ព្រៃវែង ៖ រឿងអនុប្រធានគុកខេត្តព្រៃវែងឃុបឃឺតពុករលួយដោយអនុញ្ញាតឲ្យទណ្ឌិតប្រើប្រាស់ទូរស័ព្ទស្មាតហ្វូន និងកុំព្យូទ័រគំរាម ទារប្រាក់តាមបណ្តាញសង្គមហ្វេសប៊ុកមិនទាន់បានដោះស្រាយចប់ផង ឥឡូវនេះគុកព្រៃវែងធ្លាយរឿងអាស្រូងមួយថ្មីទៀតហើយ។តាមរយៈបណ្តាញសង្គមហ្វេសប៊ុកមួយឈ្មោះ លីនី សម័យតេជោ បានឲ្យដឹងថា មន្ត្រី ពន្ធនាគារខេត្តព្រៃវែងបានយកកៅអីវាយក្បាលអ្នកទោសបណ្តាលឲ្យរងរបួសដេរអស់ជាច្រើនថ្នេរ។
មានគណនីឈ្មោះ លីនី សម័យតេជោ កាលពីព្រឹក ថ្ងៃទី៣១ ខែកក្កដា ឆ្នាំ២០១៧ បង្ហោះផ្សាយរឿងមួយមានចំណងជើងថា “មន្ត្រីប៉ូលីសក្នុងពន្ធនាគារខេត្តព្រៃវែង បានប្រើហិង្សាលើអ្នកទោសយ៉ាងសាហាវ” ដោយបានរៀបរាប់ត្រួសៗថា លោកវរៈសេនីយឯក ឃា ផា ប្រធានការិយាល័យប្រតិបត្តិ បានយកកៅអីវាយលើទណ្ឌិតឈ្មោះ អ៊ួន ចាន់រឿន បណ្ដាលឲ្យបែកក្បាលប្រវែង ២សង់ទីម៉ែត្រ នៅគ្រាដែលទណ្ឌិត និងទណ្ឌិត ក្នុងពន្ធនាគារខេត្តព្រៃវែងនោះ ឈ្លោះប្រកែកគ្នា ។ តែករណីនេះ លោក ជួប សារីម ប្រធានពន្ធនាគារខេត្តព្រៃវែង បានបដិសេធ ។លោកមេគុកនិយាយថា រឿងចោទថា កូនចៅលោកវាយអ្នកទោសនោះគ្មានទេ គឺអ្នកទោស វាយគ្នាទៅវិញទៅមក ហើយកូនចៅលោកចូលទៅជួយឃាត់តែប៉ុណោះ។ លោកនឹងកោះហៅមន្ត្រីរបស់លោកមកសួរនាំ ពីបញ្ហានេះ ដើម្បីធ្វើរបាយការណ៍ជូនទៅខេត្ត។
ដោយឡែក លោកឧត្តមសេនីយត្រី សន កែវ អ្នកនាំពាក្យអគ្គនាយកដ្ឋានពន្ធនាគារ នៃក្រសួងមហាផ្ទៃបានថ្លែងបញ្ជាក់តាម Telegram ថា ចំពោះករណី ដែលផ្សាយមន្ត្រីពន្ធនាគារខេត្តព្រៃវែង ឈ្មោះ ឃា ផា បានវាយទណ្ឌិតបែកក្បាលនោះ បើយោងតាមរបាយការណ៍បឋមឲ្យដឹងថា ជារឿងមិនពិត។ លោកថា ករណីនេះ គឺជាវាយតប់គ្នារវាងជនជាប់ឃុំ និងជនជាប់ឃុំតែប៉ុណ្ណោះ ប៉ុន្តែនៅពេលដែលមន្ត្រីពន្ធនាគារ ចូលទៅឃាត់ក៏បណ្តាលឲ្យកៅអីប៉ះត្រូវជនជាប់ឃុំរូបនេះ បណ្តាលឲ្យរបួសនៅចុងចិញ្ចើមបន្តិច។
ក្រោយពីបង្ហោះពតិមាននោះបានបន្តិច គណនីហ្វេសប៊ុកឈ្មោះ លីនី សម័យតេជោ បានលុបចោលនៅអត្ថបទរបស់ខ្លួនវិញតែបាន សសេរបញ្ជាក់ចុងក្រោយយ៉ាងដូច្នេះថា “នាងខ្ញុំលុបអត្ថបទអំពីអំពើហឹង្សាលើអ្នកទោស ក្នុងពន្ធនាគារខេត្តព្រៃវែង ដោយសារតែមានការខល មកសំណូមពរក៏ប៉ុន្តែនាងខ្ញុំនឹងផុសម្តងទៀត ដរាបណា មានអំពើហឹង្សាទៅលើទណ្ឌិត” ។ សូមបញ្ជាក់ថា ករណីអនុប្រធានគុកព្រៃវែងឈ្មោះ អ៊ុំ រ៉ាយឿង ឃុបឃឹតប្រព្រឹត្តអំពើពុករលួយជាមួយ ទណ្ឌិតម្នាក់ឈ្មោះ យ៉ែម ប្រុស កំពុងជាប់ពន្ធនាគារ នៅខេត្តព្រៃវែង ពាក់ព័ន្ធនឹងបទល្មើសប្លន់ ចំនួន៨លើកមានទោសចំនួន១០ឆ្នាំត្រូវបានស្រាវជ្រាវឃើញដោយស្នងការនគរបាលខេត្តកណ្តាលលោកអ៊ាវចំរើន។
បើតាមលោកអ៊ាវចំរើន បានឲ្យដឹងថា ទណ្ឌិតរូបនេះត្រូវបានសមត្ថកិច្ចចាប់ខ្លួន តាំងពីឆ្នាំ២០១០មកម្ល៉េះ ពាក់ព័ន្ធករណីប្លន់៧លើក នៅខេត្តកំពត និងមួយលើកនៅខេត្តតាកែវ ហើយត្រូវបានតុលាការខេត្តកំពត សម្រេចដាក់ពន្ធនាគារ១០ឆ្នាំ ប៉ុន្ដែក្រោយជាប់ពន្ធនាគារបានជាង១ឆ្នាំ ទណ្ឌិតរូបនេះ បានរត់ការផ្ទេរមកកាន់ពន្ធនាគារខេត្តព្រៃវែង ហើយឃុបឃិតជាមួយអនុប្រធានពន្ធនាគារម្នាក់ឈ្មោះ អ៊ុំ រ៉ាយឿង រហូតរូបគេអាចមានកុំព្យូទ័រឡេបថបមួយគ្រឿង និងទូរស័ព្ទ៣គ្រឿង ប្រើលេខ៤ខ្សែ ដើម្បីបោកបញ្ឆោត នារីរងគ្រោះតាម Facebook និងតាមកម្មវិធីផ្ញើសារ Line ទៀតផង។
ពេលខ្លះទណ្ឌិតរូបនេះ អាចចេញពីពន្ធនាគារ ទៅខាងក្រៅដោយសារតែមានដៃជើងរបស់ខ្លួន ជាអនុប្រធានពន្ធនាគារ និងមន្ដ្រីពន្ធនាគារផង។ករណីនេះលោកឧត្តមសេនីយ៍នុតសវនាអ្នកនាំពាក្យអគ្គនាយកដ្ឋានពន្ធនាគារបានប្រាប់កាសែតថាអ្នកប្រព្រឹត្តខុសត្រូវមានទោសតែមកដល់ពេលនេះគឺស្ងាត់ឈឹង!៕
