ខណៈពេលបច្ចុប្បន្នស្ថានភាពព្យុះភ្លៀង និងទឹកទន្លេមេគ្គងបង្កអោយកម្ពស់ទឹកមានសភាពបន្តហកឡើងជារៀងរាល់ថ្ងៃ និងជាពេលវេលាដែលត្រូវរួមសហការយកអស់ស្មារតីទាំងអសើគ្នាដើម្បីរក្សាអោយបាននូវអាយុជីវិត ទ្រព្យសម្បត្តិ ធនធានគ្រប់បែបយ៉ាងរបស់ប្រជាពលរដ្ឋ កុំអោយត្រូវបានបំផ្លាញដោយសារគ្រោះធម្មជាតិដែលបានកើតឡើងជាយថាហេតុនោះ នៅព្រឹកថ្ងៃទី ២៦ កក្កដា ២០១៧ គណៈកម្មាធិការគ្រប់គ្រងគ្រោះមហន្តរាយខេត្តក្រចេះ ដឹកនាំដោយឯ.ឧ ខ័ណ្ឌ ចំណាន អភិបាលរងខេត្ត និងជាអនុប្រធានអចិន្ត្រៃយ៏គណៈកម្មធិការគ្រប់គ្រងគ្រោះមហន្តរាយខេត្តក្រចេះបើកកិច្ចប្រជុំចាត់វិធានការ ត្រៀម បង្ការអន្តរាគមន៏ ដល់ប្រជាពលរដ្ឋអោយជៀសផុតពីគ្រោះធម្មជាតិដែលបានកើតឡើងដោយយថាហេតុ ។
កិច្ចប្រជុំមានការចូលរួមពីបណ្តាលមន្ទីរ អង្គភាព ស្ថាប័ន និងអង្គការសង្គមស៊ីវិលក្នុងខេត្ត ដែលប្រព្រឹត្តទៅនៅសាលប្រជុំរដ្ឋបាលសាលាខេត្ត ។
ក្នុងឱកាសនៃកិច្ចប្រជុំឯ.ឧ ខ័ណ្ឌ ចំណាន អភិបាលរងខេត្ត និងជាអនុប្រធានអចិន្ត្រៃយ៏គណៈកម្មាធិការគ្រប់គ្រងគ្រោះមហន្តរាយខេត្តក្រចេះបានជម្រុញដល់ អគ្គលេធិការដ្ឋានគ្រប់គ្រងគ្រោះមហន្តរាយខេត្ត គ្រប់លំដាប់ថ្នាក់ ត្រូវសិក្សា ពិនិត្យនូវតាល់ទីតាំងទួលសុវត្តិភាពទាំងអស់ដែលមានស្រាប់ធ្វើការសម្អាត បែងចែកអោយបានត្រឹមត្រូវនិងកំណត់គោលដៅទីទួលសុវត្តិភាពសាធារណៈអោយបានច្បាស់លាស់ កងកម្លាំង ប្រដាប់អាវុធទាំងបីប្រភេទត្រូវពង្រឹងបទបញ្ជារដល់គ្រប់អង្គភាពក្រោមឪវាទត្រៀមលក្ខណៈ ទាំងមធ្យោបាយសម្ភារៈគ្រប់គ្រាន់ដើម្បីចូលរួមសង្គ្រោះ ជម្លៀសប្រជាពលរដ្ឋទៅកាន់ទីទួលសុវត្តិភាព និងត្រៀមបង្ការរក្សាសន្តិសុខសណ្ដាប់ធ្នាប់ សវត្តិភាព ក្នុងករណីដែលមូល ដ្ឋាននោះរងការលិចលង់ដោយទឹកជំនន់ គ្រប់បណ្ដាមន្ទីរ អង្គភាពទាំងអស់ពង្រឹងដល់ការត្រៀមលក្ខណៈទាំងកម្លាំងកាយ ទាំងមធ្យោបាយនិងសម្ភារៈដើម្បីធានាដល់ការឆ្លើយតបដល់ការបង្ការ សង្គ្រោះ ជម្លៀស នៅមូលដ្ឋានតាមគោលដៅក៏ដូចជាតំបន់មានផល់ប៉ះពាល់ផ្សេងៗ មន្ទីរធនធានទឹក និងមន្ទីរព័ត៌មានត្រូវបន្តតាមដានពីស្ថានភាពអាកាសធាតុ ស្ថានភាព ទឹកជំនន់ ព្រមទាំងធ្វើការផ្សព្វផ្សាយអោយបានទូលំទូលាយ និងទាន់ពេលវេលា ។
ក្នុងឱកាសនោះដែរឯ.ឧ ខ័ណ្ឌ ចំណាន បានអំពាវនាវសាខាកាកបាទក្រហមខេត្ត អង្គការជាតិ អន្តជាតិ សូមចូលរួមសហការក្នុងការបង្ការ សង្គ្រោះ អន្តរាគមន៏ ដល់គ្រប់មូលដ្ឋានដែលកំពុងជួបនូវគ្រោះអាសន្ន អោយបានទាន់ពេលវេលា និងសូមអំពាវនាវដល់ប្រជាពលរដ្ឋទាំងអស់ត្រូវយកស្មារតីប្រុងប្រយ័ត្ន ខ្ពស់បំផុតក្នុងការគ្រប់គ្រងស្ថានការ ទាំងធនធាន ទាំងសម្ភារៈ និងរក្សាអាយុជីវិត អោយជៀសផុតពីការរងគ្រោះក្នុងពេលហេតុការកើតមានឡើង ។
មិនត្រឹមតែប៉ុណ្ណោះ សូមអោយប្រជាពលរដ្ឋយកចិត្តទុកដាក់ក្នុងការតាមដានរាល់ព័ត៌មានពីស្ថានភាពជាប្រចាំ ដើម្បីត្រៀមបំរុងក្នុងការជម្លៀសទៅរកទីទួលសុវត្តិភាព ព្រមទាំងធ្វើការប្រុងប្រយ័ត្នខ្ពស់ចំពោះ កុមារ ចាស់ជរា ជនពិការ ដែលជាជនងាយរងគ្រោះបំផុត ៕
