ភ្នំពេញ ៖ នៅយប់ថ្ងៃទី១៣ ខែសីហា ឆ្នាំ២០១៧ ស្ថិតនៅលើកំណាត់ផ្លូវរថភ្លើង ក្នុងភូមិទួលគោក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញស្ត្រីមានផ្ទៃពោះម្នាក់កំពុងដើរសុខៗបែរជាទទួលរងដោយសារគ្រាប់កាំភ្លើងពីមន្ត្រីយោធាម្នាក់ បង្កឲ្យមានការភ្ញាក់ផ្អើលដល់ប្រជាពលរដ្ឋ យ៉ាងច្រើនមកចោមរោមមើល ។
ជនសង្ស័យ ដែលប្រើអាវុធខ្លីបាញ់ត្រូវស្ត្រី រងគ្រោះត្រូវបានគេស្គាល់យ៉ាងច្បាស់ថាមានឈ្មោះ ហេង ជាមន្ត្រីយោធា ។ មូលហេតុនៃការផ្ទុះអាវុធគឺដោយសារ តែមន្ត្រីយោធារូបនោះទារលុយពីទីតាំងល្បែងហ្គេមបាញ់ត្រី មិនបាន ក៏កើតរឿងជម្លោះ ប្រតាយប្រតប់ជាមួយអ្នកមើលការខុសត្រូវ រហូតឈានទៅដល់ការដកកាំភ្លើងខ្លីបាញ់១គ្រាប់ បណ្ដាលឲ្យរាលកៃ ត្រូវចំស្ត្រីម្នាក់ ដែលកំពុងដឹកដៃកូន ដើរតាមដងផ្លូវ រងរបួសយ៉ាងធ្ងន់ធ្ងរដឹកទៅពេទ្យចឹងទៅ។
ក្រោយពេលកើតហេតុ ជនសង្ស័យបានជិះម៉ូតូរត់គេចខ្លួនបាត់ ដោយសុវត្ថិភាព និងបន្សល់ទុកកាំភ្លើងខ្លី១ដើម ម៉ាក K59 ដែលជ្រុះនៅកន្លែងកើតហេតុ ។
ស្ត្រីជនរងគ្រោះបានអំពាវនាវយ៉ាងទទូច ដល់សមត្ថកិច្ចពាក់ព័ន្ធទាំងអស់ ពិសសនាយឧត្តមសេនីយ៍ លោក ជួន សុវណ្ណ អគ្គស្នងការរង និងជាស្នងការនគរបាលរាជធានីភ្នំពេញ មេត្តាមានវិធានការស្រាវជ្រាវវែកមុខ តាមចាប់ខ្លួនជនដៃដល់ឈ្មោះ ហេង ដែលត្រូវបានគេស្គាល់យ៉ាងច្បាស់ថា ជាមន្ត្រីយោធា ដើម្បីយកមកផ្ដន្ទាទោសតាមផ្លូវច្បាប់ផង៕