ក្រចេះ ៖លោក ប៊ុយ រតនា អតីតនាយផ្នែករដ្ឋបាលព្រៃឈើក្រចេះ ត្រូវបានផ្លាស់ប្តូរទៅកាន់ជានាយផ្នែករដ្ឋបាលព្រៃឈើព្រែកប្រសព្វ ដោយលោក អ៊ីង ស៊ីណាង អតីតនាយផ្នែករដ្ឋបាលព្រៃឈើព្រែកប្រសព្វមកកាន់តំណែងជានាយផ្នែករដ្ឋបាលព្រៃឈើក្រចេះជំនួសវិញ ។
ការផ្លាស់ប្តូរភារកិច្ចនេះ ត្រូវបានធ្វើឡើងកាលពីរសៀលថ្ងៃទី ១៩ ខែកក្កដា ឆ្នាំ២០១៧ ក្រោមអធិបតីភាពលោក គុយ ហ៊ួត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ ។
លោក គុយ ហ៊ួត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តក្រចេះ បានឲ្យដឹងថា ការផ្លាស់ប្តូរភារកិច្ចរបស់លោក ប៊ុយ រតនា អតីតនាយផ្នែករដ្ឋបាលព្រៃឈើ និងលោក អ៊ីង ស៊ីណាង អតីតនាយផ្នែករដ្ឋបាលព្រៃឈើព្រែកប្រសព្វនេះ គឺមានភាពប្រក្រតីធម្មតា ហើយជាយុទ្ធសាស្ត្រនៃការគ្រប់គ្រង និងរបៀបរបបនៃការដឹកនាំក្នុងការធ្វើការងារ ។
លោក បានបន្តថា ហើយការផ្លាស់ប្តូរភារកិច្ចនេះទៀតសោធ មិនមែនដូចបណ្តាញព័ត៌មានមួយចំនួនបានលើកឡើងថា មន្ត្រីធ្វើខុសទើបមានការផ្លាស់ប្តូរនោះទេ ហើយក៏មិនមានទាក់ទងនឹងផលប្រយោជន៍ ឬទទួលបានផលប្រយោជន៍អ្វីនោះឡើយ ប៉ុន្តែផ្ទុយទៅវិញ ការផ្លាស់ប្តូរភារកិច្ចនេះ គឺធ្វើឲ្យលោកនាយផ្នែកទាំងពីរទទួលបានចំណេះដឹង បទពិសោធន៍ការងារថ្មីបន្ថែមទៀតពីលើបទពិសោធន៍ការងារដែលមានស្រាប់ ។
លោក បន្ថែមទៀតថា ដោយឡែកមន្ត្រីថ្នាក់ក៏នឹងទទួលបាននូវរបៀបរបបបន្ថែមថ្មីក្នុងការអនុវត្តន៍ការងារ ។ ជាងនេះទៅទៀត ត្រូវយកចិត្តទុកដាក់អនុវត្តន៍តាមផែនការ បទបញ្ជា តួនាទីភារកិច្ចឲ្យបានម៉ឺងម៉ាត់ ។
លោកប្រធានមន្ទីរ ក៏បានជម្រុញដល់លោកនាយផ្នែកទាំងពីរធ្វើយ៉ាងណាត្រូវប្រែក្លាយពីរការប្តាជ្ញាចិត្តទៅជាការអនុវត្តន៍ដ៏មានប្រសិទ្ធភាព ។
លោក គុយ ហ៊ួត បានបញ្ជាក់ថា ការងារដឹកនាំ និងការអនុវត្តន៍ គឺជាជំហ៊ានជើងមុខ បើដឹកនាំខុស នោះនឹងមានបញ្ហារាំងស្ទះដល់ដំណើរការអនុវត្តន៍ការងារ និងខ្លួនឯងមិនខាន់ ។
លោក បានណែនាំដល់មន្ត្រីក្រោមឱវាទថា ដើម្បីឲ្យការងារប្រព្រិត្តទៅដោយរលូន និងមានប្រសិទ្ធភាព ក្នុងនាមជាថ្នាក់ដឹកនាំ ជាអ្នកគ្រប់គ្រង់ ត្រូវចេះរៀបចំផែនការទុកជាមុន ការចុះអនុវត្តន៍ ការតាមដាន និងការវាយតម្លៃការងារ ៕
