រតនៈគិរី៖ក្រុមហ៊ុន ជា ច័ន្ទរិទ្ធឬក្រុមហ៊ុន៧២ ជាក្រុមហ៊ុនដែលទទួលបាន ដីសម្បទាន សេដ្ឋកិច្ចមួយកន្លែង ស្ថិតនៅភូមិ សាស្ត្រ ក្នុងភូមិ សាគ្រៀង ឃុំ កិចុង ស្រុកបរកែវ និងឃុំ សោមធំ ស្រុកអូរយ៉ាដាវ ន៉មិនបានអភិវឌ្ឍន៍អ្វីជាធំដុំទេប៉ុន្តែបាននឹងកំពុងលួច ធ្វើអាជីវកម្មកាប់ដឹកជញ្ជូន ឈើគ្មានច្បាប់ទៅវិញ ។ មិនត្រឹមតែប៉ុណ្ណោះដោយខឹងប្រជាពលរដ្ឋមិនព្រមកាប់ឈើលក់ឲ្យខ្លួនក្រុមហ៊ុនេះបានបិទផ្លូវមិនឲ្យប្រជាពលរដ្ឋឆ្លងកាត់ថែមទៀត។ប្រសិនចង់ឆ្លងកាត់ត្រូវបង់លុយពី១ទៅ២ម៉ឺនរៀលក្នុងម៉ូតូ១គ្រឿង។ប្រជាពលរដ្ឋជនជាតិដើមភាគតិច ទំពួន នៅភូមិសាគ្រៀង ឃុំកិចុង ស្រុកបរកែវ បានកើតទុក្ខមិនសុខចិត្ត និងមានការខឹងសំបាចំពោះក្រុមហ៊ុន៧២ដែល បានធ្វើការដាក់កុងត្រូលបិតផ្លូវមិនឲ្យប្រជាពលរដ្ឋធ្វើដំណើរឆ្លងកាត់ដីក្រុមហ៊ុនរបស់ខ្លួន ដោយហេតុផលថា ក្រុមប្រជាពលរដ្ឋបានធ្វើឲ្យខូចប្រយោជន៍របស់ខ្លួន។
ប្រជាពលរដ្ឋប្រមាណជាង៣០នាក់ តំណាងឲ្យប្រជាពលរដ្ឋក្នុងភូមិទាំងមូល កាលពីព្រឹកថ្ងៃទី០៧ ខែកក្កដា បាននាំគ្នាទៅតវ៉ា នៅមុខឃ្លាំងស្តុកឈើរបស់ក្រុមហ៊ុន ដើម្បីឲ្យ្រុមហ៊ុន៧២(ជាច័ន្ទរិទ្ធ) ធ្វើការបើកផ្លូវឡើងវិញ។ តំណាងប្រជាពលរដ្ឋចំនួន៣នាក់ បានឲ្យដឹងដូចគ្នាថា ក្រុមហ៊ុនខាងលើនេះ ដាក់កុងត្រូលបិតផ្លូវមិនឲ្យប្រជាពលរដ្ឋធ្វើដំណើរឆ្លងកាត់ដីក្រុមហ៊ុនទេ ពោលគឺការបិតផ្លូវនេះ ទុកសម្រាប់ច្រកចេញចូលតែជាង១ម៉ែត្រ តែប៉ុណ្ណោះ ប្រជាពលរដ្ឋចង់ដឹកកសិផលផ្សេងៗតាមរថយន្ត ក៏មិនបានឡើយ។
ករណីនេះលោក ស៊ីម លីន អភិបាលរងស្រុកអូយ៉ាដាវនិងកម្លាំងសមត្តកិច្ចដែលបាន ចុះត្រួតពិនិត្យ សុពលភាព រោងម៉ាស៊ីន អារ កែច្នៃ ឈើ និងផលិតគ្រឿង សង្ហារឹម របស់ក្រុមហ៊ុន ខាងលើ កាលពីព្រឹកថ្ងៃទី ១០ ខែ កក្កដា ឆ្នាំ ២០១៧ បានឲ្យដឹងថា៖ តាមការបញ្ជាក់របស់កំណត់ហេតុក្រុមការងារ ក្រុមហ៊ុន ជា ច័ន្ទរិទ្ធ មានលិខិតអនុញ្ញាតិពីក្រសួង កសិកម្មរុក្ខាប្រម៉ាញ់ និងនេសាទ អោយធ្វើអាជីវកម្មក្នុងឆ្នាំ ២០១៥-២០១៦ មានន័យថា លិខិតអនុញ្ញាតិបានផុតសុពលភាព ហើយ មិនមានលិខិតបន្តសុពលភាព ក្នុងឆ្នាំ ២០១៧នេះទេ ។
តែក្រុមហ៊ុនខាងលើ នៅតែកាប់ឈើ មកធ្វើការកែច្នៃ ដោយគ្មានការអនុញ្ញាតិ និងមិនមានសមត្ថកិច្ចណា ធ្វើការទប់ស្កាត់ និងបង្ក្រាបឡើយ ដែលបង្ហាញពីការឃុបឃឺតគ្នាប្រព្រឹត្តអំពើរពុករលួយរវាងក្រុមហ៊ុននិងមន្ត្រីជំនាញ។ជាក់ស្តែងពេលចុះឆែកក្រោយបែករឿងសមត្តកិច្ចរកឃើញឈើប្រណិតជាច្រើនម៉ែតគូបនៅក្នុងក្រុមហ៊ុន។
តាមការបំភ្លឺពីឈ្មោះ គឹម អាននាគថា ហៅម៉ាប់ ជាម្ចាស់រោង ម៉ាស៊ីនអារឈើ បានអោយដឹងក្នុងកំណត់ហេតុថា ខ្លួនកំពុងធ្វើលិខិតស្នើសុំ អារឈើ កែច្នៃឈើ ឆ្នាំ២០១៧ ហើយតែមិនទាន់ធ្លាក់មកទេ(ស៊ិក) ។
បន្ទាប់ពី ពិនិត្យឯកសារ និងធ្វើកំណត់ហេតុ រួចរាល់ក្រុមការងារ ថ្នាក់ស្រុក បានធ្វើកិច្ចសន្យាអោយ លោក គឹម អាននាគថា ហៅម៉ាប់ ដែលជាម្ចាស់រោងម៉ាស៊ីន ផ្អាកសកម្មភាព អារឈើទាំងស្រុង រងចាំមានលិខិត អនុញ្ញាតិពីថ្នាក់ក្រសួង និងអាជ្ញាធរ ពាក់ព័ន្ធ និងតម្រូវ អោយក្រុមហ៊ុន រុះរើបារ៉ាស់ ដែលខ្លួន បានដាក់បិទផ្លូវ មុខ រោងម៉ាស៊ីន ផងដែរ ។
លោក ឡេង យុគ នាយផ្នែករដ្ឋបាលព្រៃឈើ បរកែវ បានប្រាប់អ្នកសារព័ត៌មាន តាមទូរស័ព្ទ នាព្រឹកថ្ងៃទី ១១ ខែ កក្កដាឆ្នាំ ២០១៧ ថា លោកបានដឹងអំពីការផុត អជ្ញាប័ណ្ណ ឈប់អោយក្រុមហ៊ុន ជា ច័ន្ទរិទ្ធ ធ្វើអាជីវកម្មអារឈើ កែច្នៃឈើ នោះហើយ តែឈើ នៅក្នុងរោងចក្រ ជាឈើចាស់ នៅសល់ ប្រហែល ៧០០ ម៉ែត្រគូប ចំណែកគំនរឈើ ដែលនៅខាងក្រោយរោងចក្រ គឺជាឈើដែលលោក និងកម្លាំងអាវុធហត្ថចាប់បាន កាល ពីឆ្នាំទៅមិញ គឺមិនមានការកាប់ឈើថ្មីចូលរោងចក្រឡើយ ។
ផ្ទុយទៅវីញ លោក កែប កត់ នាយខណ្ឌ រដ្ឋបាលព្រៃឈើខេត្តរតនៈគីរីដែលសង្ស័យទទួលបានផលប្រយោជន៍ពីបទល្មើសដែលក្រុមហ៊ុន៧២ឬជាចន្ទរិទ្ធបង្កឡើងនោះបាន បានបដិសេធមិនបំភ្លឹតាមទូរស័ព្ទទេ នៅព្រឹកថ្ងៃ ១១ក្កដាដោយនិយាយ បែបអសុរសថា (អាញ់នៅវៀតណាម មកព្យាបាលជំងឺ រួចក៍បិទទូរស័ព្ទទូរស័ព្ទទៅ) ចំណែកលោក សយ សូណា ប្រធានមន្ទីរកសិកម្ម រុក្ខាប្រម៉ាញ់និងនេសាទ ខេត្តរតនគិរី នៅពេលអ្នកយកព័ត៌សួរមានតាមទូរស័ព្ទ សុំការបំភ្លឺ ករណីខាងលើនេះ បានគេចមិននិយាយដោយលោក ឆ្លើយថា កំពុងជាប់ប្រជុំ ។
លោក គឹម អាននាគថា ហៅម៉ាប់ តំណាងក្រុមហ៊ុនជាច័ន្ទរិទ្ធ ក៍បានអោយដឹងនាថ្ងៃដដែល ដែរថា លោក បានរត់ច្បាប់ដើម្បីបន្តអជ្ញាប័ណ្ណ ធ្វើអាជីវកម្ម ក្នុងឆ្នាំ ២០១៧ រយៈពេល ៤ ទៅ ៥ ខែហើយ តែមិនទាន់ធ្លាក់ច្បាប់មកទៀត ។ ហើយក្រុមហ៊ុន ក៍មិនទាន់មានការកាប់ឈើថ្មី ចូលមក្នុងរោងចក្រទៀតដែរ ពោលគឺឈើនៅក្នុង រោងចក្រទាំង ប៉ុន្មានគឺសុទ្ធតែជាឈើចាស់នៅសល់ ប្រហែល ៧០០ ទៅ ៨០០ ម៉ែត្រគូប ។
តាមប្រភពពីប្រជាពលរដ្ឋ ជាជនជាតិដើម ទំពួន ក្នុងភូមិសាគ្រៀង ឃុំកិចុង ស្រុកបរកែវបានលើកឡើងថា ខុសពីអ្វីដែលក្រុមហ៊ុនបានអះអាងថា គ្មានការកាប់ ឈើថ្មីចូល ក្នុងរោងចក្រ នោះថា៖កន្លងមកថ្មីៗនេះ ពួកគាត់បានឃើញ សកម្មភាពក្រុមហ៊ុននេះកាប់ឈើថ្មី អូសចូល ក្នុងរោងចក្រទាំងថ្ងៃទាំងយប់ យ៉ាងអណាធិបតេយ្យ។ មិនតែប៉ណ្ណោះ បានដាក់ បារ៉ាស់ ហាមឃាត់ ពួកគាត់មិនអោយធ្វើដំណើរផ្លូវ មុខរោងចក្រថែមទៀតផង ។
តែពេលនេះ ពួកគាត់អស់ក្តីកង្វល់ទៀតហើយ ដោយបានការអន្តាគមន៍ ពីអាជ្ញាធរស្រុក អូយ៉ាដាវ ចុះ រុះរើបារ៉ាស់ មុខរោងចក្រនោះ ចោលអស់ហើយ ។គួររំលឹកថា ក្រុមហ៊ុន៧២ឬករុងហ៊ុនជាចន្ទ័រិទ្ធ បានទទួលដីសម្បទានសេដ្ឋកិច្ចពីរាជរដ្ឋថាភិបាលចំនួន៥០០០ហិកតានៅក្នុងភូមិសាស្ត្រស្រុកបរកែវ និងស្រុកអូរយ៉ាដាវ។តែ ប្រជាពលរដ្ឋមានការងឿងឆ្ងល់ថា ក្រុមហ៊ុនបានដាំដុះកៅស៊ូហើយ លើផ្ទៃដីរបស់ខ្លួន ហេតុអ្វីក៏ក្រុមហ៊ុនកាប់ឈើ អារច្រៀករាល់ថ្ងៃដឹកយកទៅលក់នៅស្រុកយួនតើក្រុមហ៊ុន កាប់ឈើពីណាមក? ។ករណីមួយនេះបើមិនមានការឃុបឃឹតគ្នាពុករលួយទទួលលាភសក្ការៈទេពីសមត្តកិច្ចជំនាញនិងអាជ្ញាធរដែនដីខេត្តរតនៈគិរីទេក៏ក្រុហ៊ុននេះមិនអាចធ្វើបានដែរ៕