ក្រចេះ ៖ គ្រោះថ្នាក់ចរាចរណ៍គួរអោយរន្ធត់មួយកើតឡើងកាលពីវេលាម៉ោង22នឹង25នាទី ថ្ងៃទី20 ខែកក្កដា ឆ្នាំ2017 ស្ថិតនៅចំណុចខាងកើតគ្រុឌ លើផ្លូវ លេខ377 ចន្លោះពីរង្វង់មូលព្រាបសទៅផ្លូវ បំបែកខ្លាស្ទុះ ក្នុងភូមិអូរឬស្សី1 សង្កាត់អូរឬស្សី ក្រុងក្រចេះ រវាងរថយន្តបុកម៉ូតូក្នុងដំណើរស្របទិសគ្នា ដែលបង្កឡើងដោយរថយន្តម៉ាកសាំងយ៉ុង ពណ៌ខៀវ ពាក់ស្លាកលេខ ភ្នំពេញ2AI.9960អ្នកបើកបរមិនស្គាល់អត្តសញ្ញាណ(រត់គេចខ្លួនបាត់) ។
លោក ចក់ ផល្លី ប្រធានចរាចរណ៍ក្រុងក្រចេះបានអោយដឹងថា រថយន្តម៉ាកសាំយ៉ុងដែលបង្កគ្រោះថ្នាក់នោះធ្វើដំណើរស្របទិសគ្នាពីកើត ទៅលិច ដល់ចំណុចខាងលើបានបុកនិងម៉ូតូ ម៉ាកវេវ ពណ៍ខ្មៅ គ្មានស្លាក លេខ អ្នកបើកបរឈ្មោះ ( ខៃ ខន )ភេទប្រុស អាយុ35ឆ្នាំ (ស្លាប់ និងកន្លែងកើតហេតុ) មានទីលំនៅភូមិ អូរឬស្សី1 សង្កាត់អូរឬស្សី និងអ្នករួម ដំណើរជាមួយ ឈ្មោះ (ស្រី សំស៊ីណន់ )ភេទស្រី អាយុ30ឆ្នាំ (ស្លាប់កន្លែងកើតហេតុ) មានទីលំនៅ ភូមិក្បាលកោះ សង្កាត់កោះទ្រង់ ក្រុងក្រចេះ។
សមត្ថកិច្ចនគរបាលចរាចរណ៍ក្រុងក្រចេះបានអោយដឹងថា សាកសពជនរងគ្រោះទាំង02ខាងលើត្រូវបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី។ ចំណែក
រថយន្តបង្ក និងម៉ូតូត្រូវបានយកទៅរក្សាទុកនៅអធិការដ្ឋាននគរបាលក្រុងក្រចេះ ដើម្បីកសាងសំណុំរឿងតាមនិតិវិធីចាត់ការបន្តតាមច្បាប់ស្តីពីចរាចរណ៍ផ្លូវគោក ៕