ទីបញ្ចប់លោកយាយ ញឹម ហេង ហៅយាយទ្រព្យ ត្រូវបានកូនប្រុសតែមួយគត់របស់លោកយាយ ឱ្យគាត់ចាកចេញពីមន្ទីរពេទ្យ បន្ទាប់ពីគាត់( លោកយាយ ញឹម ហេង ហៅយាយទ្រព្យ )ត្រូវបានប្រជាពលរដ្ឋ រស់នៅក្បែរខាងយកលោកយាយទៅសង្គ្រោះបន្ទាន់ នៅមន្ទីរពេទ្យកាល់ម៉ែត្រកាលពីយប់ថ្ងៃទី១២ ខែកុម្ភៈ ឆ្នាំ២០១៥ កន្លងទៅ ។
លោក ញឹម ម៉ែន ត្រូវជាកូនប្រុសតែម្នាក់គត់របស់ លោកយាយ ញឹម ហេង ហៅយាយទ្រព្យ បានរៀបរាប់ ប្រាប់អ្នកសារព័ត៌មានថា ដោយសារតែរូបលោកជាមនុស្សក្រីក្រមិនមានលទ្ធភាព និងរកប្រាក់មកបង់ថ្លៃព្យាបាល ម្តាយ ទើបសម្រេចចិត្តយកម្តាយចេញពីមន្ទីរពេទ្យដោយឱ្យគាត់ទៅសម្រាកនៅផ្ទះប្រពន្ធរបស់គាត់នៅសង្កាត់ព្រៃ វែង ខណ្ឌដង្កោ រាជធានីភ្នំពេញ រង់ចាំតែថ្ងៃដែលគាត់ត្រូវលាចាកលោកយើងទៅ ។
លោក ញឹម ម៉ែន បន្ថែមថា ក្រោយថ្ងៃរំដោះ ៧មករា ១៩៧៩ ម្តាយរបស់គាត់គឺ លោកយាយ ញឹម ហេង ហៅយាយទ្រព្យ បានចូលមករស់នៅក្នុងភូមិគ្រឹះលេខ៣១ ស្ថិតក្នុងក្រុម ១ ភូមិ ២ ឃុំទឹកថ្លា ស្រុកប្ញស្សីកែវ (ដែលជាទីស្នាក់ការសង្កាត់ទឹកថ្លា បច្ចុប្បន្ននេះ)ហើយក៏បានទទួលលោកតា វ៉ាន់ ដែលជាបុគ្គលិកឃុំទឹកថ្លា ធ្វើជាស្វាមី ។ ក្រោយមករដ្ឋបានលក់សាលាសង្កាត់ទឹកថ្លា ដែលស្ថិតនៅផ្លូវសហព័ន្ធរុស្ស៊ី ឱ្យទៅក្រុមហ៊ុន តូយូតា ហើយក៏បានមកសុំខ្ចីផ្ទះរបស់ លោកយាយ ញឹម ហេង ហៅយាយទ្រព្យ ធ្វើជាទីស្នាក់ការសង្កាត់ទឹកថ្លា បណ្តោះអាសន្នសិន ។
ក្នុងអំឡុងឆ្នាំ១៩៩៩-២០០០ ពូ វ៉ាន់ និងម្តាយរបស់ខ្ញុំ បានលែងលះគ្នាពេលនោះលោក តាន់ ណារិន ចៅសង្កាត់ទឹកថ្លា បានសម្រេចឱ្យលោកយាយ ញឹម ហេង ហៅយាយទ្រព្យ ចាកចេញពីផ្ទះរបស់គាត់ដោយនិយាយ ថា រដ្ឋត្រូវការសុំធ្វើជាទីស្នាក់ការសង្កាត់រហូតហើយដោយប្តូរលោកយាយឱ្យទៅរស់នៅលើដីទីស្នាក់ការភូមិ ១០០ខ្នង ទំហំ ១៣ X ៣៩ម៉ែត្រ ដោយសន្យាថា និងធ្វើប្លង់កម្មសិទ្ធិឱ្យស្របច្បាប់ជូនគាត់(លោកយាយ ញឹម ហេង) ។
លោក ញឹម ម៉ែន បន្តថា ក្នុងអំឡុងឆ្នាំ២០០៣-២០០៤ រដ្ឋបានចុះធ្វើប័ណ្ណកម្មសិទ្ធិលក្ខណៈជាប្រព័ន្ធនៅក្នុង ភូមិ ១០០ខ្នង ពេលនោះលោកយាយក៏បានដាក់ពាក្យចុះបញ្ជីធ្វើប័ណ្ណកម្មសិទ្ធិដូចគេដែរ ដោយប្រគល់ឯកសារកិច្ច សន្យាទាំងអស់ដែលលោក តាន់ ណាវិន ធ្វើឱ្យនោះជូនទៅលោក ហាក់ ប៉ែត ប្រធានភូមិ ១០០ខ្នង ដើម្បីឱ្យគាត់ជួយរត់ ការធ្វើប្លង់កម្មសិទ្ធិឱ្យ ប៉ុន្តែលោក ហាក់ ប៉ែត មិនយកឯកសារកិច្ចសន្យាទាំងនោះទៅធ្វើប្លង់កម្មសិទ្ធិឱ្យលោកយាយ ញឹម ហេង នោះទេ បែរជាយកទៅលាក់ទុកបាត់ឈឹងរហូត ទើបលោកយាយ ញឹម ហេង ទៅជម្រាបលោក តាន់ ណាវិន ចៅសង្កាត់ទឹកថ្លា ។
ស្រាប់តែថ្ងៃទី ១៥ ខែធ្នូ ឆ្នាំ២០០៤ វេលាម៉ោង ៨ៈ៣០នាទីយប់ លោក ហាក់ ប៉ែត ប្រធានភូមិ ១០០ខ្នង បាននាំគ្នីគ្នាចំនួន ៨-៩នាក់ ចូលមកក្នុងផ្ទះរបស់លោកយាយ ញឹម ហេង ដោយមានកាប់កាំភ្លើង AK ចំនួន ៤ដើម ពេលនោះលោក ហាក់ ប៉ែត បានស្រែកហៅរក លោកយាយ ញឹម ហេង ហៅយាយទ្រព្យ រួចយកកាំភ្លើងបុកទ្វារផ្ទះ ហើយស្រែកថា យាយកញ្ចាស់ទ្រព្យចេញមកអញ និងបាញ់យាយកញ្ចាស់ឱ្យងាប់ ។ ពេលនោះខ្ញុំ (លោក ញឹម ម៉ែន)និងម្តាយរបស់ខ្ញុំបានលូនចេញតាមទ្វារក្រោយផ្ទះ ដើម្បីគេចខ្លួនចូលទៅក្នុងផ្ទះអ្នកជិតខាងឈ្មោះ ស៊ឹម ទូច ។
ព្រឹកឡើងម្តាយខ្ញុំ និងខ្ញុំបាទទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ទឹកថ្លា ប៉ុន្តែបានត្រឹមតែ ហៅមកសម្របសម្រួលប៉ុណ្ណោះ មិនបានបញ្ជូនសំណុំរឿងឡើងទៅលើនោះទេ ។ ទើបថ្ងៃទី ២៤ ខែធ្នូ ឆ្នាំ២០០៤ ម្តាយខ្ញុំបានដាក់ពាក្យបណ្តឹងចូលទៅនាយកដ្ឋានកណ្តាលនគរបាលយុត្តិធម៌ក្រសួងមហាផ្ទៃ ទើបលោក ហាក់ ប៉ែត រត់គេចខ្លួនបាត់រហូតឥឡូវនេះ ។ លោក ញឹម ម៉ែន បញ្ជាក់បន្ថែមថា ក្រោយមកម្តាយរបស់គាត់ក៏បានព្យាយាមសុំ លោក តាន់ ណារិន ចៅសង្កាត់ទឹកថ្លាដើម្បីធ្វើប័ណ្ណកម្មសិទ្ធិដីដែរ ប៉ុន្តែមិនបានសម្រេច ។ ទើបនៅថ្ងៃទី ០៣ ខែមេសា ឆ្នាំ២០០៥ ម្តាយខ្ញុំបានដាក់ពាក្យស្នើជួយអន្តរាគមន៍ទៅលោកអភិបាលខណ្ឌប្ញស្សីកែវ ហើយលោក ឃ្លាំង ហួត ក៏បានចារជូនលោកចៅសង្កាត់ពិនិត្យមើលករណី ដូចពាក្យស្នើសុំគួរសម្រួលជូន ប៉ុន្តែត្រូវបានលោក គង់ ទិទ្ធា អតីតអភិបាលរងខណ្ឌប្ញស្សីកែវចារតបមកវិញថា ដីនេះជាបញ្ជីសារពើភ័ន្តរបស់រដ្ឋ ។
ករណីនេះ ត្រូវបានប្រជាពលរដ្ឋដែលរស់នៅក្បែរខាងរបស់លោកយាយ ញឹម ហេង និយាយថា បើដីនេះជា បញ្ជីសារពើភ័ន្តរបស់រដ្ឋ ចុះភូមិគ្រឹះរបស់លោកយាយ ញឹម ហេង ដែលគេយកធ្វើជាសាលាសង្កាត់រាល់ថ្ងៃជាដីរបស់ អ្នកណាទៅវិញ ? ។ ប្រជាពលរដ្ឋបន្ថែមថា បើមិនធ្វើប័ណ្ណកម្មសិទ្ធិឱ្យគាត់ក៏ហីទៅចុះ បែរជាមិនឱ្យគាត់លក់ទៀត ឥឡូវនេះគាត់ធ្លាក់ខ្លួនឈឺខ្លាំងយ៉ាងនេះ បានលុយពីណាមកព្យាបាលខ្លួន ? បើអាជ្ញាធររួមគ្នាធ្វើបាបគាត់យ៉ាងនេះ ?។
តាមប្រភពពីប្រជាពលរដ្ឋដែលបានជូនលោកយាយ ញឹម ហេង មកមន្ទីរពេទ្យកាល់ម៉ែត្រ កាលពីយប់ថ្ងៃទី ១២ ខែកុម្ភៈ ឆ្នាំ២០១៥ បានប្រាប់អ្នកសារព័ត៌មានក្នុងលក្ខខណ្ឌមិនបញ្ចោញឈ្មោះថា សព្វថ្ងៃលោកយាយ ញឹម ហេង ហៅយាយទ្រព្យ គឺរស់នៅមហាសែនលំបាកវេទនាណាស់ គ្មានកូនចៅទីពឹង រីឯអាជ្ញាធរវិញ មានការបិទបាំង គ្រប់បែបយ៉ាង សូម្បីតែពេលគេចុះចែកអំណោយដល់ជនក្រីក្រម្តងៗ គឺមានការរារាំងបិទបាំងពីសំណាក់មេភូមិ ដោយមិនចុះឈ្មោះលោកយាយចូលក្នុងបញ្ជីជនក្រីក្រឡើយ ជាពិសេសអស់លោកអ្នកសារព័ត៌មានឃើញឧស្សាហ៍ ទៅសម្ភាសន៍ជាមួយលោកយាយណាស់ ។ ប៉ុន្តែពេលទទួលបានព័ត៌មានពីលោកយាយហើយ គេទៅជួប សម្ភាសន៍ជាមួយលោកមេភូមិ លោកចៅសង្កាត់ទឹកថ្លា ស្ងាត់ឈឹងមិនដែលឃើញផ្សាយម្តងណាឡើយ ។
ប្រជាពលរដ្ឋ ក៏ដូចជាលោក ញឹម ម៉ែន បានសំណូមពរតាមរយៈសារព័ត៌មានយើងនៅពេលនេះថា សូមឱ្យសប្បុរសជនដែលមានចិត្តសទ្ធាជ្រះថ្លា ជាពិសេសសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សូមមេត្តាជួយឧបត្ថម្ភគាំទ្រជាសមភាតរៈក៏ដូចជា ថវិកាជួយដល់លោកយាយដើម្បីព្យាបាលជំងឺ ។
ដោយឡែក លោកចៅសង្កាត់ទឹកថ្លា និងលោក លី សាវ៉េត អភិបាលខណ្ឌសែនសុខ យើងពុំអាចទំនាក់ទំនង សុំការបកស្រាយបានទេ កាលពីរសៀលថ្ងៃទី ០៣ ខែមីនា នេះ ដោយទូរស័ព្ទពុំមានអ្នកទទួល ៕
លោកយាយ ញឹម ហេង ហៅ យាយទ្រព្យ សំពះសូមសប្បុរសជនជួយជាថវិកាសម្រាប់ព្យាបាលខ្លួន
ភូមិគ្រឹះលេខ ៣១ របស់លោកយាយ ញឹម ហេង ត្រូវបានគេយកធ្វើជាសាលាសង្កាត់ទឹកថ្លាបច្ចុប្បន្ន
