ភ្នំពេញ៖ បញ្ហាវិវាទពាក្យសម្តីរវាងសមាជិកគណៈមេធាវីនិងអគ្គនាយករង នៃអគ្គនាយកដ្ឋានពន្ធដារ ហើយឈានដល់ការប្តឹងទៅតុលាការរប្រហែលជាត្រូវបញ្ចប់វិញ បន្ទាប់ពីលោក សួន វិសាល ប្រធានគណៈមេធាវីកម្ពុជា និងលោក គង់ វិបុល អគ្គនាយក នៃអគ្គនាយកដ្ឋានពន្ធាដាជួបគ្នាកាលពីថ្ងៃទី៧សីហាឆ្នាំ២០១៧។
បើតាមសេចក្តីប្រកាសព័ត៌មានរបស់ គណៈមេធាវីកម្ពុជាបានឲ្យដឹងថាក្នុងជំនួបនោះអគ្គនាយកដ្ឋានពន្ធដារ និងគណៈមេធាវីកម្ពុជា យល់ឃើញថា បញ្ហាសំណេរក្នុង Facebook របស់លោក វ៉ាន់ ពុទ្ធិពល គឺជារឿងបុគ្គលប៉ុណ្ណោះ។
ពាក់ព័ន្ធកាតព្វកិច្ចបង់ពន្ធចូលថវិកាជាតិ អគ្គនាយកដ្ឋានពន្ធដារ សម្រេចពន្យារពេលចេញលិខិត អញ្ជើញការិយាល័យមេធាវី មកចុះបញ្ជីពន្ធនៅគ្រប់សាខាពន្ធដារទូទាំងប្រទេស ហើយលោក គង់ វិបុល គាំទ្រ និងទទួលយកសំណើរបស់គណៈមេធាវី ក្នុងការបង្កើតក្រុមការងារអន្តរក្រសួង រវាងក្រសួងសេដ្ឋកិច្ច ក្រសួងយុត្តិធម៌ ដើម្បីតាក់តែងលិខិតបទដ្ឋាន គតិយុត្តពាក់ព័ន្ធនឹងកាតព្វកិច្ចបង់ពន្ធរបស់មេធាវីដាក់ជូន រដ្ឋមន្ត្រីក្រសួងសេដ្ឋកិច្ច ដើម្បីពិនិត្យ និងសម្រេច។ការពិតវាត្រូវចឹងមិនមែនត្រូវឲ្យគេបង់ពន្ធឆៅៗនោះទេ!។
សូមជម្រាបថា មេធាវីម្នាក់ឈ្មោះ លី ច័ន្ទតុលា ដែលអះអាងថា តំណាងមេធាវី៥០នាក់ នៅថ្ងៃទី០៤ ខែសីហា ឆ្នាំ២០១៧ បានដាក់ពាក្យប្តឹង លោក វ៉ាន់ ពុទ្ធិពល អគ្គនាយករង អគ្គនាយកដ្ឋានពន្ធដារ ទៅសាលាដំបូងរាជធានីភ្នំពេញ ដោយចោទថា បានសរសេរលើ Facebook ប្រើប្រាស់ពាក្យពេចន៍មួយចំនួន ប្រមាថមេធាវី ថាជាសត្វគោ ដែលរូបលោកមិនអាចទទួលយកបានឡើយ, ប៉ុន្តែករណីនេះត្រូវបានលោក វ៉ាន់ ពុទ្ធិពល បដិសេធវិញថា លោកមិនបានប្រៀបធៀបមេធាវីជាសត្វគោល ដូចការចោទប្រកាន់ឡើយ គឺជាការយល់ច្រឡំប៉ុណ្ណោះ។
ការប្រតិកម្មឈានដល់ការដាក់ពាក្យប្តឹងនេះ ត្រូវបានគេដឹងថា កើតឡើងបន្ទាប់ពីអគ្គនាយកដ្ឋានពន្ធដារ និងគណៈមេធាវីកម្ពុជា បានបើកសិក្ខាសាលារួមគ្នាមួយ ស្តីពី «កាតព្វកិច្ចបង់ពន្ធរបស់មេធាវី» នាថ្ងៃទី០៣ ខែសីហា ឆ្នាំ២០១៧ ដោយភាគីទាំងពីរពិភាក្សាដេញដោលគ្នាយ៉ាងតឹងរឹងមួយ។
បន្ទាប់ពីបញ្ចប់កិច្ចប្រជុំពិភាក្សាគ្នានេះ លោក វ៉ាន់ ពុទ្ធិពល បានបង្ហោះនូវលើ Facebook របស់លោកដោយសរសេរថា «ថ្ងៃនេះថ្នាក់លើប្រើទៅឲ្យប្រមូល គោបញ្ជូលក្រោលដើម្បីថែរក្សាឲ្យគត់មត់។ គោមួយចំនួនធំបានចូលក្រោលត្រឹមត្រូវ វៀរលែងតែ អាពាល អាត្នោត និង អាទែក វាធ្លាប់តែនៅធ្វើព្យុះធ្វើភ្លៀងនៅក្រៅ ដើរជាន់ដំណាំ ស៊ីដំណាំអ្នកស្រុក កៀចមិនព្រមចូលក្រោល។ មិនត្រឹមតែកៀច វាចង់ជល់ហើយធាក់ខ្ញុំទៀត សុំសួរប្រិយមិត្ត តើអា៣ក្បាលហ្នឹង សមនឹងចាក់កន្លុះឲ្យតឹង ហើយសំពងនឹងទំពក់រនាស់ឲ្យបាក់លោងទេ ? សើច !»។ទោះបីជាមេៗប្រកាសថាចប់តែគេមិនទាន់ដឹងថាតើលោកលី ច័ន្ទតុលា ដែលអះអាងថា តំណាងមេធាវី៥០នាក់បានទៅដកពាក្យបណ្តឹងពីតុលាការវិញហើយឬនៅនោះឡើយ។