ភ្នំពេញ ៖ អភិបាលរងស្រុកសន្ទុកខេត្តកំពង់ធំម្នាក់ត្រូវបាននាំខ្លួនមកតុលាការរាជធានីភ្នំពេញ នៅថ្ងៃទី២០ ខែកក្កដា ឆ្នាំ២០១៧ ដើម្បីយកមកសាកសួរ ករណីស៊ីដាច់លុយជាង២លានដុល្លារអាមេរិក របស់ប្អូននាយករដ្ឋមន្ត្រី។ជនសង្ស័យរឿងស៊ីដាច់លុយនោះឈ្មោះ អ៊ឹម ឆន ភេទប្រុស អាយុ៤៣ឆ្នាំ មុខងារជាអភិបាលរងស្រុកសន្ទុក ខេត្តកំពង់ធំ កំពុងត្រូវលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ កំពុងធ្វើការសាកសួរ។
មូលហេតុនាំឲ្យមានការឃាត់ខ្លួនអភិបាលរងស្រុកសន្ទុកនេះ គឺដោយសារកាលពីក្នុងអំឡុងឆ្នាំ២០១៥ លោកស្រី ហ៊ុន សេងនីដែលគេស្គាល់ថាជាប្អូនស្រីនាយករដ្ឋមន្ត្រី បានឲ្យលុយជាង២លានដុល្លារអាមេរិកទៅឈ្មោះ អ៊ឹម ឆនជួយ រៀបចំដីចំនួន១៥០០ហិកតា នៅក្នុងឃុំចំនួន៤ ក្នុងស្រុកសន្ទុក ខេត្តកំពង់ធំ ។
តែរហូតមកដល់អំឡុងខែមេសា ឆ្នាំ២០១៧ ឈ្មោះ អ៊ឹម ឆន ពុំបានប្រគល់ប្លង់ដីរឹងមកឲ្យលោកស្រី ហ៊ុន សេងនី តាមការសន្យាទេ។ម្យ៉ាងទៀត ពេលចុះពិនិត្យទីតាំងដីមើលឃើញថា ពុំបានរៀបចំដីឲ្យទេ ពោលគឺមានតែនៅលើក្រដាសប៉ុណ្ណោះ ទើបម្ចាស់ប្រាក់បានប្ដឹងតែម្ដង។ ក្រោយមានពាក្យបណ្ដឹងកាលពីថ្ងៃទី ១៧ កក្កដា ឆ្នាំ ២០១៧កន្លងទៅនេះ សមត្ថកិច្ចបានឃាត់ខ្លួនមនុស្ស៤នាក់ មកធ្វើការសាកសួរ តែក្រោយមកសមត្ថកិច្ចក៏បានដោះលែងមនុស្ស៣នាក់ឲ្យត្រឡប់ទៅវិញ ទុកតែអភិបាលរងស្រុកឈ្មោះ អឺម ឆន កសាងសំណុំរឿងបញ្ជូនឡើងតុលាការចាត់ការ ៕
