ភ្នំពេញ៖រហូតមកទល់ពេលនេះ ស្ថានការណ៍យោធានៅតាមបណ្តោយព្រំដែនកម្ពុជា-ឡាវ មិនទាន់មានអ្វីប្រែប្រួលនៅឡើយទេបើទោះបីជានៅភ្នំពេញនាយករដ្ឋមន្ត្រីកម្ពុជា បានគំរាមចាត់ការក៏ដោយ ។លោកឧត្តមសេនីយ៍ ស្វាយ ញ៉នមេបញ្ជាការសឹករងខេត្តស្ទឹងត្រែង នៅមុននេះបន្តិច បានថ្លែងប្រាប់កាសែត ថា រហូតមកទល់ពេលនេះ សភាពការព្រំដែនមិនមាន អ្វីប្លែកឡើយ។“ព្រំដែនកម្ពុជា-ឡាវ អត់មានអ្វីទេពេលនេះ… វាកំពុងនៅលើទឹកដីយើង៥-៦ខែហើយ… កម្លាំងវាជាង១០០នាក់”។
បើតាមលោកមេបញ្ជាការ កម្ពុជាមិនចង់មានបញ្ហាអ្វី ជាមួយឡាវឡើយ ហើយកន្លងមក កម្ពុជាតែងតែត្រជាក់រហូត!។សូមបញ្ជាក់ដែរថាថ្លែងក្នុងពិធីប្រកាសតែងតាំងលោកបណ្ឌិត សុខ ទូច ជាប្រធានរាជបណ្ឌិត្យសភាកម្ពុជា នៅថ្ងៃទី១១ ខែសីហា ឆ្នាំ២០១៧ថា
សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានបញ្ជាក់ថា កម្ពុជាទុករយៈពេល៦ថ្ងៃទៀត ដើម្បីឲ្យភាគីឡាវ ដកកងទ័ពចេញពីព្រំដែន ខេត្តស្ទឹងត្រែង បើមិនចង់មានរឿង ត្រូវតែដកចេញ។“ខ្ញុំទុកពេលឲ្យ៦ថ្ងៃ ពីថ្ងៃទី១១ដល់១៧សីហា បើមិនចង់មានរឿងត្រូវតែដក ។ ឱសានវាទត្រឹមថ្ងៃទី១៧ សីហា ខ្ញុំបានបញ្ជាកងទ័ពហើយ ដល់ពេលត្រូវតែធ្វើ មេទ័ពត្រូវតែស្តាប់ឲ្យបាន។ យើងមិនចង់ទាស់គ្នា បើគាត់មិនព្រមដកទេ ចឹង យើងទុកពេលឲ្យគាត់ ៤ខែហើយ ” ។
គួររំលឹកថា កងកម្លាំងទាហានឡាវបានបញ្ជូនកម្លាំងជាច្រើនរយនាក់ដើម្បីរារាំងការសាងសង់ប៉ុស្តិ៍របស់ភាគីខ្មែរនៅលើបូរណភាពទឹកដីខ្មែរនៅចំក្នុងឃុំអូរស្វាយ ស្រុកថាឡាបរិវ៉ាត់ ខេត្តស្ទឹងត្រែង ចាប់តាំងពីដើមខែមីនា ឆ្នាំ២០១៧មកម្ល៉េះ ដោយសង់ប៉ុស្តិ៍នៅចំណុចដុងក្រឡចាស់បង្គោលលេខ ០៣៣។នៅថ្ងៃទី ២៧ ខែមីនា ឆ្នាំ២០១៧ ទាហានឡាវបានបន្តស្ថាបនាប៉ុស្តិ៍ នៅចំណុចច្រកទ្វារអន្តរជាតិណងណុកខៀន ខេត្តចម្ប៉ាសាក់ ឈមនឹងច្រកត្រពាំងក្រៀល ខេត្តស្ទឹងត្រែងរបស់ខ្មែរ ។ ក្រោយមកទាហានឡាវ បានកសាងប៉ុស្តិ៍ព្រំដែនប្រក់ស័ង្កសីទទឹង ៥ម៉ែត្រ បណ្តោយ ៦ម៉ែត្រ នៅចំណុចឆ្ងាយពីដើមល្វា ១០០ម៉ែត្រ នៃឃុំអូរស្វាយ ស្រុកថាឡាបរិវ៉ាត់ ខែត្រស្ទឹងត្រែង កាលពីថ្ងៃទី០៦ មេសា ឆ្នាំ២០១៧ ។
ក្រោយពីសាងសង់ប៉ុស្តិ៍រួច អាជ្ញាធរឡាវ បានបញ្ជូននគរបាលព្រំដែនឈរជើងនៅតំបន់នោះ។
កាលពីដើមឆ្នាំ២០១៦ ទាហាន និងនគរបាលការពារព្រំដែនរបស់កម្ពុជា បានហាមមិនឲ្យឡាវ សាងសង់ប៉ុស្តិ៍ព្រំដែនមិនទាន់មានការឯកភាពគ្នាបោះបង្គោលព្រំដែនជាផ្លូវការ ឋិតនៅចន្លោះបង្គោលព្រំដែនលេខ០៣៣ ដល់លេខ០៣៤ ឬជាប់ផ្លូវជាតិលេខ៧ នៅភូមិដុងក្រឡ សង្កាត់សាមគ្គី ក្រុងស្ទឹងត្រែង។ ចំណែកឡាវ បានផ្អាកការសាងសង់មួយរយៈពេល ក៏ប៉ុន្តែកាលពីពេលថ្មីៗនេះ ឡាវ បានស្ថាបនាផ្លូវចូលតំបន់នោះ ពោលគឺផ្លូវឆ្ពោះទៅកាន់ប៉ុស្តិ៍ដុងក្រឡចាស់ បំណងដឹកសម្ភារសាងសង់ប៉ុស្តិ៍ព្រំដែននៅតំបន់នោះជាថ្មីទៀត ហើយភាគីកម្ពុជា បានផ្តល់ដំណឹងទៅថ្នាក់ជាតិរួចហើយ ដើម្បីរកមធ្យោបាយដោះស្រាយ។
ប្រទេសកម្ពុជា មានព្រំដែនគោកជាប់ជាមួយប្រទេសឡាវ ប្រវែង ៥៤០គីឡូម៉ែត្រ ក្នុងនោះមានបង្គោលព្រំដែនដែលត្រូវបោះចំនួន ១៤៥បង្គោល។ បច្ចុប្បន្ន រដ្ឋាភិបាលប្រទេសទាំងពីរបោះបង្គោលរួចចំនួន ១២១បង្គោល ដែលស្មើប្រមាណ ៨៤ភាគរយ។ មន្ត្រីរដ្ឋាភិបាលកម្ពុជា ឲ្យដឹងថា ចំណុចដែលសេសសល់មិនទាន់បោះរួច គឺឋិតក្នុងខែត្រព្រះវិហារ និងខែត្រស្ទឹងត្រែង ។
នៅក្នុងលិខិតចំនួន៣ទំព័ររបស់លោកនាយករដ្ឋមន្ត្រី ហ៊ុន សែន ផ្ញើជូនលោក ថោងលន់ ស៊ីសូលីត កាលពីថ្ងៃទី០២ ខែសីហា ឆ្នាំ២០១៧ បានសរសេរនៅក្នុងកម្មវត្ថុថា៖ «សំណើស្នើ ឲ្យរដ្ឋាភិបាល នៃប្រទេសឡាវ ដកកងកម្លាំងប្រដាប់អាវុធ ចេញពីតំបន់ក្បែរអូរអាឡៃ និងតំបន់អូរតាង៉ាវ ព្រំដែនខេត្តស្ទឹងត្រែង និងខេត្តអាតាពើ ឡាវ»។ ប៉ុន្តែគ្មានការឆ្លើយតប។ក្រៅពីឡើងសម្លេងនៅភ្នំពេញតេជោសែននាយករដ្ឋមន្ត្រីក៏មានគម្រោងឡើងយន្តហោះទៅជួបសមភាគីឡាវនិយាយរឿងហ្នឹងដែរ។
