ភ្នំពេញ៖ សម្ដេចតេជោ ហ៊ុន សែននាយករដ្ឋមន្ត្រីនៅថ្ងៃទី១៩កក្កដាផ្តល់អាហាររូបករណ៍ពីសេសដល់កុមារាហ៊ឺ ទៀង គីមហុងដែលមានបញ្ញាស្មើយុវជនអាយុ១៨ឆ្នាំដោយសារអាចដោះស្រាយលំហាត់គណិតវិទ្យាថ្នាក់ទី១២ សម្រាប់ការសិក្សាចំណេះដឹងទូទៅនៅសាលាប៊ែលធី ។ នេះបើតាមហ្វេសប៊ុកសម្ដេច ហ៊ុន សែន ។
សម្ដេច ហ៊ុន សែនទទួលជួបកុមារាគីមហុងនិងឪពុកម្តាយកុមារនៅគេហដ្ឋាន ក៏បានឧបត្ថម្ភកុំព្យូទ័រយួរដៃ ០១គ្រឿង iPad ០១គ្រឿង និងកង់ ០១គ្រឿង រួមទាំងថវិកាមួយចំនួននឹងទទួលបន្ទុករាល់ការចំណាយសម្រាប់ការសិក្សារបស់កុមារា គីម ហុង ទាំងស្រុងទៀតផង។
កុមារា ហ៊ឺ ទៀង គីមហុងបច្ចុប្បន្នមានអាយុ៧ឆ្នាំ កំពុងរៀននៅសាលាបឋមសិក្សាហ៊ុនសែនអនុវត្ត នៅភូមិ៣ សង្កាត់រកាក្នុង ក្រុងដូនកែវ ខេត្តតាកែវ គឺមានសមត្ថភាពពិសេសយល់ដឹងពីភាសាខ្មែរ និងគណិតវិទ្យា។ កុមារា គីមហុង មានសមត្ថភាពចេះអានអក្សរខ្មែរ និងប្រើប្រាស់ភាសាអង់គ្លេស ព្រមទាំងអាចដោះស្រាយលំហាត់គណិតវិទ្យាថ្នាក់ទី១២ បានផងដែរ ។ សម្ដេច ហ៊ុន សែន បានចាត់ទុក ថា៖«គីមហុង គឺជាធនធានដ៏មានសារៈសំខាន់បំផុតសម្រាប់ប្រទេសកម្ពុជា» ៕
