ភ្នំពេញ ៖ រសៀលថ្ងៃទី១៣ ខែសីហា ឆ្នាំ២០១៧នេះលោក សួន សេរីរដ្ឋា ប្រធានគណបក្សអំណាចខ្មែរ ត្រូវបានកម្លាំងសមត្ថកិច្ចចាប់ខ្លួននិងវ៉ៃខ្នោះភ្លាមៗខណៈដែលលោកកំពុងធ្វើដំណើរពីខេត្តកំពង់ចាម ចូលមករាជធានីភ្នំពេញ ត្រង់ចំណុចស្ពានព្រែកព្នៅ ខណ្ឌព្រែកព្នៅ រាជធានីភ្នំពេញ។ បន្ទាប់ពីចាប់ខ្លួនវ៉ៃខ្នោះហើយ លោក សួន សេរីរដ្ឋា ត្រូវបាន បញ្ជូនទៅកាន់ស្នងការដ្ឋានន គរបាលរាជធានីភ្នំពេញ និងត្រៀមបញ្ជូនទៅកាន់តុលាការ ដើម្បីកាត់ទោសភ្លាមៗតែម្តង។
ប្រភពពីសមត្តកិច្ចឲ្យដឹងថាការចាប់ខ្លួនគឺបន្ទាប់ពីលោក សួន សេរីរដ្ឋា បានបង្ហោះសារនៅលើគេហទំព័រ ជេរប្រមាថម៉ាក់ងាយដល់កូនខ្មែរ និងកងទ័ពជាតិ ។នាយឧត្តមសេនីយ៍ នេត សាវឿន “ការចាប់ខ្លួនលោក សួន សេរីរដ្ឋា ដោយសារគាត់បង្ហោះហ្វេសប៊ុក ពាក់ព័ន្ធនឹងការបំបែកបំបាក់កងទ័ព”។
នៅថ្ងៃទី១២ ខែសីហា ឆ្នាំ២០១៧នៅលើហ្វេសប៊ុកលោកសួនសេរីរដ្ឋាបានបង្ហោះសារមួយមានខ្លឹមសារយ៉ាងថា៖សាមកុក របស់លោក ហ៊ុន សែន កំពុង បែកកុក! សេនាប្រមុខ ដាក់បញ្ជាឲ្យកងទ័ពត្រៀមប្រយុទ្ធ ដាក់ឱសានវាទឲ្យសត្រូវ… តែឱនក្បាលចូលបន្ទាយសត្រូវដើម្បីសុំចរចា! «ពេលសង្គ្រាមកើតឡើងជាមួយនឹងប្រទេសលាវនោះ លទ្ធផលវាហ្នឹងមិនខុសពីសង្គ្រាមដែលកើតឡើងជាមួយនឹងប្រទេសសៀមទេ ! គឺកូនខ្មែរ កងទ័ពជាតិ នឹងស្លាប់ក្នុងសមរភូមិយ៉ាងវេទនា… ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីញីយ៉ាងគគ្រឹកគគ្រេង !។
ពីព្រោះកន្លងមកដូចយើងដឹងហើយ សង្គ្រាមដែលកើត ឡើងជាមួយនឹងប្រទេសសៀម គឺស្លាប់តែកូនខ្មែរអ្នកស្នេហាជាតិ ដែលចូលប្រយុទ្ធនៅជួរមុខទេ។ ចំណែកឯពួកមេៗពាក់ផ្កាយ និងកូនលោកធំៗដែលនៅជួរ ក្រោយចេញមុខចេញមាត់នោះ ប្រមូលលុយ ប្រមូលលាភ ហើយដេកតែម៉ាស៊ីនត្រជាក់ជាមួយស្រីកំដរ ក៏ឡើងបុណ្យឡើងផ្កាយដែរ»។
តែទោះបីយ៉ាងណា និងទោះបីជាយើងដឹងថា វាជាសង្គ្រាមដើម្បីដំឡើងមុខ ដំឡើងឋានៈ បំពាក់ខ្លួនឥស្សរៈចោរ បន្លំឲ្យក្លាយទៅជាឥស្សរៈជនបំភាន់យើងក៏ដោយ… ក៏សូមពលរដ្ឋខ្មែរ យុវជនខ្មែរ ត្រូវរួមសាមគ្គីគ្នាលើកទឹកទឹកចិត្ត និងជួយគ្រប់យ៉ាងដែលអាចជួយបានដល់កងទ័ពជាតិរបស់យើងដែលតែងយកទ្រូងទៅពាំងគ្រាប់រំសេវ ដើម្បីបុព្វហេតុការពារទឹកដីពិតប្រាកដ។
អ្នកនាំពាក្យរដ្ឋាភិបាល លោក ផៃ ស៊ីផាន បានផ្សាយនៅក្នុងហ្វេសប៊ុកថា អនុលោម ទៅតាមការអនុវត្តន៍គោលនយោបាយការពារជាតិរបស់រាជរដ្ឋាភិបាលតេជោ សែន ក៏ដូចជាគោលនយោបាយគណបក្សប្រជាជនកម្ពុជា ដែលកំពុងថិតនៅក្នុងអាណត្តិអំណាចរបស់ខ្លួន ហើយស្របជាមួយ និងរដ្ឋធម្មនុញ្ញខ្មែរ ដែលផ្តល់បុព្វសិទ្ធិ និងអំណាចដល់រាជរដ្ឋាភិបាលផ្តាច់មុខ ក្នុងកិច្ចការពារជាតិនោះ ដូចនេះមិនត្រូវមានបុគ្គលណា ឬក្រុមណា មានសិទ្ធិជ្រៀតជ្រែក លូកលាន់ក្នុងកិច្ចចំណាត់ការរបស់សម្តេចតេជានាយករដ្ឋមន្ត្រី ដែលលោកជាអគ្គមេបញ្ជាការ កងយោធពលខេមរភូមិន្ទ ដែលចែងនៅមាត្រា២៣រដ្ឋធម្មនុញ្ញ។ នេះជាការងារទ័ពសុទ្ធសាធ មិនមែនការងាស៊ីវិលនោះឡើយ។
អាស្រ័យហេតុនេះ សម្តេចតេជោមានបុព្វសិទ្ធគ្រប់គ្រាន់ ក្នុងកិច្ចចាត់ការ ឬបញ្ជាកងទ័ពជាបន្ទាន់ ក្នុងកិច្ចការពារជាតិ ឬការពារទឹកដីកម្ពុជា ដោយមិនចាំបាច់ទទួលការអនុញ្ញាតជាមុន ពីស្ថាប័នណា មួយនោះឡើយ លើកលែងតែការធ្វើសង្គ្រាមមួយមុខគត់តែប៉ុណ្ណោះ។
ខ្ញុំសូមជម្រាបជូនដល់អ្នកនយោបាយ ឬអ្នកតាំងខ្លួនជាអ្នកវិភាគនយោបាយ មេត្តាចូលរួមស្មារតី ក្នុងកិច្ចការពារជាតិនេះ អ្វីដែលមានប្រសិទ្ធិភាព ក៏ដូចជារបបនយោបាយការពារជាតិ ដែលមានស្រាប់ រួចមកហើយ។ រាល់សកម្មភាព ឬការបញ្ជាញមតិណា ដែលធ្វើអោយបាត់បង់ប្រសិទ្ធិភាព នៃកិច្ចប្រតិបត្តការយោធា គឺជាអំពើវិទ្ធង្សនាប្រឆាំងនឹងផលប្រយោជន៍ការពារជាតិ ក៏ដូចក្រមព្រហ្មទណ្ឌផងដែរ។
ក្រោយពីការចាប់ខ្លួននៅពេលរសៀលនេសមត្ថកិច្ចបាននាំខ្លួនលោក សួន សេរីរដ្ឋា ទៅគេហដ្ឋានរបស់លោកក្នុងបុរីប៉េងហួត តាមបណ្តោយផ្លូវ៥៩៨ ដើម្បីឆែកឆេរ ។
ប្រភពពីវិទ្យុបារាំងបានឲ្យដឹងថា៖បើនិយាយពីការសិក្សា លោក សួន សេរីរដ្ឋា មេដឹកនាំគណបក្សអំណាចខ្មែរ បានទទួលការអប់រំនៅសហរដ្ឋអាមេរិក នៅថ្នាក់ក្រោយឧត្តមសិក្សា។ ប៉ុន្តែមុនបានទៅអាមេរិក គាត់ធ្លាប់ជាក្មេងលក់កាសែត ជាអ្នកកាសែត និងជាមន្ត្រីអង្គការក្រៅរដ្ឋាភិបាល។ អាមេរិក មិនត្រឹមជាកន្លែង ដែលគាត់ត្រូវរៀនសូត្រនោះទេ។
ទីនោះជាកន្លែង ដែលមនុស្សជាច្រើន បានផ្តើមស្គាល់ បុរសឈ្មោះ សួន សេរីរដ្ឋា តាមរយៈសកម្មភាពរបស់គាត់ប្រឆាំងនឹងរដ្ឋាភិ បាលក្រុងភ្នំពេញ រហូតហ៊ានប្តឹង លោកនាយករដ្ឋមន្ត្រីហ៊ុន សែន ទៅតុលការឧក្រិដ្ឋកម្មអន្តរជាតិ ICC ទៀតផង។
និយាយជារួម អ្នកនយោបាយថ្មី វ័យ៤២ឆ្នាំម្នាក់នេះ កើតចេញពីកូនកសិករ នៅខេត្តបាត់ដំបង។សូមបញ្ជាក់ដែរថាលោកសួនសេរីរដ្ឋាទទួលបានការទូលស្នើសុំលើកលែងទោសក្បត់ជាតិពីនាយករដ្ឋមន្ត្រីតេជោសែនទៅព្រះមហាក្សត្រកាលពីឆ្នាំ២០១៥កន្លងទៅនេះ។