ខេត្តរតនគិរី ៖ ស្ពានឆ្លងអូរមួយកន្លែងដែលមានប្រវែង២២ម៉ែត្រហៅអូរប៉ប់ដែលមានទីតាំងស្ថិតក្នុងភូមិចំនួន២នៅតំបន់ដាច់ស្រយាលពីទីប្រជុំជនគឺភូមិខ្វែងនិងភូមិដធំ ឃុំយ៉ាទុងស្រុកអូរយ៉ាដាវ ខេត្តរតនគិរីត្រូវបានសាងសង់រួចរាល់ជាស្ថាពរជូនប្រជាពលរដ្ឋអោយប្រើប្រាស់ឆ្លងកាត់ទៅមកជាផ្លូវការណ៍។
នៅដើមសប្តាហ៍ទីមួយខែសីហានេះលោកវរសេនីយ៍ទោ ម៉ៅសាន់ អធិការនគរបាលស្រុកអូរយ៉ាដាវ បានដឹកនាំកម្លាំងនៅក្រោមឱវាទ និងកម្លាំងប៉ុស្តិ៍នគរបាលរដ្ឋបាលឃុំយ៉ាទុង ចុះពិនិត្យការស្ថាបនាសាងសង់ស្ពានលើកទី១ កន្លែងដែលបានសាងសង់ កាលពីថ្ងៃទី០៦ ខែ០៦ ឆ្នាំ២០១៧ កន្លងទៅ រហូតមកទល់និងចាប់ផ្តើមថ្ងៃទី០៣ ខែសីហា ឆ្នាំ២០១៧ ស្ពានមួយនេះ បានសាងសង់រួចរាល់ជាស្ថាពរហើយនិងធ្វើការប្រគល់ជូនដល់ប្រជាពលរដ្ឋទាំង២ភូមិខាងលើធ្វើចរាចរណ៍ជាផ្លូវការចាប់ពីថ្ងៃនេះតទៅ ។ ហើយស្ពានឆ្លងអូរមួយកន្លែងនេះសាងសង់ឡើងអំពីឈើដែលបណ្តោយប្រវែង២២ម៉ែត្រទទឹង៥,៥ម៉ែត្រដោយផ្តួចផ្តើមពីលោកវរសេនីយ៍ទោផ្ទាល់បានចំណាយទាំងកម្លាំងកាយ ចិត្តព្រមទាំងថវិការផ្ទាល់របស់លោកដែលមើលឃើញពីទុក្ខលំបាករបស់ប្រជាពលរដ្ឋទាំងពីរភូមិដើម្បីងាយស្រួលក្នុងការធ្វើដំណើរឆ្លងកាត់់ពេលយប់ព្រលប់ ។
លោកវរសេនីយ៍ទោម៉ៅ សាន់ អធិការនគរបាលស្រុកអូរយ៉ាដាវ បានអោយដឹងនៅថ្ងៃទី០៣ ខែសីហា ឆ្នាំ២០១៧នេះថា កាលពីខែឧសភា ឆ្នាំ២០១៧ កន្លងទៅនេះ លោកបានដឹកនាំកម្លាំងក្រោមឱវាទសហការជាមួយបងប្អូនជនជាតិដើមភាគតិចចុះធ្វើកំពង់ចម្លងមួយកន្លែងដោយធ្វើជាក្បួនអូសខ្សែកាបស្ថិតក្នុងភូមិសំ ឆ្លងអូរតាង និងចុះទៅជួសជុលស្ពាន ដែលសសរបាក់ចំនួន២ដើមទៀតស្ថិតក្នុងភូមិប៉ាដល ឃុំសេសាន្ត ដោយយកសសរ២ដើមទៅផ្លាស់ប្តូរដើម្បីសម្រួលដល់ការឆ្លងកាត់របស់ប្រជាពលរដ្ឋនៅតំបន់នោះ៕
ដោយ ៖ ចាបសំអាន