពឹងពាក់នរណាឲ្យដោះស្រាយ បញ្ហាទំនាស់ដីរបស់ម្តាយគាត់ ដែលមានទំហម ១៣ X ៣៩ ម៉ែត្រ ស្ថិតនៅភូមិ ១០០ សង្កាត់ទឹកថ្លា ខណ្ឌសែនសុខ រាជធានីភ្នំពេញ ដែលត្រូវលោក តាន់ ណាវិន ចៅសង្កាត់ទឹកថ្លា មានបំណងចង់លេបត្របាក់យកតាំងពីឆ្នាំ ២០០៤ មកម្ល៉េះ ។ លោកពូ ញឹម ម៉ែន បានបន្តទៀតថា បន្ទាប់ពីម្តាយរបស់គាត់បានទទួលមរណៈភាព កាលពីថ្ងៃទី ២៦ ខែមិនា ឆ្នាំ ២០១៥ ពូក៏បានធ្វើបុណ្យជូនម្តាយតាមប្រពៃណី ទំនាមទម្លាប់ចប់សព្វគ្រប់ លោកពូបានធ្វើលិខិតមួយច្បាប់ ចុះថ្ងៃទី ៣ ខែមេសា ឆ្នាំ ២០១៥ សុំឲ្យលោក តាន់ ណាវិន ចៅសង្កាត់ទឹកថ្លា ជួយចុះហត្ថលេខាបញ្ជាក់ឲ្យលោកពូបានរស់នៅស្របច្បាប់លើដីរបស់ម្តាយគាត់ ។ ប៉ុន្តែត្រូវបានលោក តាន់ ណាវិន យកលិខិតនៅទៅគូសវាសក្រវ៉េមក្រវ៉ាម មើលមិនយល់ឡើយ ។
លោកពូ ញឹម ម៉ែន បានបន្ថែមទៀតថា ទោះបីលោក តាន់ ណាវិន មិនព្រមចុះហត្ថលេខាបញ្ជាក់ឲ្យលោកពូ លោកពូក៏បន្តរស់នៅលើផ្ទះម្តាយរបស់គាត់ដដែល ស្រាប់តែមកដល់ថ្ងៃទី ២៨ ខែមិថុនា ស្របពេលដែលលោកពូ កំពុងតែរៀបចំផ្ទះសម្បែង ដើម្បីធ្វើបុណ្យគម្រប់ ១០០ ថ្ងៃជូនម្តាយ កម្លាំងប្រជាការពាររបស់សង្កាត់ទឹកថ្លា បានយកលិខិតលេខ ០១០ របក /១៥ ចុះថ្ងៃទី ២៣ ខែមេសា ឆ្នាំ ២០១៥ របស់សាលាសង្កាត់ទឹកថ្លា មកបិទជាប់និងទ្វាររបងផ្ទះ របស់ម្តាយគាត់ ។ ដោយក្នុងលិខិតនោះ មានខ្លឹមសារថា គោរពជូនលោកអភិបាលខណ្ឌសែនសុខ កម្មវត្ថុរបាយការណ៍ ស្តីពីការទទួលមរណៈភាពរបស់ឈ្មោះ ញឹម ហេង (ហៅទ្រព្យ) ភេទស្រី អាយុ ៨៦ ឆ្នាំ ដែលរស់នៅលើដីស្នាក់ការភូមិ ១០០ ខ្នង ។
តបតាមកម្មវត្ថុខាងលើ ខ្ញុំបាទសូមគោរពជម្រាបជូនលោកអភិបាលមេត្តាជ្រាបថា ដីទីស្នាក់ការភូមិ ១០០ ខ្នង មានទំហំ ១៣ X ៤០ ម៉ែត្រ ស្ថិតក្នុងក្រុមទី ៣ ភូមិ ១០០ ខ្នង ដីទីស្នាក់ការបានទុកទំនេរចាប់តាំងពីឆ្នាំ ១៩៨៧ រហូតមកដល់ឆ្នាំ ១៩៨៩ លុះក្រោយមកឈ្មោះ ញឹម ហេង (ហៅទ្រព្យ) បានសុំស្នាក់នៅលើដីនេះជាបណ្តោះអាសន្ន ដោយសំអាងថា កាត់ជាស្រីមេម៉ាយ រស់នៅតែម្នាក់ឯង និងមានជីវភាពក្រីក្រ ពុំមានកន្លែងស្នាក់អាស្រ័យ ទើបឲ្យគាត់ស្នាក់អាស្រ័យ រហូតមកដល់បច្ចុប្បន្ន ទើបលោកយាយ ញឹម ហេង (ហៅយាយទ្រព្យ) បានទទួលមរណៈភាព កាលពីថ្ងៃទី ២៦ ខែមិនា ឆ្នាំ ២០១៥ដោយរោគាពាធ សពលោកយាយ ញឹម ហេង ត្រូវបានអាជ្ញាធរធ្វើបុណ្យតាមប្រពៃណី និងបានដង្ហែយកទៅបូជានៅវត្តទឹកថ្លា ហើយដីស្នាក់ការភូមិ ១០០ នៅពេលនេះ យើងពុំអនុញ្ញាតឲ្យនរណាស្នាក់នៅបន្តទៀតឡើយ ។
លោក ញឹម ម៉ែន បានបញ្ជាក់បន្ថែមថា បន្ទាប់ពីពិនិត្យមើលលិខិតនោះ និងមានធ្វើបុណ្យ ១០០ ជូនម្តាយលោកពូចប់សព្វគ្រប់ លោកពូបានដាក់ពាក្យប្តឹងមួយច្បាប់ចុះថ្ងៃទី ៦ ខែកក្កដា ឆ្នាំ ២០១៥ គោរពជូនឯកឧត្តម អភិបាលរាជធានីភ្នំពេញដើម្បីឲ្យគាត់ជួយរកយុត្តិធម៌ឲ្យ។
តាមប្រភពពីប្រជាពលរដ្ឋដែលបានអញ្ជើញមកចូលរួមពិធីបុណ្យគម្រប់ខួប ១០០ ថ្ងៃ របស់លោកយាយ ញឹម ហេង បាននិយាយដូចៗគ្នាថា បើលោកយាយ ញឹម ហេង (ហៅយាយទ្រព្យ) មិនមែនជាម្ចាស់កម្មសិទ្ធិនៅលើដីនេះ (ដីទីស្នាក់ការភូមិ ១០០ ខ្នង) ទេ គាត់មិនអាចស្នាក់នៅតាំងពីឆ្នាំ ១៩៩១ រហូតមកដល់ឆ្នាំ ២០១៥ នោះទេ ។ ម្យ៉ាងវិញទៀត ចំពោះប្រសាសន៍របស់សម្តេចអគ្គមហាសេនាបតីតេជោ ហ៊ុន សែន ថា បើប្រជាពលរដ្ឋណារស់នៅ ឬអាស្រ័យផលលើត្រង់ចំណុចណាមួយ ចាប់ពីប្រាំឆ្នាំឡើង ត្រូវចេញប័ណ្ណកម្មសិទ្ធិដីឲ្យគាត់ ។ ចុះទំរាំលោកយាយ ញឹម ហេង តើប៉ុន្មានឆ្នាំហើយ ? មួយវិញទៀត នៅក្នុងកំឡុង ១៩៨៧ ដីនៅមូលដ្ឋានសង្កាត់ទឹកថ្លា គឺជាទីកន្លែងស្ងាត់ជ្រងំ ហើយទំនេរចោលតាំងពីមុនគេមុនឯងដូចជាលោកយាយ ញឹម ហេង ។ នេះដោយសារតែសង្កាត់មកយកផ្ទះរបស់គាត់ធ្វើជាទីស្នាក់ការសាលាសង្កាត់ ទើបដោះដូរមកឲ្យគាត់មករស់នៅលើដីទីស្នាក់ការភូមិយ៉ាងដូច្នេះ ។ បើដីទីស្នាក់ការភូមិមិនប្រគល់សិទ្ធិឲ្យគាត់ត្រូវប្រគល់ភូមិគ្រឹះ ដែលយកធ្វើជាសាលាសង្កាត់ទឹកថ្លានោះមកឲ្យគាត់វិញ ហើយបើថាគាត់អត់មានឯកសារគ្រប់គ្រាន់ យើងពិនិត្យមើលតែអត្តសញ្ញាណប័ណ្ណ របស់លោកយាយ ញឹម ហេង កាលពីជំនាន់រដ្ឋកម្ពុជានោះទៅដឹងច្បាស់ថា ភូមិគ្រឹះដ៏ធំស្កឹមស្កៃ ដែលគេយកធ្វើជាសាលាសង្កាត់ទឹកថ្លារាល់ថ្ងៃជារបស់នរណា? បើមិនមែនជារបស់យាយទ្រព្យ គេមិនធ្វើអត្តសញ្ញាណបណ្ណដាក់ថា ឈ្មោះ ញឹម ហេង ស្នាក់នៅលើភូមិគ្រឹះ ឬអាស័យដ្ឋានហ្នឹងនោះទេ ។ ម្យ៉ាងវិញទៀត បើក្មួយមែនចង់ដឹងច្បាស់ទៅបើកមើលគល់បញ្ជីនៅការិយាល័យភូមិបាលខណ្ឌ សែនសុខ សុំគេពិនិត្យគល់បញ្ជីបង្កាន់ដៃទទួលពាក្យស្នើសុំកាន់កាប់ដី បើមិនអញ្ចឹងទេ ទាល់តែសើរើសំណុំរឿងព្រហ្មទណ្ឌសាឡើងវិញ ព្រោះឥឡូវនេះ គេឧស្សាហ៍ឃើញអាប៉ែត (អតីតប្រធានភូមិ ១០០ ខ្នង) ជិះម៉ូតូចេញចូលសាលាសង្កាត់វិញហើយ ។
ជុំវិញព័ត៌មានខាងលើនេះ ដំណឹងភ្នំពេញ ពុំអាចទំនាក់ទំនងសុំការបំភ្លឺពីលោក តាន់ ណាវិន បានឡើយ ព្រោះទៅសាលាសង្កាត់អត់ជួប គេប្រាប់ថា គាត់ទៅប្រជុំក្រុង និងអត់ស្គាល់លេខទូរស័ព្ទ ៕