ខេត្តក្រចេះ ៖ រថយន្តសាំយ៉ុង០១គ្រឿងក្នុងចំណោម០២គ្រឿងដឹកឈើសុក្រមឃ្លុម បួនជ្រុងទ្រវែងមានមុខកាត់៣០ទៅ៤០សម និងប្រវែង៣ម៉ែត្រទៅ៣ម៉ែត្រកន្លះគោលដៅទៅលក់ក្នុងប្រទេសវៀតណាមតាមច្រកត្រពាំងស្រែ ត្រូវបានកម្លាំង មេព្រៃសង្កាត់ស្រុក ស្នួល សហការជាមួយកម្លាំង នគរបាលស្រុកឃាត់ចាប់បាន នៅចំនុចភូមិស្នួល ឃុំស្នួល ស្រុកស្នួល ខេត្តក្រចេះកាលពីវេលាម៉ោង៤នឹង៣០នាទីទៀបភ្លឺ ថ្ងៃទី៧ ខែសីហា ឆ្នាំ២០១៧ ។
ប្រភពបានពិសមត្តកិច្ចអោយដឹងថា រថយន្តដឹកឈើខាងលើនេះគឺបានដឹកឈើចេញពីចំនុចស្ពាន កាកុត ឃុំសំបុក ស្រុកចិត្របុរី ដោយដឹកឆ្លងកាត់តាមផ្លូវជាតិលេខ៧ពីស្រុក សំបូរ ទៅស្រុក ស្នួល លោតឆ័ត្រ បំណងយកទៅលក់នៅប្រទេសវៀតណាម ។
រថយន្តដឹកឈើល្មើសច្បាប់ខាងលើនេះគឺជាកម្មសិទ្ធរបស់ស្ត្រីជើងខ្លាំងម្នាក់ឈ្មោះ មុំ ហៅ ចែម៉ាប់ ដែលមានប្តីឈ្មោះ ធី រស់នៅភូមិអន្តែងដូន សង្កាត់ក្រគរ ក្រុងក្រចេះ ដែលគេស្គាល់ថាជាឈ្មួញឈើរកស៊ីមានបានយូរឆ្នាំមកហើយ ព្រោះតែអំណាចមាន បងបងធ្វើការធំនៅក្នុងខេត្តក្រចេះ ។មិត្រឹមតែប៉ុណ្ណោះគាត់តែងតែជេរបញ្ចោ និងប្រើសម្តីមាក់ងាយមើលថោកមកលើសមត្ថកិច្ចរហូតនាពេលកន្លងមក ប៉ុន្តែថ្ងៃនេះត្រូវអស់លក្ខណ៍ ជាមួយមេព្រៃសង្កាត់ ស្នួលតែម្តង ។
លោក ឡាយ ធុច នាយសង្កាត់រដ្ឋបាលព្រៃឈើស្នួលបានបញ្ជាក់អោយដឹងថា ក្នុងការចាប់ឃាត់រថយន្តដឹកឈើល្មើសច្បាប់ខាងលើ គឺសមត្ថកិច្ចមិនបានឃាត់អ្នកបើកបរឬម្ចាស់ឈើបាននោះឡើយ ព្រោះថា ពួកគេបាន រត់គេចខ្លួនបាត់មុនពេលកម្លាំងចម្រុះមកដល់ ។
លោកបានបន្តទៀតថា ពេលនេះទាំងរថយន្ត និងឈើល្មើសច្បាប់ត្រូវបានកម្លាំងមន្ត្រីរដ្ខបាល ព្រៃឈើនាំមកកាន់ស្នាក់ការសង្កាត់រដ្ឋបាល ព្រៃឈើស្នួល ដើម្បីកសាងសំណុំរឿងចាត់ការតាមនីតិវិធី ។ ក្រោយពេលត្រួតពិនិត្យជាក់ស្តែងឃើញថា ឈើក្នុងរថយន្តមានចំនួន០៩ដុំ ហើយវាស់ឃើញបរិមាណជិត២ម៉ែត្រគូប ៕
