ពោធិ៍សាត់ៈ ៖ កន្លងមកធ្លាប់តែឭពតិមានពីបរទេសករណីស្ត្រីដែលមានកូនលើសពី២០នាក់។ឯស្រុកខ្មែរបើមានគឺមានតែបុរសមានប្រពន្ធច្រើនបង្កើតកូនបានច្រើន។លោក សាំង សូស័ក្កស្តេចល្ខោនបាសាក់ដែលដើរតួជាស្តេចល្ខោនបាសាក់គាត់មានប្រពន្ធដល់៩ យនិងមានកូនដល់ទៅជាង៣០នាក់រស់ក្រោមដំបូលតែមួ។ ប៉ុន្តែថ្មីៗនេះស្រាប់តែលេចមុខគ្រួសារក្រីក្រ មួយរស់នៅជា ប្តីមួយប្រពន្ធមួយរយៈពេលតែជាង២០ឆ្នាំសោះនៅភូមិថ្នល់លេខ៣ ឃុំកំពង់ស្ទោង ស្រុកពោធិ៍សាត់ ក្រុងពោធិ៍សាត់បង្កើតកូនបានដល់ទៅ២១នាក់ ។
ស្ត្រីខ្មែរដែលបង្កើតកូនបាន២១នាក់នេះឈ្មោះ ផាន់ ទៀន អាយុ៥០ឆ្នាំមាន ប្តីឈ្មោះ ខាន់ ខួយ បានស្លាប់រយៈ៣ឆ្នាំមកហើយ ដោយបន្សល់ទុកនូវកូនឲ្យរញង់រស់នៅជាមួយម្តាយមេម៉ាយ។អ្នកស្រីបានឲ្យកាសែតដឹងថា៖គាត់រៀបការឆ្នាំ១៩៨០ ក្រោយបែក ប៉ុល ពត បង្កើតបានកូនដល់ទៅ២១នាក់ ចិញ្ចឹមរស់ទាំងអស់គ្មានតក់គ្មាននាឡិមួយទេ ។អ្នកមីង ផាន់ ទៀន បានបញ្ជាក់ឲ្យដឹងថា៖ «កូនទាំង២១នាក់នោះ មានស្រី១១ ប្រុស១០នាក់។ ក្នុងនោះកូនច្បងអាយុ៣១ឆ្នាំ ចំណែកកូនពៅអាយុ៧ឆ្នាំ»។
ស្ត្រីដែលបង្កើតកូនបានច្រើនជាងជ្រូកវ័យ៥០រូបនេះក៏បានត្អូញត្អែរពីការលំបាកនឹងជីវភាពខ្វះមុខខ្វះក្រោយផងដែរ។ អ្នកស្រីនិយាយថា៖«ជីវភាពខ្ញុំក្រីក្រតាំងពីដូនតា ហើយមកខ្ញុំក៏កូនច្រើន វាមានភាពលំបាកណាស់សម្រាប់ខ្ញុំនិងប្តីខ្ញុំ។ កាលពីគាត់នៅរស់មួយថ្ងៃជើងគាត់មិនសូវជានៅជាប់ដីទេ ថ្ងៃណាក៏នៅលើចុងត្នោតដែរ ឡើងត្រង និងដាក់ទឹកត្នោតជួនយកមកលក់ដូរអង្ករដាំបាយចិញ្ចឹមកូនៗ»។
អ្នក មីង ទៀន បញ្ជាក់ថា៖ «ពេលគាត់នៅរស់ចំណូលចូលគ្រួសារយ៉ាងហោចណាស់ក៏បានមួយថ្ងៃ២ទៅ៣ម៉ឺនរៀលដែរ តែចំណូលនេះនៅមិនទប់នឹងការចំណាយទេ។ មួយថ្ងៃបើសន្សំសំចៃណាស់ក៏អស់៣៥០០០ដែរ ព្រោះអាហារក្នុងផ្ទះគឺចាំបាច់ត្រូវទិញគេទាំងអស់។ ចំណែកឯអង្ករដាំបាយចំនួនកន្លះតៅ(២៥កំប៉ុង)ទើបគ្រាន់ក្នុងមួយថ្ងៃ»។
អ្នកស្រី ទៀន បន្ថែមថា៖ «ក្រោយពីបាត់បង់កម្លាំងស្នូលប្តីស្លាប់ទៅគ្មានអ្នកឡើងត្នោតនោះ ពួកខ្ញុំកូនៗដើរស៊ីឈ្នួលគេខួបប្រាំងខួបវស្សាមួយថ្ងៃបាន២-៣ម៉ឺន ដែរ តែពេលនេះការចំណាយក្នុងគ្រួសារមិនដូចពីមុនទេ របស់របរឡើងថ្លៃណាស់»។
បើតាមការសង្កេតមើលពីសភាពសាច់ឈាម និងរូបរាងកាយ ដ្បិតថា មីង ផាន់ ទៀន បានចែករំលែកតំណក់ឈាមឲ្យទៅកូនៗដល់ទៅ២១នាក់ យ៉ាងណាក៏ដោយ តែស្ត្រីកូន២១នាក់រូបនេះ ហាក់នៅមានសាច់ឈាមទ្រលុកទ្រលន់មិនចាញ់ស្ត្រីស្របាលគ្នាដែលមានកូនតិចនោះឡើយ។ ផាន់ ទៀន បានឲ្យដឹងថា៖« ខ្ញុំរៀបការប្តីនៅឆ្នាំ១៩៨០ រៀបការតែប្តីម្នាក់ទេរៀបការហើយគឺផ្តើមមានកូនដំបូងតែម្តងតាំងពីកូនដំបូងរហូតកូនទី២១ ខ្ញុំមិនដែលពិបាកក្នុងការបង្កើតម្តងណាទេ ។ កំណើតកូនណាក៏ដូចកូនណាមិនដែលចេះចាញ់ឬ ទាស់អីម្តងណាទេ ធ្វើអ្វីក៏បាន»។
ចំណែក យាយ ទួម ដែលជាម្តាយនិងជាឆ្មបបង្កើតចៅទាំង២១នោះ ឲ្យដឹងថា៖«ខ្ញុំជាមនុស្សចាស់ ឲ្យតែកូនគេមានចៅនោះខ្ញុំទទួលស្គាល់ ខ្ញុំមិនដែលថាអ្វីទេ ព្រោះខ្ញុំមិនមែនជាអ្នករកស៊ីចិញ្ចឹមទេ ចង់គេមានកូនប៉ុន្មានមានទៅ ស្រេចតែគេ ហើយម្យ៉ាងកូនវាងាយកើតដូចគេឈឺពោះបត់ជើងហ្នឹង» ។ យាយ ទួម បន្តថា៖«កូនវាទាំង២១ហ្នឹង មិនដែលទៅរកឆ្មបមកពីណាទេ តែខ្ញុំបង្កើតហ្នឹង មានកំណើតកូនខ្លះកើតមិនមានឆ្មបផង។ សុខភាពទៀតក៏ល្អ តាំងពីកំណើតកូនទី១រហូតកូនទី២១នេះ ដូចមិនដែលឃើញវាឈឺរ៉ាំរ៉ៃយ៉ាងណាទេ សុខភាពល្អរហូតទាំងមិនដែលចាក់ថ្នាំវិទ្យាសាស្ត្រណាម្តងឡើយមានតែថ្នាំខ្មែរឫសឈើព្រៃដាំផឹក»។
លោក ស៊ូ ប៊ុនធឿនមេភូមិដែលគ្រប់គ្រងប្រជាជននៅក្នុងភូមិថ្នល់លេខ៣ បានឲ្យដឹងថា៖«អ្នកស្រី ផាន់ ទៀន និងប្តី ខាន់ ខួយ នេះពួកគេរៀបការការនៅឆ្នាំ១៩៨០។ ពេលនោះប្អូន ខាន់ ខួយ គេនៅជាទាហាន គេមិនមានបងប្អូនណាទីពឹងពុំនាក់ខ្ញុំក៏ស្តីដណ្តឹងនាង ផាន់ ទៀន កូន យាយ ទួម ឲ្យរៀបការតាមប្រពៃណី»។ លោកបន្តថា៖«ការមិនបានប៉ុន្មានគេក៏មានកូនកូនទីមួយកូនទី២ កូនទី៣នោះខ្ញុំនៅមិនទាន់ថាអីទេ លុះដល់ឃើញគេកូនច្រើនឡើងៗហើយជីវភាពខ្វះខាតនោះខ្ញុំក៏ធ្លាប់បានណែនាំដែរថា កុំឲ្យមានកូនច្រើនពេកល្មមៗពន្យារកំណើតខ្លះទៅតែប្តីគេមិនស្តាប់ទេ»។
គ្រួសារក្រីក្រមួយនេះបានសំណូមពរដល់សម្បុរសជនមេត្តាជួយឧត្ថម្ភដល់ពួកគាត់ផងដែរដើម្បីកូនគាត់មានលទ្ធភាពបានរៀនសូត្រនិងគេ។ប្រភពភ្នំពេញប៉ុស្តិ