កំពង់ឆ្នាំង៖-បច្ចុប្បន្ននេះ ដីព្រៃលិចទឹកតំបន់៣ក្នុងឃុំពោធិ៍និងឃុំច្រណូក ស្រុកកំពង់លែង គេសង្កេតឃើញថានៅតែបន្ត រងការទន្ទ្រាននិងរំលោភយកពីសំណាក់ក្រុមឈ្មួញនិងមន្ត្រីមានអំណាច ធ្វើឲ្យបទបញ្ជារលោកឈួរ ច័ន្ទឌឿនអភិបាលខេត្តកំពង់ឆ្នាំងដែលបាន ចាត់ក្រុមចម្រុះចុះធ្វើការបង្ក្រាបការឈូសឆាយទន្ទ្រានយកដីព្រៃលិចទឹកពីសំណាក់ក្រុមឈ្មួញ លួចឈូសឆាយរំលោភយកធ្វើជាកម្មសិទ្ធកាលពីឆ្នាំ២០១៤ -២០១៥នៅចំណុចទួលគោកព្រះ ប្រសាទបាក់ ម៉ៅពកករ ចំណុចកំពង់តាយ៉ា ក្នុងឃុំច្រណូក ស្រុកកំពង់លែង ខេត្តកំពង់ឆ្នាំង កន្លងទៅក៏ដូចជាការព្រមានរបស់លោកជាសុផារ៉ារដ្ឋមន្ត្រីក្រសួងដែនដីសាបដូចទឹកមាត់។
ប្រភពពីប្រជាពលរដ្ឋ បានឲ្យអ្នកយកព័ត៌មានយើងអោយដឹងថា÷ បន្ទាប់ពីថ្នាក់លើសម្រេចដកយកដីចំណុចខាងលើដាក់ជាដែននេសាទសាធារណៈរបស់រដ្ឋមកក្រុមឈ្មួញបានឃុបឃឹតជាមួយអាជ្ញាធរឃុំច្រណូក និងអាជ្ញាធរស្រុកកំពង់លែងយកដីនេះលក់អោយក្រុមហ៊ុនមួយឈ្មោះខូវ ប៊ុនឆាយ ចំនួន7000ហិកតាកាលពីជំនាន់លោកឌុល គឹមឌិត នៅជាមេឃុំច្រណូកនោះ។ ក្រោយមកដីចំណុចខាងលើនេះក៏ត្រូបានក្រុមមន្ត្រីមានអំណាច បានធ្វើការបែងចែកអោយយោធាស្រុកចំនួន១៥០ហិកតា ប៉ូលីស១៥០ហិកតា អាវុធហត្ថស្រុក១០០ហិចតា និងទាហានអភិវឌ្ឍន៍ស្រុក២១៧ហិកតា។
ក្រៅពីនោះ ដីនៅសេសសល់ស្ថិតនៅក្រោមការគ្រប់គ្រង និងកាន់កាប់ដោយ លោក ចេង ញ៉ាន់ អភិបាលរងខេត្តកំពង់ឆ្នាំង និង កូនបង្កើតគឺលោក ចេង ចាន់ដូណាដែល ជាអភិបាលរងស្រុកកំពង់លែង។
បច្ចុប្បន្ននេះដីព្រៃលិចទឹកតំបន់៣ចំណុចគោកព្រះ ចំណុចកំពង់តាយ៉ា ក្នុងឃុំច្រណូក ស្រុកកំពង់លែង ខេត្តកំពង់ឆ្នាំង ខាងលើនេះ គេសង្កេតឃើញថាមាន ការចាប់ផ្តើមលួចឃុបឃិតគ្នារឈូសឆាយទន្ទ្រានអោយរាបស្មើចែកគ្នាកាន់កាប់ រំលោភយកដីព្រៃលិចនេះជាកម្មសិទ្ធដោយមិនខ្វល់ពីផ្លូវច្បាប់អ្វីនោះឡើយ ។
ឈ្មួញនិងមន្ត្រីមូលដ្ឋានបានផ្គើនទៅ និងបទបញ្ជារាជរដ្ឋាភិបាល ជាពិសេស ឯកឧត្តម ទេសរដ្ឋមន្ត្រី ជា សុផារ៉ា ដែលធ្លាប់បានធ្វើការព្រមានទៅលើមន្ត្រីណាដែលបានរំលោភយកដីរបស់រដ្ឋនិងដីរបស់ប្រជារាស្ត្រ នាពេលកន្លងមក។-ប្រភពបង្ហើបអោយដឹងទៀតថា ចំពោះដីអ្នកធំនិងអ្នកមានលុយមួយចំនួនអាចត្រូវបានក្រុមចំរុះមួយនេះរៀបចំឯកសារឲ្យក្លាយទៅជាដីអាស្រ័យផលស្របច្បាប់របស់ប្រជាពលរដ្ឋកុហកលោកអភិបាលខេត្តទៀតផង។
រហូតមកដល់ពេលលនេះទោះជាកន្លែងមួយចំនួនរកឃើញថាពិតជាមានករណីរំលោភដីធ្លីរបស់រដ្ឋមែនក៏ដោយ តែគេមិនដែលបានឃើញអាជ្ញាធរខេត្ត និងមន្ត្រីជំនាញ ចាប់ខ្លួនពួកឈ្មួញនិងអ្នកមានអំណាច មានលុយរំលោភដីធ្លីទាំងនោះ មកផ្តន្ទាទោសម្តងណាឡើយ។ ផ្ទុយមកវិញបើប្រជាពលរដ្ឋដែលគ្រាន់តែចូលអើតករកាប់ឆ្កាឬភ្ជួរាស់ប៉ះពាល់ដីព្រៃលិចទឹកបន្តិចបន្តួច សឹងតែមិនទាន់ផងក៏ត្រូវបានអាជ្ញាធរ ចាប់វាយខ្នោះដោយចោទថាបានកាប់បំផ្លាញដីព្រៃលិចទឹកដែលជាដីហាមឃាត់ ។
ចំណែកក្រុមចម្រុះរបស់ខេត្ត កំពង់ឆ្នាំង បវិញហាក់ដូចជាកំពុងក្លាយទៅជាមន្ត្រីជើង១០ និងក្លាយទៅជាមន្ត្រីគ្រាប់ល្ពៅអស់ហើយដែរ ដែលធ្វើអោយការទទួលភារកិច្ចក្នុងការស្រាវជ្រាវ ករណីរំលោភដីធ្លី ខាងលើមិនមានតម្លារភាពក្នុងការអនុវត្តភារកិច្ចនាពេលកន្លងមក។ជាក់ស្តែងដីព្រៃលិចទឹក នៅចំណុច គោកព្រះ និងទំនាបតាយ៉ាប ភូមិកង្កែប ឃុំច្រណូក ស្រុកំពង់លែង ត្រូវបានមន្ត្រីមួយចំនួនក្នុងខេត្ត ធ្វើការឈូសឆាយ រំលោភយកជិត១០០០ហិចតាដែល ដីខាងលើនេះក្រោមការគ្រប់គ្រងរបស់សហគមន៏នេសាទ ឃុំច្រណូកដែលមានលោកស្រីសុគុនជាប្រធានសហគមន៍។
ប្រភពបានបង្ហើបទៀតថា មួយរយៈពេលមុនគេសង្កេតឃើញថាក្រុមសហគមន៍នេសាទច្រណូកតែងតែបំពេញការងាររបស់ខ្លួនក្នុងការការពារដីយ៉ាងសស្រាក់សស្រាំ ប៉ុន្តែមួយរយៈពេលក្រោយមកនេះ គេឃើញថាសហឋគមន៍ហាក់មិនយកចិត្តទុកដាក់សោះ នាំអោយគេសង្ស័យថាសហគមន៍កំពុងត្រូវដងត្រូវផ្លែ ក្នុងការរួមគំនិតគ្នាររំលោកភយកដីចែកគ្នាជាប្រព័ន្ធអស់ហេីយ។
ការឈូសឆាយទន្ទ្រានកាន់កាប់ដីព្រៃលិចទឹកចំណុចខាងលើនេះ ធ្វើអោយប្រជាពលរដ្ឋរស់នៅក្នុងឃុំច្រណូក និងឃុំពោធិ៍មានការថ្នាំងថ្នាក់ចិត្ត ចំពោះថ្នាក់ដឹកនាំរាជរដ្ឋាភិបាលក៏ដូចជាគណៈបក្សប្រជាជន ។
