ក្រចេះ ៖ ក្រុមជញ្ជីងចល័តរបស់ក្រសួងសាធារណការ និងដឹកជញ្ជូន បានឆ្មក់ចាប់រថយន្តចំនួន៤គ្រឿងដឹកទំនិញលើសទម្ងន់រយៈពេល២ថ្ងៃចាប់ពីថ្ងៃទី៦ ដល់ថ្ងៃទី៧ ខែសីហា ឆ្នាំ២០១៧ នៅលើផ្លូវជាតិលេខ៧ ក្នុងស្រុកស្នួល ធ្វើលការផាកពិន័យបានចំនួនជាង១៥លានរៀល។
ប្រតិបត្តិការឆ្មក់ចាប់រថយន្តដឹកលើសទម្ងន់នេះ ដឹកនាំដោយលោក តេង ឈួន អនុរដ្ឋលេខាធិការក្រសួងរបស់ក្រសួងសាធារណការ និងដឹកជញ្ជូន ដោយមានការចូលរួមពីមន្ត្រីសាធារណការ និងដឹកជញ្ជូនខេត្តក្រចេះ។
លោក តេង ឈួន បានឲ្យដឹងថា រថយន្តទាំង៤គ្រឿងនេះ បានដឹកទំនិញលើសទម្ងន់កំណត់នេះចាប់ពី៦តោន ទៅ២១តោន ។
បើតាមប្រសាសន៍លោកតេង ឈួន បានក្រុមការងារជញ្ជីងចល័តនឹងធ្វើការត្រួតពិនិត្យជាប្រចាំនៅទូទាំងប្រទេស ដើម្បីទប់ស្កាត់និងកាត់បន្ថយការខូចខាតផ្លូវជាតិ ដែលកន្លងមកការចំណាយលើការជួសជុលផ្លូវថ្នល់ត្រូវចំណាយអស់ថវិកាជាតិជាច្រើន។
ជាមួយនេះដែរ លោកអនុរដ្ឋលេខាធិការ បានអំពាវនាវដល់ម្ចាស់ក្រុមហ៊ុនដឹកជញ្ជូន និងម្ចាស់យានយន្តដឹកទំនិញទាំងអស់ សូមកុំដឹកទំនិញលើសទម្ងន់កំណត់ ព្រោះរដូវនេះជារដូវវស្សា ងាយធ្វើឲ្យខូចផ្លូវ ដោយសារតែការដឹកទំនិញលើសកំណត់នេះ៕
