មណ្ឌលគីរី៖កម្លាំងយោធានៃតំបន់ប្រតិបត្តិការសឹករងខេត្តមណ្ឌលគិរីចំនួន៥០នាក់ ដឹកនាំដោយលោកឧត្តមសេនីយ៏ត្រី ឃិន ម៉េងស្រេង បានធ្វើដំណើរទៅបំពេញបេសកកម្មការពារព្រំដែននៅចំនុចអូរអាឡៃ វ ក្នុងទឹកដីស្រុកសៀមប៉ាង ខេត្តស្ទឹងត្រែងដែលរងការបំពានពីសំណាក់កងទ័ពឡា។
លោកស្វាយ សំអ៊ាង អភិបាលខេត្តមណ្ឌលគិរីបានថ្លែងនាព្រឹកថ្ងៃទី១៥ សីហា ២០១៧ ថា ទោះបីពេលនេះសភាពការណ៍បានល្អប្រសើរឡើងវិញដ៏ដោយ ការបញ្ជូនកម្លាំងយោធាទៅចំនុចខាងលើ គឺជាកាតព្វកិច្ចដ៏ចាំបាច់ក្នុងការការពារបូរណភាពទឹកដី នឹងដើម្បីបញ្ជាក់ពីចំនុចទីតាំងភូមិសាស្ត្ររបស់កម្ពុជាជៀសវាងសកម្មភាពបំពានពីភាគីរបស់ឡាវបន្តទៀត។
ក្នុងពិធីជូនដំណើរកងកម្លាំងយោធានោះដែរ អភិបាលខេត្តមណ្ឌលគិរី បានផ្តាំផ្ញើរដល់កម្លាំងប្រដាប់អាវុធទាំងអស់ ឲ្យមានការប្រុងប្រយ័ត្នបញ្ហាសុវត្ថិភាព ការថែរក្សាសុខភាព ព្រោះរដូវនេះជារដូវភ្លៀងអាចប្រឈមនឹងជំងឺតម្កាត់នានា ជាពិសេសជំងឺគ្រុនចាញ់។កងកម្លាំងទាំងអស់ត្រូវស្តាប់នឹងគោរពតាមបញ្ជារបស់ថ្នាក់ដឹកនាំ ដើម្បីជៀសវាងនូវករណីប្រឈមដែលកើតជាយថាហេតុ។
លោកឧត្តមសេនីយ៏ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរី បានបញ្ជាក់យ៉ាងម៉ឺងម៉ាត់ថា ទោះបីពេលនេះកម្លាំងដែលបញ្ជូនពីសឹករងខេត្តមណ្ឌលគិរី មានចំនួនត្រឹម៥០នាក់ពិតមែន ប៉ុន្តែកម្លាំងរបស់លោកបានត្រៀមខ្លួនរួចជាស្រេច ដើម្បីលះបង់គ្រប់បែបយ៉ាង ដើម្បីការពារជាតិ ការពារទឹកដី នឹងប្រជាជនកម្ពុជា ដោយមិនអនុញ្ញាតឲ្យមានជនបរទេសណាម្នាក់កេងប្រវ័ណ្ឌទឹកដីខ្មែរសូម្បីមួយមីលីម៉ែត្រ។
នៅព្រឹកថ្ងៃដដែលនោះអាជ្ញាធរខេត្តមណ្ឌលគិរីក៏បានឧបត្ថម្ភនូវសម្ភារៈយោធាដូចជាអាយកូមចំនួន១០គ្រឿង ទឹកសុទ្ឋ ថវិការ១លានរៀល ប្រេងសាំងចំនួន៣០០លីត្រ ដល់កងកម្លាំងដែលបានទៅបំពេញបេសកកម្មការពារព្រំដែនក្នុងខេត្តស្ទឹងត្រែង។ដោយឡែកលោកឧត្តមសេនីយ៏ទោ អ៊ុក សំណាង ស្នងការនគរបាលខេត្តមណ្ឌលគិរី បានឧបត្ថម្ភថវិកាផ្ទាល់ខ្លួនចំនួន៥០០ដុល្លាបន្ថែមដល់កម្លាំងយោធាសឹករង៕
