ខេត្តកំពង់ធំ ៖ មន្ត្រីបំរើការងារនៅក្នុងអង្គភាពចារកិច្ចយោធាម្នាក់ត្រូវបានឃាត់ដោយកម្លាំងកងរាជអាវុធហត្ថ កាលពីម៉ោងជាង៦ល្ងាច ថ្ងៃ១៩កក្កដា២០១៧ នៅភូមិកំពង់ស្តេច ឃុំក្រវ៉ា ស្រុកបារាយណ៍ ខេត្តកំពង់ធំ។ មន្ត្រីអាវុធហត្ថស្រុកបារាយណ៍បានបង្ហើបឲ្យដឹងថា បុរសដែលរងការឃាត់ខ្លួននោះ មានឈ្មោះពីរដែលប្រើប្រាស់ក្នុងលិខិតបញ្ជារបេសកកម្ម គឺ ១.ឈ្មោះ ឆេង សុខអេង ហៅសង្ហា និង២.ឈ្មោះ ឡាង គា អាយុ៤៩ឆ្នាំ មានឋានៈថ្នាក់វរៈសេនីយ៍ កាន់លិខិតបញ្ជាបេសកកម្ម ចេញដោយអង្គភាពចារកិច្ចក្រសួងការពារជាតិ មានទីលំនៅភូមិត្រពាំងស្វាយ ឃុំបល្ល័ង្ក ស្រុកបារាយណ៍ ខេត្តកំពង់ធំ។ សមត្ថកិច្ចបានដកហូតរថយន្ត១គ្រឿង ប្រភេទលុចស៊ិស RX 300 ពណ៌ខ្មៅ ពាក់ស្លាកលេខ ភ្នំពេញ 2A-1845 និងអាវុធខ្លី១ដើមផងដែរ បញ្ជូនមកកាន់ទីបញ្ជាការ អាវុធហត្ថស្រុកបារាយណ៍ទាំងយប់។
ការឃាត់ខ្លួនមន្ត្រីចារកិច្ចរូបនេះ គឺបានធ្វើឡើងក្រោមបញ្ជាពីព្រះរាជអាជ្ញា អមសាលាដំបូងខេត្ត ដឹកនាំដោយលោក អ៊ិត សុធា បន្ទាប់ពីស្ថាប័នសាលាដំបូងខេត្ត ទទួលបានពាក្យបណ្តឹងពីកសិករដឹកអុស និងជំនៀរឈើ ដោយចោទថា មន្ត្រីរូបនេះបានធ្វើសកម្មភាព ទារប្រាក់ពីពួកគេជាយូរឆ្នាំមកហើយ ក្នុងគោយន្តកន្ត្រៃ១គ្រឿង ដោយតម្រូវឲ្យពួកគាត់បង់ នូវទឹកប្រាក់ចាប់ពី១៥ម៉ឺនរៀល រហូតដល់ទៅ៥០ម៉ឺនរៀលឯណោះ ប្រសិនបើមិនបង់ឲ្យមន្ត្រីនោះទេ នោះគេនឹងចាប់ ឬក៏បិទមិនឲ្យដឹកអុស ឬជំនៀរឈើទាំងនោះទៀតឡើយ។
លោកបញ្ជាក់ថា ខណៈនេះ ជនសង្ស័យកំពុងស្ថិតក្រោមការសាកសួរ ពីកម្លាំងអាវុធហត្ថជំនាញស្រុកបារាយណ៍ ហើយជនសង្ស័យអាចនឹងត្រូវបញ្ជូនបន្ត ទៅកាន់ សាលាដំបូង និងអយ្យការ ខេត្តកំពង់ធំ នារសៀលថ្ងៃ២០កក្កដានេះ បន្ទាប់ពីចងក្រងសំណុំរឿងនោះរួច ៕
