កណ្តាល-ព្រៃវែង៖ អំពើពុករលួយជាប្រព័ន្ធដ៏ធំមួយត្រូវបានលេចធ្លាយចេញ ពីពន្ធនាគារខេត្តព្រៃវែង បន្ទាប់ពីទណ្ឌិតជាចោរ ប្លន់ម្នាក់ ត្រូវបានកម្លាំងនគរបាល ខេត្តកណ្ដាល បំបែកសំណុំរឿង ទណ្ឌិតជាចោរប្លន់រូបនេះ បានឃុបឃឹតសូកប៉ាន់ ជាមួយអនុប្រធានពន្ធនាគារ ខេត្តព្រៃវែងម្នាក់ និងមន្ដ្រីមួយចំនួន រហូតអាចប្រើប្រាស់កុំព្យូទ័រ និងទូរស័ព្ទដៃ Smart Phone លេង Facebook និង Line បោកបញ្ឆោតជម្រឹតទារលលុយពីនារីរងគ្រោះមួយចំនួន តាមរយះគម្រាមបង្ហាញរូបភាពអាក្រាតកាយនារីទាំងនោះ ។ករណីនេះលោក នុត សាវនា អ្នកនាំពាក្យអគ្គនាយកដ្ឋានពន្ធនាគារ បានអះអាងប្រាប់វិទ្យុបារាំងផ្សាយជាភាសារខ្មែរថា អ្នកពាក់ព័ន្ធនៅក្នុងពន្ធនាគារខេត្តព្រៃវែងនឹងមិនត្រូវលើកលែងទេ។ អង្គភាពនឹងអនុវត្តតាមច្បាប់(ស៊ិក)។
សូមបញ្ជាក់ថា៖លោកឧត្តមសេនីយ៍ អ៊ាវ ចំរើន ស្នងការប៉ូលីសខេត្តកណា្តល បានបង្ហោះតាមហ្វេសប៊ុក នៅថ្ងៃនេះ ទាក់ទងទៅនឹង អ្នកទោសមួយរូបឈ្មោះ យ៉ែម ប្រុស នៅក្នុងពន្ធនាគារខេត្តព្រៃវែង ដែលបានប្រើប្រាស់កុំព្យូទ័រយួរដៃ និងទូរស័ព្ទដៃ ទាក់ទងស្នេហាជាមួយស្ត្រី តាមរយៈគណនីហ្វេសប៊ុកចំនួន៥។ លោក អ៊ាវ ចំរើន ឲ្យដឹងថា ទណ្ឌិតឈ្មោះ យ៉ែម ប្រុស ប្រើរូបភាពជាព្រាននារី ទាក់ទង friend ជាស្ត្រី អនឡាញ តាមហ្វេសប៊ុក រហូតបង្ហាញរូបភាពអាក្រាតទៅវិញទៅមក ជាមួយនឹងរូបភាពបែបនេះ ជនល្មើសបានថតទុកនិងគំរាមទារប្រាក់ចំនួន៥ពាន់ដុល្លារ ជាថ្នូរមិនបង្ហោះរូបអាក្រាតចេញទៅក្រៅ។
ការបង្ក្រាបករណីទណ្ឌិតប្រព្រឹត្តបទល្មើស នៅក្នុងពន្ធនាគារខាងលើនេះ បានកើតឡើងបន្ទាប់ពីស្ដ្រីម្នាក់ អាយុប្រមាណ៤៥ឆ្នាំរស់នៅភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្ដាល កាលពីថ្ងៃទី១៣ ខែកក្កដា ឆ្នាំ២០១៧ បានប្ដឹងទៅកាន់ស្នងការនគរបាល ខេត្តកណ្ដាល ពីករណីទណ្ឌិតរូបនេះបានប្រើ Facebook លួងលោមគាត់ រហូតលង់ខ្លួនថតរូបអាក្រាតកាយ ផ្ញើទៅកាន់ជនដៃដល់ធ្វើឲ្យរូបគេយកទៅគំរាមបង្ហោះជាសាធារណៈដោយទាមទារលុយម្ដង៣,០០០ដុល្លារ និងម្ដង៥,០០០ដុល្លារ។
លោកឧត្តមសេនីយ៍ទោ អ៊ាវ ចំរើន ក្រោមការសម្របសម្រួលពីព្រះរាជអាជ្ញាអម សាលាដំបូងខេត្តកណ្ដាល បានបើកការស្រាវជ្រាវយ៉ាងយកចិត្តទុកដាក់ ក៏ឈានទៅដល់ការបំបែកសំណុំរឿងនេះ ហើយមុខសញ្ញា គឺជាទណ្ឌិតម្នាក់ឈ្មោះ យ៉ែម ប្រុស កំពុងជាប់ពន្ធនាគារ នៅខេត្តព្រៃវែង ពាក់ព័ន្ធនឹងបទល្មើសប្លន់ ចំនួន៨លើកមានទោសចំនួន១០ឆ្នាំ។
បើតាមលោកស្នងការ បានឲ្យដឹងថា ទណ្ឌិតរូបនេះត្រូវបានសមត្ថកិច្ចចាប់ខ្លួន តាំងពីឆ្នាំ២០១០មកម្ល៉េះ ពាក់ព័ន្ធករណីប្លន់៧លើក នៅខេត្តកំពត និងមួយលើកនៅខេត្តតាកែវ ហើយត្រូវបានតុលាការខេត្តកំពត សម្រេចដាក់ពន្ធនាគារ១០ឆ្នាំ ប៉ុន្ដែក្រោយជាប់ពន្ធនាគារបានជាង១ឆ្នាំ ទណ្ឌិតរូបនេះ បានរត់ការផ្ទេរមកកាន់ពន្ធនាគារខេត្តព្រៃវែង ហើយឃុបឃិតជាមួយអនុប្រធានពន្ធនាគារម្នាក់ឈ្មោះ អ៊ុំ រ៉ាយឿង រហូតរូបគេអាចមានកុំព្យូទ័រឡេបថបមួយគ្រឿង និងទូរស័ព្ទ៣គ្រឿង ប្រើលេខ៤ខ្សែ ដើម្បីបោកបញ្ឆោត នារីរងគ្រោះតាម Facebook និងតាមកម្មវិធីផ្ញើសារ Line ទៀតផង។
ពេលខ្លះទណ្ឌិតរូបនេះ អាចចេញពីពន្ធនាគារ ទៅខាងក្រៅដោយសារតែមានដៃជើងរបស់ខ្លួន ជាអនុប្រធានពន្ធនាគារ និងមន្ដ្រីពន្ធនាគារផង។
ស្នងការនគរបាលខេត្តកណ្ដាល បានបន្តបញ្ជាក់ថា ក្រោយបែកធ្លាយភាពមិនប្រក្រតីខាងលើនេះ ទណ្ឌិតត្រូវបានចៅក្រមសម្រេចផ្ទេរ ចេញពីពន្ធនាគារខេត្តព្រៃវែង ទៅពន្ធនាគារត្រពាំងផ្លុង ប៉ុន្ដែមន្ដ្រីអនុរក្សពន្ធនាគារ មិនទាន់ដឹងថ្នាក់លើចាត់វិធានការបែបណានោះឡើយ។
លោកឧត្តមសេនីយ៍ អ៊ាវ ចំរើន បានឲ្យដឹងព័ត៌មានលម្អិតថា៖
«សូមជូនដំណឹងដល់សុភាពនារី ដែលកំពុងនិយមលេងបណ្តាញសង្គមហ្វេសប៊ុកទាំងឡាយមេត្តាជ្រាប៖ ដោយយោងតាមបណ្តឹង របស់នារីរងគ្រោះ បានមកប្តឹងដល់សមត្ថកិច្ច យើងអំពីអំពើគំរាមបង្ហោះរូបអាក្រាតជាថ្នូរ និងប្រាក់5.000$។ អំពើនេះត្រូវបានជនល្មើស ប្រើប្រាស់បណ្តាញសង្គម Facebook (គណនី ផ្ទាល់ខ្លួន) ដើម្បីទាក់ទងសុំស្នេហាពីសុភាពស្ត្រី ដែលជាមុខសញ្ញា (Friend) របស់វា នៅពេលដែលសុភាពនារីយើង បានធ្លាក់ក្នុងអន្លុងស្នេហ៍របស់បិសាចព្រាននេះរួចហើយ ក៏បន្តបញ្ឆោតឲ្យសុភាពនារីយើងឆាតវីឌេអូ តាមរយះ Line ដើម្បីដុតបញ្ឆេះកំសួលតណ្ហាឲ្យឡើងកំដៅរួចក៏ដោះស្រាយ ( On line sex ) សម្រេចតណ្ហារៀងៗខ្លួន ដោយខ្លួនឯង ទៅហោង …..។ ក្នុងពេលដែលអ្នកទាំង២ កំពុងតែស្ថិតនៅក្នុងសមរភូមិ On line sex “oral sex” នោះ នៅម្ខាងវាបានត្រៀមទូរស័ព្ទ មួយទៀត ដើម្បីលួចថតសកម្មភាពរបស់ខាងរងគ្រោះ(សុភាពនារី) ដើម្បីទុកប្រើគំរាមទារប្រាក់ពីរងគ្រោះ ….។
សូមបញ្ជាក់ដែរថា៖ឈ្មោះ យ៉ែម ប្រុស ចាប់តាំងពីឆ្នាំ២០១០មក ខ្លួនបានជាប់ពន្ធនាគារនៅខេត្តកំពត បន្ទាប់មកត្រូវបានផ្ទេរមកឃុំខ្លួននៅពន្ធនាគារ ខេត្តព្រៃវែង ដែលជាប់ពាក់ព័ន្ធបទល្មើសព្រហ្មទណ្ឌចំនួន០៨ករណី (ប្លន់០៧លើកនៅខេត្តកំពត និងប្លន់០១លើកនៅខេត្តតាកែវ) ជាប់ទោសសរុប១០ឆ្នាំ។ នៅក្នុងពន្ធនាគារ ខេត្តព្រៃវែង ពេល ចេញមកក្រៅបន្ទប់ឃុំឃាំង គឺអាចលេងកុំព្យូទ័រ និងទូរស័ព្ទបាន ពីព្រោះទទួលបានការអនុញ្ញាតិពីលោក អ៊ុ រ៉ាយឿង អនុប្រធានពន្ធនាគារខេត្តព្រៃវែង។
កន្លងមកទណ្ឌឹតរូបនេះធ្លាប់ទិញសម្លារប្រើប្រាស់មួយចំនួនឲ្យ លោក អ៊ុ រ៉ាយឿង ។ នៅក្នុងពន្ធនាគារ ទណ្ឌឹតរូបនេះអាចប្រើប្រាស់ទូរស័ព្ទ០៣គ្រឿង (1-Samsung Not5. 2-Samsung Not3.3-Nokia) កុំព្យូទ័រយួរដៃ០១គ្រឿង និងប្រើប្រាស់លេខស័ព្ទ០៤ខ្សែ (096-8919254, 017-770773, 090-333833, 096-4444071) ទូរស័ព្ទទាំង០៣គ្រឿងនេះគឺឈ្មោះ លុក ដែលធ្លាប់ជាប់ពន្ធនាគារទិញឲ្យប្រើ ហើយឈ្មោះ យ៉ែម ប្រុស បានបង្កើតគណនីហ្វេសប៊ុកចំនួន០៥ សំរាប់លេងរួមមាន៖ (1-facebook ឈ្មោះ pros na. 2-facebook ឈ្មោះ Bong rin. 3-facebook ឈ្មោះ Sothea ra. 4-facebook ឈ្មោះ បឺតភាកូនម៉ាក់មុំ, 5-facebook ឈ្មោះ Chang Chang)។
សូមបញ្ជាក់ថា នៅក្នុង Laptop ជនល្មើសនៅមានរូបវីឌេអូអាក្រាតរបស់នារី ដែលវាទាក់ទងស្នេហាមិនក្រោម៥-៦នាក់ទៀត។ ហើយនៅ ក្នុងគណនីហ្វេសប៊ុក ជនល្មើសមានមិត្តភ័ក្ត្រសុទ្ធតែជានារី ក្នុងមួយគណនីជាង១៥០នាក់ផងដែរ។
លោក ស្នងការខេត្តកណ្តាល បានបញ្ជាក់ថា «ឆ្លងកាត់រឿងរ៉ាវមួយនេះ ខ្ញុំសូមសំណូមពរដល់សភាពនារី ទាំងឡាយមេត្តាប្រុង កាយអប់រំចិត្ត កុំឲ្យជឿស្លុងទៅតាមពាក្យផ្អែមល្ហែមលួងលោមរបស់បុរស ហើយព្រមគ្រប់យ៉ាងដើម្បីបញ្ជាក់ពីទឹកចិត្តស្រឡាញ់របស់ខ្លួន ចំពោះគេបែបនេះនោះ។ សង្ឃឹមថា សុភាពនារីទាំងឡាយរបស់ខ្ញុំ មិនចាញ់កល់បុរសព្រានថោកទាបបែបនេះ តទៅទៀតឡើយ។ បំណងល្អពីនគរបាលខេត្តកណ្តាល» ៕
