ខេត្តរតនគិរី៖ នាព្រឹកថ្ងៃទី២៧ ខែកក្កដា ឆ្នាំ២០១៧ នៅសាលប្រជុំសាលាខេត្តរតនគិរីបានរៀបចំកិច្ចប្រជុំរៀបចំបូកសរុបលទ្ធផលស្តីពីការអនុវត្តច្បាប់អោយបានជោគជ័យនូវគោលនយោបាយជាតិសុវត្តិភាពចរាចរណ៍ផ្លូវគោក។ ក្រោមអធិបតីភាពលោកយឹម ផែន អភិបាលរងខេត្តស្តីទី និងមានការចូលរួមពីលោកប្រធាន អនុប្រធានគ្រប់មន្ទីរ អង្គភាពជុំវិញខេត្តក្នុងនោះយុវជនកាកបាទក្រហម សិស្សានុសិស្ស និងមន្ត្រីរាជការក្រុង ស្រុកទាំង៩ ផងដែរ។
លោក ស៊ុន ប៉ូលិន ប្រធានមន្ទីរសាធារណការនិងដឹកជញ្ជូនបានឡើងអានរបាយការណ៍បូកសរុបលទ្ធផលការងារសម្រាប់ឆមាសទី១ ឆ្នាំ២០១៧ និងលើកទិសដៅការងារសម្រាប់ឆមាសទី២ឆ្នាំ២០១៨ ដើម្បីអនុវត្តអោយបានជោគជ័យនូវគោលនយោបាយជាតិសុត្ថិភាពចរាចរផ្លូវគោក ដើម្បីចូលរួមនៃការអនុវត្តកម្មវិធីនយោបាយនិងយុត្តិសាស្ត្រចតុកោណដំណាក់កាលទី៣ របស់រាជរដ្ឋាភិបាលអោយបានទទួលលទ្ធផលកាន់តែត្រចះត្រចង់ថែមទៀត ។
លោកយឹម ផែន អភិបាលរងខេត្តស្តីទីក៏បានសំដែងការផ្តាំផ្ញើរដល់កងកម្លាំងប្រដាប់អាវុធស្របតាមគោលនយោបាយរបស់អគ្គស្នងការចរាចរផ្លូវគោក(អ.គ.ស.ច.គ.រគ) អោយយកចិត្តទុកដាក់ដឹកនាំកិច្ចការជាច្រើនរួមមាន៖ ការរៀបចំលិខិតបទដ្ឋានដើម្បីបំពេញបន្ថែមនិងការរៀបចំយន្តការអនុវត្តការជម្រុញសកម្មភាពផ្សព្វផ្សាយច្បាប់ព្រមទាំងវិធានការត្រួតពិនិត្យដើម្បីរឹតបន្តឹងការអនុវត្តច្បាប់ចរាចរណ៍ផ្លូវគោកដើម្បីកាត់បន្ថយចំនួនគ្រោះថ្នាក់ដល់អាយុជីវិតនិងរបួសស្នាមដល់ប្រជាពលរដ្ឋក៏ដូចជាមហន្តរាយនានាដែលបង្កឡើងដោយគ្រោះថ្នាក់ចរាចរ។
លោកអភិបាលរងខេត្តបញ្ជាក់ថា៖ កាត់បន្ថយកុងត្រូលជជុះដោយសុំអោយកម្លាំងទាំងអស់អោយយល់ច្បាស់ពីជញ្ជីង និងការត្រួតពិនិត្យចរាចរផ្លូវគោក លោកបន្ថែមថា ក្នុងខេត្តរតនគិរីជញ្ជីងសម្រាប់ថ្លឹងរថយន្តមានមួយកន្លែង ក្នុងផ្លូវជាតិលេខ៧៨គឺស្ថិតនៅក្នុងស្រុកកូនមុំ ពុំមានជញ្ជីចល័តនោះទេ។ ចំណែកកុងត្រូលត្រួតពិនិត្យសុវត្ថិភាពផ្លូវគោកមានពីរកន្លែង៖ទី១ក្នុងក្រុងបានលុង ទី២ស្ថិតក្នុងស្រុកអូរយ៉ាដាវ ៕
ដោយ៖ចាបសំអាន
