លោកយាយ ញឹម ហេង ហៅយាយទ្រព្យអាយុ ៨៨ អតីតជាម្ចាស់ភូមិគ្រឹះលេខ ៣១ ដែលរដ្ឋយកធ្វើជា សាលាសង្កាត់ទឹកថ្លា បច្ចុប្បន្នបានធ្លាក់ខ្លួនឈឺជាទម្ងន់សម្រាកព្យាបាលនៅក្នុងខ្ទមដ៏កម្សត់របស់ខ្លួន ស្ថិតនៅភូមិបុរី ១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ ក្បែរទីស្នាក់ការសមាគមន៍ក្រុមគ្រួសារស្ម័ក្ក របស់សហភាព សហព័ន្ធយុវជនខ្មែរ និងទីស្នាក់ការសាលាសង្កាត់ទឹកថ្លាតែម្តង ។
កាលពីរសៀលថ្ងៃទី ១៦ ខែមីនា កន្លងទៅលោកស្រី សុង សាវី អាជីវករនៅផ្សារអូឡាំពិក បាននាំយកនូវ អំណោយមួយចំនួនរួមមាន ៖ អង្ករចំនួន ២បាវតូច, ទឹកស៊ីអ៊ីវ ២យួរ, ទឹកដោះគោឆៅ ២យួរ, ត្រីខកំប៉ុង ចំនួន មួយ យួរ និងថវិកាចំនួន ៣០ដុល្លារ និងលោកអនុសេនីយ៍ឯក សួន បូរ៉ា បានចូលរួមចំណែកមីចំនួន ២កេស និងថវិកាចំនួន ១០ម៉ឺនរៀល យកទៅជូនលោកយាយ ញឹម ហេង ដែលសម្រាកព្យាបាលនៅផ្ទះដោយគ្មានលុយ សម្រាប់ទៅ ព្យាបាលនៅមន្ទីរពេទ្យ ។
លោកស្រី សុង សាវី បានមានប្រសាសន៍ថា លោកស្រីបានអាននូវគេហទំព័រព័ត៌មានមួយសរសេរពីជីវិត លំបាកវេទនារបស់លោកយាយ ញឹម ហេង ដែលខ្វះខាតទាំងអាហារហូបចុកក៏ដូចជា ថ្លៃព្យាបាលជំងឺ ទើបលោកស្រី ទំនាក់ទំនងមកលេខទូរស័ព្ទចាងហ្វាងកាសែតនោះ ដើម្បីយកអំណោយទៅជូនលោកយាយ នៅពេលនេះ ។
លោកអនុសេនីយ៍ឯក សួន បូរ៉ា ចំណែករូបលោកបានចូលទៅទិញ សម្ភារៈពីតូបរបស់លោកស្រី សុង សាវី ហើយលោកស្រីក៏បានបង្ហើបពីស្ថានភាពរបស់លោកយាយ ញឹម ហេង ក៏សម្រេចចិត្តទិញមីចំនួន ២កេស និងចែក រំលែកនូវថវិកាបន្តិចបន្តួចដែលលោកមានចូលរួមជាមួយលោកស្រី សុង សាវី នៅថ្ងៃនេះដែរទៅ ព្រោះឃើញស្ថាន ភាពរប់លោកយាយយ៉ាប់ពេក ។ លោកអនុសេនីយ៍ឯក សួន បូរ៉ា បន្តថា បើអាជ្ញាធរគេមិនយកចិត្តទុកដាក់ជួយ លោកយាយ លោកនិងសាកល្បងទំនាក់ទំនងទៅមន្ទីរពេទ្យព្រះកេតុមាលា (ពេទ្យ ១៧៩)ដើម្បីយកលោកយាយ ទៅព្យាបាល ព្រោះរូបលោកក៏មិនមែនជាអ្នកធូរធាណាស់ណានោះទេ ។
លោក ញឹម ម៉ែន អាយុ ៦៧ឆ្នាំ ត្រូវជាកូនប្រុសតែម្នាក់គត់របស់លោកយាយ ញឹម ហេង ហៅយាយទ្រព្យ បានរៀបរាប់ទាំងអួលដើមកប្រាប់ក្រុមអ្នកយកព័ត៌មានថា ក្រោយថ្ងៃរំដោះ ៧មករា ឆ្នាំ ១៩៧៩ រូបលោក និង ម្តាយ គឺលោកយាយ ញឹម ហេង ហៅយាយទ្រព្យ បានចូលមករស់នៅក្នុងភូមិគ្រឹះលេខ ៣១ ដែលគេយកធ្វើជា ទីស្នាក់ការសាលាសង្កាត់ទឹកថ្លា រាល់ថ្ងៃ ។ លុះដល់ឆ្នាំ ១៩៨៥ ម្តាយគាត់បានចែកផ្លូវជាមួយលោក គុយ ថន (ហៅតាវ៉ាន់)ដែលជាប្តីក្រោយរបស់គាត់ ។ ដល់ឆ្នាំ ១៩៨៩ រដ្ឋបានឱ្យម្តាយរបស់ខ្ញុំដាក់ពាក្យស្នើសុំកាន់កាប់ដី និងផ្ទះលេខ ៣១ ដែលគេយកធ្វើសាលាសង្កាត់នោះ ។ ក្រោយមកក្នុងកំឡុងឆ្នាំ ១៩៩០-១៩៩១ រដ្ឋធ្វើការលក់ សាលាឃុំទឹកថ្លា ដែលមានទីតាំង នៅជាប់ផ្លូវសហព័ន្ធរុស្ស៊ី ឱ្យទៅក្រុមហ៊ុនតូយ៉ូតា ហើយក៏បានមកសុំយកភូមិគ្រឹះ របស់ម្តាយលោក ធ្វើជាសាលា សង្កាត់វិញ ដោយគេប្តូរឱ្យម្តាយលោក និងរូបលោកមករស់នៅលើដីរបស់ទីស្នាក់ ការភូមិ ១០០ខ្នងនេះ ដោយលោក តាន់ ណាវិន សន្យាថា និងធ្វើប្លង់កម្មសិទ្ធិឱ្យ។
លោក ញឹម ម៉ែន បន្តថា នៅក្នុង ឆ្នាំ២០០៣-២០០៤ រដ្ឋបានប្រកាសឱ្យធ្វើប័ណ្ណកម្មសិទ្ធិលក្ខណៈជាប្រព័ន្ធ ពេលនោះ ម្តាយរបស់គាត់ គឺ(លោក យាយ ញឹម ហេង ហៅយាយទ្រព្យ)បានប្រមូលយកឯកសារពាក់ព័ន្ធទាំងអស់ យកទៅប្រគល់ជូនលោក ហាក់ ប៉ែត អតីតប្រធានភូមិ បុរី ១០០ខ្នង ដើម្បីឱ្យគាត់ជួយបំពេញ ឯកសារធ្វើពាក្យស្នើ សុំធ្វើប័ណ្ណកម្មសិទ្ធិដី ។ ប៉ុន្តែលោក ហាក់ ប៉ែត មិនបានយកឯកសារទាំងនោះទៅបំពេញពាក្យស្នើសុំចុះបញ្ជីសុរិយោ ដីនោះទេ បែរជាយកទៅលាក់ទុក បាត់ឈឹងរហូត ទើបម្តាយរបស់គាត់ទៅជម្រាបលោក តាន់ ណាវិន ចៅសង្កាត់ទឹក ថ្លា ។ ស្រាប់តែមកដល់ថ្ងៃទី ១៥ ខែធ្នូ ឆ្នាំ២០០៤ វេលាម៉ោង ៨ និង៣០នាទីយប់ លោក ហាក់ ប៉ែត ប្រធានភូមិ បុរី ១០០ខ្នង បាននាំគ្នាចំនួន ៨-៩នាក់ ចូលមកក្នុងផ្ទះរបស់គាត់ដោយមានកាន់កាំភ្លើង AK ចំនួន ៤ដើម ហើយលោក ហាក់ ប៉ែត បានស្រែកហៅ រកឈ្មោះ ម្តាយរបស់ខ្ញុំ (ម្តាយលោក ញឹម ម៉ែន)ថា យាយកញ្ចាស់ទ្រព្យៗ ចេញមកអញនិងបាញ់យាយកញ្ចាស់ ឯងឱ្យងាប់ហើយ យកកាំភ្លើងបុកទ្វារផ្ទះក្ឌាំងៗពេលនោះម្តាយខ្ញុំ និងខ្ញុំបានលូន ចេញតាមប្រហោងជញ្ជាំងខាង ក្រោយផ្ទះ ដើម្បីគេចខ្លួនចូលទៅក្នុងផ្ទះអ្នកជិតខាងឈ្មោះ ស៊ឹម ទូច ។
លុះព្រឹកឡើងម្តាយខ្ញុំ បានទៅប្តឹងនៅប៉ុស្តិ៍នគរបាលរដ្ឋបាលសង្កាត់ទឹកថ្លា ប៉ុន្តែបានត្រឹមតែហៅមកសម្រប សម្រួលប៉ុណ្ណោះ មិនមានចំណាត់ការអ្វីទេ ។ ទើបនៅថ្ងៃទី ២៤ ខែធ្នូ ឆ្នាំ២០០៤ ម្តាយខ្ញុំបានដាក់ពាក្យបណ្តឹងចូល ទៅនាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃ ទើបលោក ហាក់ ប៉ែត រត់គេចខ្លួនរហូតឥឡូវនេះ ។
យោងតាមចម្លើយសាក្សីទី២-ឈ្មោះ ឡុង សុវណ្ណ ដែលបានទៅឆ្លើយនៅនាយកដ្ឋានកណ្តាលនគរបាលយុត្តិ ធម៌ក្រសួងមហាផ្ទៃ កាលពីថ្ងៃទី ២៤ ខែធ្នូ ឆ្នាំ២០០៤ ថា ខ្ញុំជាកម្មករធ្វើរបងនៅក្រោយផ្ទះរបស់លោកយាយ ឈ្មោះ ហេង ហៅទ្រព្យ ដោយបានសម្រាកនៅទីនោះ លុះដល់ម៉ោងប្រហែល ៨ជាងយប់ នៅថ្ងៃទី ១៥ ខែធ្នូ ឆ្នាំ២០០៤ ស្រាប់តែមានក្រុមប្រដាប់ដោយកាំភ្លើង AK ប្រហែល ៨ ទៅ ៩នាក់ បានចូលផ្ទះលោកយាយ ហេង ហៅទ្រព្យ ក្នុងពេលនោះ ពួកគេបានស្រែកសំឡុតថា យាយកញ្ចាស់ចេញមកអញ និងបាញ់សម្លាប់ចោល ដោយខ្ញុំ ឮសូរធាក់ទ្វារក្ឌាំងៗប្រហែលមួយសន្ទុះពួកគេចូលទៅក្នុងផ្ទះរកយាយហេង ប៉ុន្តែមិនឃើញដោយលោកយាយ បាន ចេញតាមទ្វារក្រោយទៅពួននៅក្នុងផ្ទះអ្នកជិតខាង ។
លោកយាយ ញឹម ម៉ែន បានបញ្ជាក់បន្ថែមថា ក្រោយពេលលោក ហាក់ ប៉ែត បានរត់គេចខ្លួនបាត់ ម្តាយ របស់គាត់បានព្យាយាមសុំលោកតាន់ ណាវិន ចៅសង្កាត់ទឹកថ្លា ដើម្បីធ្វើប័ណ្ណកម្មសិទ្ធិដីដែរ ប៉ុន្តែមិនបាន សម្រេច ទើបនៅថ្ងៃទី ០៣ ខែមេសា ឆ្នាំ២០០៥ ម្តាយរបស់លោកបានដាក់ពាក្យស្នើសុំជួយអន្តរាគមន៍ទៅលោក អភិបាល ខណ្ឌប្ញស្សីកែវ ហើយលោក ឃ្លាំង ហួត ក៏បានចារជូនលោកចៅសង្កាត់ពិនិត្យមើលករណីដូចពាក្យស្នើសុំ គួរសម្រួល ជូន ប៉ុន្តែត្រូវបានលោក គង់ ទិទ្ធា អតីតអភិបាលរងខណ្ឌប្ញស្សីកែវ ចារតបមកវិញថា ដីនេះជាបញ្ជីសារពើភ័ណ្ឌ របស់រដ្ឋ ។
ករណីនេះ ត្រូវបានប្រជាពលរដ្ឋរស់នៅក្បែរខាងរបស់លោកយាយ ញឹម ហេង ឆ្ងល់ថា បើដីនេះជាបញ្ជីសារ ពើភ័ណ្ឌ របស់រដ្ឋ ចុះភូមិគ្រឹះដ៏ធំស្កឹមស្កៃរបស់លោកយាយ ដែលគេយកធ្វើជាសាលាសង្កាត់ទឹកថ្លា រាល់ថ្ងៃជារបស់ អ្នកណាទៅវិញ ។ ប្រជាពលរដ្ឋបានលើកឡើងថា បើមិនធ្វើប័ណ្ណកម្មសិទ្ធិឱ្យគាត់ក៏ហីទៅចុះ បែរជាមិនឱ្យគាត់លក់ ដូរថែមទៀត ! ប៉ុណ្ណឹងហើយនៅតែមិនគ្រប់គ្រាន់ទៀត ថែមទាំងនាំគ្នាបិទបាំងលាក់មិនឱ្យអង្គការ ឬសប្បុរសជន ដឹងរឿងលោកយាយទ្រព្យ លំបាកវេទនាទៀត ។
ដោយឡែក លោកយាយ ញឹម ហេង បានលើកដៃសំពះក្រុមអ្នកសារព័ត៌មានហើយមានប្រសាសន៍ទាំងទឹក ភ្នែកថា សូមកុំឱ្យអស់លោកឈឺដូចខ្ញុំ ឈឺត្រឹមតែរាង្គកាយមិនប៉ុន្មានទេ នេះឈឺទាំងចិត្តពេញមួយជីវិត ផ្ទះក៏គេយក ដីក៏គេមិនឱ្យ គេទុកខ្ញុំស្លាប់នៅទីនេះហើយ សូមអស់លោកជួយខ្ញុំទៅជម្រាបសម្តេច ហ៊ុន សែន ឱ្យជួយខ្ញុំផង ។
ដោយឡែក លោក តាន់ ណាវិន ចៅសង្កាត់ទឹកថ្លា បានមានប្រសាសន៍ប្រាប់ដំណឹងភ្នំពេញ តាមទូរស័ព្ទកាល ពីរសៀលថ្ងៃទី ១៧ ខែមីនា ឆ្នាំ២០១៥ វេលាម៉ោង ៤ និង១៨នាទីថា យាយទ្រព្យរាល់ថ្ងៃមានឧត្តមសេនីយ៍យោធា ចិញ្ចឹម១ខែ អង្ករមួយបាវ និងថវិកាមួយចំនួន ដើម្បីឱ្យជួយយាមដីឱ្យគេ ។
ចំណែកឯទីស្នាក់ការសង្កាត់ទឹកថ្លា បច្ចុប្បន្នថា ជាផ្ទះរបស់គាត់នោះមិនមែនទេ គាត់មានផ្ទះមួយនៅថ្នល់រទេះភ្លើង ក្រោយមកគាត់លែងលះគ្នាជាមួយ ប្តីរបស់គាត់ ក៏លក់ចែកគ្នា ហើយក៏មកសុំទីស្នាក់ការភូមិ ១០០ខ្នង ស្នាក់នៅ (ព្រោះកន្លែងហ្នឹង ទីស្នាក់ការសង្កាត់ ទឹកថ្លាបច្ចុប្បន្ន)ធ្វើជាអ្នកបោសសំអាត និងយាមនៅទីនោះ ។
លោកចៅសង្កាត់បន្តថា ជំនាន់នោះលោក អ៊ុង ខែម ធ្វើជាប្រធានការិយាល័យកសិកម្មស្រុកប្ញស្សីកែវ គេ បានចុះស្រង់ស្ថិតិអ្នកស្នាក់នៅដើម្បីធ្វើពាក្យស្នើសុំកាន់កាប់ ពេលនោះសង្កាត់អត់មានអ្នកណានៅយាយទ្រព្យ ក៏បាន ចុះឈ្មោះរបស់គាត់ទៅ ។ ចំពោះបញ្ហាដែលគាត់ខ្វះខាតមានជំងឺហើយគ្មានលទ្ធភាពព្យាបាលនោះ គឺសង្កាត់ ក៏ធ្លាប់ ជួយគាត់ដែរ តែគាត់មិនយកសង្កាត់ក៏បានបង្វែរទៅជួយអ្នកក្រផ្សេងទៅ ។ រីឯដីដែលគាត់រស់នៅសព្វថ្ងៃ នេះវិញ កាលពីជំនាន់លោក ស្រេង នៅធ្វើជាអភិបាលខណ្ឌសែនសុខ លោកបានចុះទៅសួរនាំយាយទ្រព្យដែរ ដោយសុំឱ្យ គាត់ទទួលយកជាគោលនយោបាយវិញចុះ ព្រោះដីនេះគេចុះក្នុងអាំងវ៉ង់ទ័រហើយ ឬយកចំណែកណាមួយ ទៅបាន ហើយ ប៉ុន្តែគាត់មិនព្រមគាត់ចង់បានទាំងអស់រឿងនេះគាត់ជឿអ្នកនៅពីក្រោយ ។ ហើយរឿងនេះដែរ លោក ស្រេង ក៏បានរាយការណ៍ជូនមីងហើយដែរ ។
ដោយឡែកលោក លី សាវ៉េត ពេលដែលដំណឹងភ្នំពេញ ទូរស័ព្ទសួររឿងពាក់ព័ន្ធជាមួយលោកយាយ ញឹម ហេង គាត់ឆ្លើយថា ជាប់រវល់ប្រជុំនៅសាលាក្រុង ។ ចំពោះព័ត៌មាននេះ ដំណឹងភ្នំពេញ និងព្យាយាមស្រាវជ្រាវបន្ត ទៅទៀត ៕
ខ្ទមរបស់លោកយាយ កំពុងរស់នៅសព្វថ្ងៃ
