ភ្នំពេញ៖ លោកនាយឧត្តមសេនីយ៍ ទៀ បាញ់ឧបនាយករដ្ឋមន្ត្រីរដ្ឋមន្ត្រីការពារជាតិទទួលបានគោរមងារថ្មីមួយទៀតឈ្មោះថា៖“សម្ដេចពិជ័យសេនា”ពីព្រះមហាមហាក្សត្រព្រះបរមនាថនរោត្តមសីហមុនី។នេះបើតាមព្ររាជក្រឹត្យរាជក្រឹត្យចុះថ្ងៃទី២៩ ខែកក្កដានេះ។ ក្នុងព្រះរាជក្រឹត្យ ព្រះករុណាព្រះមហាក្សត្រ សម្តេចព្រះបរមនាថ នរោត្តម សីហមុនី បាន លើកឡើងថា សម្តេច ទៀ បាញ់ ជាអ្នកដឹកនាំដ៏ឆ្នើម ជាទីគោរពស្រឡាញ់របស់ប្រជារាស្ត្រ បានចូលរួមជួយដឹកនាំប្រជាជាតិកម្ពុជា តាមរដ្ឋធម្មនុញ្ញ នៃព្រះរាជាណាចក្រកម្ពុជា ឆ្នាំ១៩៩៣ បានចូលរួមកសាងប្រព័ន្ធច្បាប់សម្រាប់ប្រើប្រាស់ជាឧត្តមប្រយោជន៍ដល់សង្គមជាតិ ទទួលបាននូវសន្តិភាព ស្ថិរភាព ឯកភាពជាតិ ការអភិវឌ្ឍជាតិលើគ្រប់វិស័យ ការពារលទ្ធិប្រជាធិបតេយ្យ ការពារជាតិ មានស្ថិរភាព សន្តិសុខសង្គមបានល្អប្រសើរ និងមានកិច្ចសហប្រតិបត្តិការអន្តរជាតិ ព្រមទាំងរក្សាបាននូវឯករាជ្យជាតិ និងបូរណភាពទឹកដី ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា។
សម្តេច ទៀ បាញ់ ជាអ្នកដឹកនាំដ៏ឆ្នើម ជាទីគោរពស្រឡាញ់របស់ប្រជារាស្ត្រ មានស្វាមីភក្តិចំពោះរាជបល្ល័ង្គ ការពារ និងគោរពព្រះពុទ្ធសាសនាចូលរួមការពារនិរន្តរភាពរាជានិយមនៃព្រះរាជាណាចក្រកម្ពុជា ។ យោងតាមការប្រទានរបស់ព្រះមហាក្សត្រនាពេលកន្លងមកនិងបច្ចុប្បន្នព្រះរាជាណាចក្រកម្ពុជាទី២ នៃយើងមានមានថ្នាក់ដឹកនាំជាសម្តេចចំនួយ៨រូបហើយ។លោកនាយឧត្តមសេនិយ៍ ទៀ បាញ់ គឺជាមេដឹកនាំជាន់ខ្ពស់ទី៩ មកពីគណបក្សប្រជាជនកម្ពុជា ដែលត្រូវបានផ្ដល់គោរមងារជា “សម្ដេច” បន្ទាប់ពីសម្តេចធម្មពោធិសាល ជា ស៊ីម សម្តេចចក្រី ហេង សំរិន សម្តេចអគ្គមហាសេនាតេជោ ហ៊ុន សែន សម្តេចក្រឡាហោម ស ខេង សម្តេចវិបុលសេនាភក្តី សាយ ឈុំ សម្តេចជហ្វាវាំង គង់ សំអុល សម្តេចកិត្តិព្រឹទ្ធបណ្ឌឹតប៊ុនរ៉ានីហ៊ុនសែននិងសម្តេចវិបុលបញ្ញ សុខ អាន។
ដូចគ្នាទៅនឹងព្រះរាជក្រឹត្យតែងតាំងគោរមងារសម្តេចវិបុលសេនាជូនឯកឧត្តម សុខ អាន ដែរ ព្រះរាជក្រឹត្យតែងតាំងគោរមងារដល់លោកនាយឧត្តមសេនីយ៍ ទៀ បាញ់ ពុំបានបញ្ជាក់ថា ត្រូវបានធ្វើឡើងនៅទីណានោះទេ ខណៈដែលព្រះមហាក្សត្រ សម្ដេចព្រះបាទ នរោត្ដម សីហមុនី កំពុងស្ថិតនៅក្នុងប្រទេសចិន ដើម្បីពិនិត្យ និងព្យាបាលព្រះរាជសុខភាព។
បន្ទាប់ពីព្រះរាជក្រឹត្យប្រទានគោរមងារជូនលោកនាយឧត្តមសេនីយ៍ទៀបាញ់ ជាសម្តេចមកសម្តេចអគ្គមហាសេនាបតីតេជោហ៊ុនសែនជានាយករដ្ឋមន្ត្រីនៃព្ររាជាណាចកក្រកម្ពុជាក៏ចេញលិខិតអបអរសាទរនិងជូនពរ“សម្ដេចពិជ័យសេនា”ទៀ បាញ់ភ្លាមដែរ ។ ក្រៅពីនោះរដ្ឋមន្ត្រីមេទព័និងនគរបាលចៅហ្វាយខេត្តក៏ប្រញ៉ាប់ប្រញាល់ទិញគេហទំពរ័Fresh News បង្ហោះសារជូនពរសម្តេចទៀបាញ់ផងដែរ។
ជីវប្រវត្តិ៖
សៀវភៅ “ជនដែលត្រូវគេបាញ់” បានបង្ហាញថា កើតនៅថ្ងៃទី៥ ខែវិច្ឆិកា ឆ្នាំ១៩៤៥ សម្តេច ទៀ បាញ់ មានឈ្មោះពិតពីកំណើត “ទៀ សង្វាន” កើតនៅភូមិកោះស្រឡៅ ឃុំកាពិ ស្រុកកោះកុង ខេត្តកោះកុង។ ទៀ សង្វាន ជាកូនកសិករក្រីក្របំផុត ដែលមានឪពុកឈ្មោះ ទៀ តិក មុខរបរធ្វើស្រែ និងកាប់អុសលក់ ម្តាយឈ្មោះ នូ ផេងចិន្តា មុខរបរកសិករ មានបងប្អូនបង្កើត ៥នាក់។
ដោយសារតែលោកឪពុក មានជំងឺហើយបានអនិច្ចកម្ម នាំឲ្យ ទៀ សង្វាន ដែលកាលណោះ មានអាយុទើបតែ ១១ ឆ្នាំ បានក្លាយជាអ្នកស៊ីឈ្នួលឡើងបេះផ្លែស្លាឲ្យអ្នកភូមិ និងរកត្រី ដើម្បីផ្គត់ផ្គង់គ្រួសារ។
នៅឆ្នាំ១៩៥៧ ទៀ សង្វាន ត្រូវបានម្តាយបញ្ជូនឲ្យទៅនៅវត្ត។ រហូតដល់ឆ្នាំ១៩៦០ សង្វាន ( ទៀ បាញ់ ) មានអាយុ ១៥ ឆ្នាំ ពេលត្រឡប់មកផ្ទះឃើញមនុស្ស ៦ ទៅ ៧នាក់ នៅមុខផ្ទះគេ។ ពួកគេទាំងនោះ ជាប៉ូលិស និងជីវពលភូមិ មកសំឡុតគំរាមម្តាយ សង្វាន ឲ្យប្រគល់ប្អូនស្រីរបស់គេ ដែលទើបមានអាយុ ១៣ ឆ្នាំ ដើម្បីយកទៅជូនលោកកុម្មុយសៀ ប៉ូលិស សម្រាប់សប្បាយខាងផ្លូវតណ្ហា។ សង្វាន ប្រកែកតវ៉ា និងគំរាមពួកទាំងនោះ មិនឲ្យយកប្អូនស្រីគេទៅទេដាច់ខាត ទោះគេប្តូរជីវិតក៏ដោយ ក៏ពុំឲ្យពួកទាំងនោះ ធ្វើបាបប្អូនស្រីគេដែរ។
ដោយការជិះជាន់ ទើប ទៀ សង្វាន ចេញធ្វើការតស៊ូ គឺនៅឆ្នាំ១៩៦១ ដោយទាក់ទងជាមួយចលនាតស៊ូក្នុងព្រៃ រហូតដល់ត្រូវអាជ្ញាធរចាប់ធ្វើទារុណកម្ម និងឃុំឃាំង។ នៅថ្ងៃទី១០ ខែកក្កដា ឆ្នាំ១៩៦៥ គេដោះលែង សង្វាន ពីគុកដោយថ្នូរនឹងប្រាក់ ៥ពាន់រៀល ដែលបានពីការលក់ក្របី និងខ្សែកប្អូនស្រី ដែលទៅស៊ីឈ្នួលមើលកូនឲ្យថៅកែឡធ្យូង យកទៅឲ្យអាជ្ញាធរ។
មកដល់ថ្ងៃទី១៧ ខែកក្កដា ឆ្នាំ១៩៦៥ ក្រោយពីរួចខ្លួនបាន ៧ថ្ងៃ ក្រុមជីវពល ៥នាក់ និងប៉ូលិស ២នាក់ បានមកតាមចាប់សង្វាន និងមនុស្សម្នាក់ទៀត ឈ្មោះ តា កៅ។ ពួកគេបានចាប់អ្នកទាំងពីរ ចងដៃ បណ្តើរយកទៅបាញ់ចោល នៅជើងភ្នំកោះអណ្តែត។ ក៏ប៉ុន្តែចៃដន្យ យុវជន សង្វាន មិនស្លាប់ ហើយបានរត់ចូលព្រៃ រួចខ្លួន។ចាប់ពីពេលនោះមក ស្ថានភាពទាំងនោះ បានជំរុញឲ្យយុវជន សង្វាន ធ្វើចលនាតស៊ូ ក្នុងព្រៃជាបន្តបន្ទាប់ និងក្លាយជាមេទ័ពដ៏ខ្លាំងពូកែ ដឹកនាំទ័ពវាយប្រឆាំងសត្រូវ នៅតំបន់ខេត្តកោះកុង តាំងពីថ្ងៃទី១៧ ខែកក្កដា ឆ្នាំ១៩៦៥ រហូតចូលរួមសកម្មភាពរំដោះប្រទេស ខែមករា ឆ្នាំ១៩៧៩ ពីរបបប្រល័យពូជសាសន៍ ប៉ុល ពត។
នៅចន្លោះឆ្នាំពីការធ្វើចលនាតស៊ូដ៏ស្វិតស្វាញនោះ មនុស្សជាច្រើនក្នុងភូមិ និងក្រុមអ្នកតស៊ូ បានហៅឈ្មោះលោកពី ទៀ សង្វាន ទៅជាឈ្មោះ ទៀ បាញ់ ដោយលួចលាក់ ហើយឈ្មោះនេះ បានត្រូវប្រើរហូតមកដល់សព្វថ្ងៃ។
ឯកសារបង្ហាញថា ទៀ សង្វាន បានរៀបការជាមួយភរិយា ឈ្មោះ តៅ តឿន នៅភូមិគិរីវង្ស នាថ្ងៃទី៤ ខែមេសា ឆ្នាំ១៩៧៥ នៅក្នុងព្រៃ ក្រោមការប្រកាសជាផ្លូវការរបស់លោក សាយ ភូថង ដែលត្រូវជាចាស់ទុំ និងឪពុកមារបស់សម្តេចទៀបាញ់ផង។ សម្តេចទៀបាញ់ មានកូនពីរនាក់ គឺកូនច្បងទី១ ឈ្មោះ ទៀ ស្យាម និងកូនប្រុសទី២ ឈ្មោះ ទៀ ទីហាជាអីភិបាលរងខេត្តសៀមរាប។ក្រៅពីនេះប្អូនប្រុសបង្កើតរបស់សម្តេចទៀបាញ់គឺលោកនាយឧត្តមសេនីយ៍ទៀវិញជាអគ្គមេបញ្ជាររងកងទព័និងជាមេបញ្ជាការកងទព័ជើងទឹកដែលមានកូនប្រុសម្នាក់ជាអនុបញ្ជាការមានថានន្តរសក្តិឧត្តមសេនីយ៍ឯកផងដែរ៕
