ខេត្តកំពង់ចាម ៖ ភរិយារបស់លោកឆាយ វីរៈយុទ្ធតារាចម្រៀងផលិតកម្មសាន់ដេ អ្នកស្រីសែចាន់ឌីដែលទើបតែចូលរោងការថ្មីៗ បានតាំងជំហរថា រូបភាពប្រចណ្ឌស្វាមី ជាមួយអ្នកសិល្បៈដូចគ្នា គឺមិនអាចកើតមានឡើយ ។ ការសំខាន់ គឺស្ថិតនៅលើចិត្តគំនិតរបស់បុគ្គលតែប៉ុណ្ណោះ ។បើចឹងមែននោះ ឆាយ វីរៈយុទ្ធ ពិតជាមានសំណាងណាស់ ដែលមានប្រពន្ធកាន់ចិត្តធ្ងន់បាន ។
លោកឆាយ វីរៈយុទ្ធ បានសម្រេចចិត្តចូលរោងការ ជាផ្លូវការពេញមុខ កាលពីថ្ងៃទី២១ ឧសភា នាស្រុកជើងព្រៃ ខេត្តកំពង់ចាម (ក្បែរវិទ្យាល័យស្គន់) ។
កូនក្រមុំកូនថៅកែម៉ាស៊ិនស្រូវហាកសែដែលជាម្ចាស់ចិត្តលោកឆាយ វីរៈយុទ្ធ មានឈ្មោះសែ ចាន់ឌី ជាអ្នករកស៊ី និងមានសមត្ថភាពតែងនិពន្ធបទចម្រៀងយ៉ាងចំណានដោយបទចម្រៀងទាំងនោះ អ្នកនាងបានតែងឱ្យស្វាមីឆាយ វីរៈយុទ្ធ ច្រៀងបានប្រមាណ១០បទ មកហើយដែរ ។
មុននឹងចូលរោងការសំពះផ្ទឹមលោកឆាយ វីរៈយុទ្ធ បានចំណាយពេលជាង៧ឆ្នាំ ដើម្បីស្វែងយល់ចិត្តថ្លើមគ្នាយ៉ាងសកម្មគ្រប់សកម្មភាពទាំងអស់ ដែលលោកឆាយ វីរៈយុទ្ធ បានតស៊ូ ដើម្បីបានម្ចាស់បេះដូងនេះ ក្នុងប្រអប់ដួងចិត្ត ។
អ្នកនាងសែ ចាន់ឌី ជាភរិយារបស់ឆាយ វីរៈយុទ្ធ ក៏បានឱ្យដឹងដែរថា អ្នកនាងពេញចិត្តស្វាមីលោកឆាយ វីរៈយុទ្ឋនេះ មកពីគិតថាលោកជាមនុស្សមិនសូវនិយាយស្តីច្រើន ប៉ុន្តែដើម្បីខ្ញុំលោកតស៊ូប្រែប្រួល ទៅជានិយាយរួសរាយប្រឹងប្រែងមិនធម្មតា អស់ពេល៧ឆ្នាំទើបអ្នកនាងយល់ថា អាចយកគាត់ជាគូអនាគតបានដោយសម្រេចចិត្តរៀបការតែម្តង ៕