ភ្នំពេញ៖ នៅរសៀលថ្ងៃទី ១៥ ខែ សីហា ឆ្នាំ ២០១៧ នេះចៅក្រមសាលាដំបូងរាជធានីភ្នំពេញ បានប្រកាសសម្រេចសាលក្រមរឿងក្ដី វ៉ាន់ នីឡា និងអតីតសង្សាឈ្មោះ គុយ សិទ្ធិសក្តិ ពីបទល្មើស ហិង្សាដោយចេតនា និងចែកចាយរូបភាពអាសអាភាសកាលពីអំឡុង ខែ មេសា ឆ្នាំ ២០១៦ដែលជាលទ្ធផលគឺកញ្ញាបានឈ្នះក្តី។យោងទៅតាមបទល្មើសព្រហ្មទណ្ឌ ដែលមានចែង និងផ្ដន្ទាទោស តាមមាត្រា២១៧ នៃក្រមព្រហ្មទណ្ឌ មាត្រា ៣៨ ៣៩ នៃស្ដីអំពីជួញដូរមនុស្ស និងការធ្វើអាជីវកម្មផ្លូវភេទចៅក្រមលោក កោ វណ្ឌីបានបង្គាប់ឲ្យ គុយ សិទ្ធិសក្ដិ សងជំងឺចិត្ត ២០០ លានរៀល ទៅឲ្យដើមបណ្ដឹងរដ្ឋប្បវេណីកញ្ញា សុខ ចិន្តា ហៅ វ៉ាន់ នីឡា សំណើលើសពីនេះត្រូវបានច្រានចោល។
គួរបញ្ជាក់ថា ការសម្រេចសាលក្រមជាស្ថាពរនៅរសៀលនេះទាំងដើមបណ្ដឹងរដ្ឋប្បវេណីកញ្ញា សុខ ចិន្តា ហៅ វ៉ាន់ នីឡា និង ជនជាប់ចោទលោក គុយ សិទ្ធិសក្តិ មិនបានបង្ហាញវត្តមាននោះទេ។
កញ្ញាវ៉ាន់នីឡាតារាចម្រៀងក្នុងផលិយកម្មផ្លេងរីខត បានសរសេរនៅលើហ្វេសប៊ុក មុននេះបន្តិច ថានាងខ្ញុំសូមអរគុណបងប្អូនប្រជាពលរដ្ឋខ្មែរទាំងក្នុងនិងក្រៅប្រទេស។ អរគុណសមាគមមិត្តសិល្បះស្ម័គ្រចិត្តជួយសង្គម ក្រុមគ្រួសារតារាកម្ពុជា លោកមេធាវី បូរ៉ា និងលោកធាវីសុខចាន់ ក៏ដូចជាបងប្អូនសិល្បករដែលបានផ្តិតមេដៃលើញត្តិចំនួន600នាក់ជាង តាមរយះលោកជំទាវរដ្ឋមន្ត្រីក្រសួងវប្បធម៌ ដើម្បីជំនៗរុញចំណាត់ការរបស់ក្រសួងមហាផ្ទៃ។
សូមបញ្ចាក់ដែរថា៖នៅក្នុងសវនាការដែលបានធ្វើកាលពីរសៀលថ្ងៃទី២៤ ខែកក្កដា ឆ្នាំ២០១៧ ដោយអវត្តមានជនជាប់ចោទនិងដើមបណ្ដឹងរដ្ឋប្បវេណី ។
ជនជាប់ចោទ គុយ សិទ្ធិសក្តិ ត្រូវបានចោទប្រកាន់ពីបទ «ហិង្សាដោយចេតនានិងចែកចាយរូបភាពអាសអាភាស» ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៦ តាមមាត្រា២១៧នៃក្រមព្រហ្មទណ្ឌ និង មាត្រា៣៨ និងមាត្រា៣៩ ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
ទោះបីអវត្តមានជនជាប់ចោទ គុយ សិទ្ធិសក្តិ ក៏ក្រឡាបញ្ជីសវនាការបានអានចម្លើយរបស់គុយ សិទ្ធិសក្តិ នៅដំណាក់កាលចៅក្រមស៊ើបសួរ ដោយបញ្ជាក់ថា គុយ សិទ្ធិសក្តិ បានស្គាល់ សុខ ចិន្តា ហៅ វ៉ាន់ នីឡា តាមហ្វេសប៊ុកកាលពីឆ្នាំ២០១៤ហើយដល់ឆ្នាំ២០១៥បានស្រលាញ់គ្នាហើយក៏បាននាំទៅលេងផ្ទះនិងជួបប៉ាម៉ាក់។ចំណែករឿងដែលចោទថា គុយ សិទ្ធិសក្តិ បង្ហោះរូបអាសអាភាស គឺជនជាប់ចោទមិនបានដឹងទេ និងសុំឲ្យតុលាការជួយរកយុត្តិធម៌ ។
ដោយឡែកលោក នួន បូរ៉ា មេធាវីការពារសិទ្ធិឲ្យដើមបណ្តឹងបាននិយាយនៅពេលសវនាការថា កាលពីថ្ងៃទី២៦ខែកុម្ភៈឆ្នាំ២០១៦ លោក គុយ សិទ្ធិសក្តិ និង ដើមបណ្តឹង សុខ ចិន្តា ហៅ វ៉ាន់ លីឡា បានឈ្លោះគ្នាហើយ គុយ សិទ្ធិសក្តិ បានវាយ វ៉ាន់ នីឡា ។ ពេលនោះជនរងគ្រោះ បានបើកឡានចេញឲ្យគេជួយ ហើយពេលនោះ គុយ សិទ្ធិសក្តិ បានបើកឡានរបស់ជនរងគ្រោះចេញទៅ ហើយនៅក្នុងឡាននោះក៏មានកាបូបទូរស័ព្ទរបស់ជនរងគ្រោះផងដែរដោយរយៈពេលជិត១០ថ្ងៃ ទើបគុយ សិទ្ធិសក្តិ បានយកមកប្រគល់ឲ្យវ៉ាន់ នីឡា វិញ។
លោកមេធាវី បន្តថា ចំណែករូបដែលបានបង្ហោះនោះគឺដោយសារតែការស្រលាញ់គ្នានិងគិតថាបានគ្នាជាប្តីប្រពន្ធទើបមានការថតផ្ញើឲ្យគ្នាមើលដោយសារតែ គុយ សិទ្ធិសក្តិនៅរៀនឯបរទេស។ក្នុងរឿងក្ដីនេះ ដើមបណ្ដឹងរដ្ឋប្បវេណីទាមទារសំណងជំងឺចិត្តចំនួន៥០ម៉ឺនដុល្លារ ។