មណ្ឌលគិរី៖ ក្រុមប្រជាពលរដ្ឋជាច្រើននាក់រស់នៅឃុំចុងផ្លាស់ ស្រុកកែវសីមា ខេត្តមណ្ឌលគិរី ដែលអាស្រ័យផលពីសហគមន៍សិប្បកររ៉ែមាសចុងផ្លាស់ បាននាំគ្នាមកជួបជុំមុខសាលាឃុំចុងផ្លាស់ ដើម្បីសុំអោយមានការ អន្តរាគមន៍ពីក្រសួងរ៉ែ និងថាមពល ក៏ដូចជាប្រមុខរាជរដ្ឋាភិបាល ចំពោះករណីក្រុមហ៊ុនសិក្សាស្រាវជ្រាវរ៉ែ ឈ្មោះ រ៉ុងឆេង ធ្វើអាជីវកម្មរ៉ែ មាសរំលោភចូលការដ្ឋានរ៉ែមាស របស់សហគមន៍សិប្បកររ៉ែមាសចុងផ្លាស់ចំនួន៤រណ្ដៅរ៉ែពេលដែលមន្ត្រីអធិការកិច្ចក្រសួងរ៉ែ និងថាមពល ចុះធ្វើអធិការកិច្ចក្នុងក្រុមហ៊ុន រ៉ុងឆេង កាលពីថ្ងៃទី១៩ម្សិលមិញ ។
លោក ពៅ សាវ៉ាត ជាប្រជាសហមន៍រ៉ែនៅឃុំចុងផ្លាស់បានលើកឡើងថា ពួកគាត់បានមកប្រកបរបរធ្វើរ៉ែមាស តាំងពីឆ្នាំ១៩៩០មកម្លះ ដោយសារតែភូមិសាស្ត្រនៅឃុំចុងផ្លាស់នេះ មិនអំណោយផលសម្រាប់ធ្វើកសិកម្ម ដូច្នេះពួកគាត់គ្មានរបរអីក្រៅពីនាំគ្នារុករករ៉ែមាសជាលក្ខណៈគ្រួសារនោះទេ។លោកថា ដំបូងពួកគាត់ទទួលស្គាល់ថា ពួកគាត់ពីមុនធ្វើរ៉ែមាសអនាធិបតេយ្យមែន តែមកដល់ពេលបច្ចុប្បន្នក្រោមការដឹកនាំរបស់សម្តេចតេជោ ក្រសួងរ៉ែនិងថាម ពលបានផ្ដល់អជ្ញាប័ណ្ឌរុករករ៉ែមាសជាលក្ខណៈគ្រួសារឲ្យពួកគាត់ស្របច្បាប់ ដោយចងក្រងជាសហគមន៍សិប្បកររ៉ែមាស ចុងផ្លាស់ មិនមានការជីករ៉ែមាសដោយអានាធិប្បតេយ្យទៀតនោះទេ ដែលធ្វើឲ្យប្រជាពលរដ្ឋស្ទើទាំងស្រុងក្នុងឃុំចុងផ្លាស់ គឺមានការងារ និងប្រភពចំណូល ពីសហគមន៍រ៉ែមាសចុងផ្លាស់នេះតែម្ដង ។
តែចាប់តាំងពីមានវត្តមានរបស់ក្រុមហ៊ុនដែលកាន់អាជ្ញា ប័ណ្ឌសិក្សារ៉ែមាសឈ្មោះ រ៉ុងឆេង ចូលមកអំឡុងឆ្នាំ២០០៥ ក្រុមហ៊ុនមួយនេះតែងធ្វើទុក្ខបុកម្នេញដល់ប្រជាពលរដ្ឋ ដែលអាស្រ័យផលរ៉ែមាសក្នុងតំបន់នោះ ។ក្រុមហ៊ុន រ៉ុងឆេង នេះ តែងរំលោភបំពានចូលក្នុងបរិវេនសហគមន៍រ៉ែមាស ចុងផ្លាស់ជាបន្តបន្ទាប់ ។ ការពិតក្រុមហ៊ុនមួយនេះមានត្រឹមអាជ្ញាប័ណ្ឌសិក្សារ៉ែមាសតែប៉ុណ្ណោះ ប៉ុន្តែជាក់ស្ដែងក្រុមហ៊ុន រ៉ុងឆេង បានធ្វើអាជីវកម្មយករ៉ែមាសជាច្រើនឆ្នាំមកហើយដោយមិនបានបង់ពន្ធជូនរដ្ឋអ្វីឡើយ ។
ក្រុមប្រជាសហគមន៍ក៏បានសំណូមពរដល់ ក្រសួងរ៉ែ និងថាមពល ស្នើសុំការជីករ៉ែមាសឲ្យបានជម្រៅជ្រៅជាងនេះ ព្រោះបច្ចុប្បន្នក្រសួងរ៉ែបានកំណត់រណ្ដៅរ៉ែនីមួយ ៗក្នុងសហគមន៍រ៉ែមាស ត្រឹម២០ម៉ែត្រប៉ុណ្ណោះ ដោយជម្រៅនេះមិនមានរ៉ែមាសនោះទេ និងសូមប្រើប្រាស់កម្មករតាម តម្រូវការពលកម្ម ដែលលើសពី៧នាក់ និងសូមឲ្យមានការបង្រៀនបច្ចេកទេសក្នុងការជីករ៉ែមាស ព្រមទាំងស្នើសុំឲ្យក្រុមហ៊ុន រ៉ុងឆេង ឈប់រំលោភបំពានលើដីរបស់សហគមន៍សប្បកររ៉ែចុងផ្លាស់ ទំហំ៤៣ហិកតា ដែលរាជរដ្ឋាភិបាល ដែលបានប្រគល់អោយទៅសហគមន៍ ប្រកបអាជីវកម្មរ៉ែ ។