ខេត្តបន្ទាយមានជ័យ ៖ ប្រភពពីមន្ត្រីនគរបាលតូចតាច បម្រើការងារនៅក្នុងស្នងការដ្ឋាននគរបាល ខេត្តបន្ទាយមានជ័យបានឲ្យដឹងថា៖ ក្រុមមន្ត្រីនគរបាលសេដ្ឋកិច្ច ក្រោមការគ្រប់គ្រងរបស់លោក យឹម នីហៅធីបាននិង កំពុងខំប្រឹងប្រមូលលុយតាមគ្រប់រូបភាពដើម្បីយកសក្ការៈទៅជូនលោក ឧត្តមសេនីយ៍ផ្កាយ២អាត់ ខែម ស្នងការនគរបាល ខេត្តបន្ទាយមានជ័យ។
មានសេចក្តីរាយការណ៍ថា៖ការ ពិតក្នុងចំណោមមន្ត្រីនគរបាលប្រឆាំងបទល្មើស សេដ្ឋកិច្ចខេត្តបន្ទាយមានជ័យ លោក យឹមនី ហៅធីមានថានៈជានាយរងការិយាល័យទេតែគឺជាមនស្ស មានឥទ្ធិពលមហាសាល ជាងលោកនិង ឆេង សុវត្ថិ ដែលជាប្រធានការិយាល័យនិងចង់ខ្លាំងជាលោកចាបសុផារិទ្ធដែលជាស្នងការរងទទួលបន្ទុកផែនសេដ្ឋកិច្ចទៀតផង ។
ជាក់ស្តែងបច្ចុប្បន្ននេះមន្ត្រីនគរបាលសេដ្ឋកិច្ច បក្ខពួករបស់លោក យឹម នីហៅធីបាន បង្កើតកុងត្រូលជជុះជុំទិសរីកដូចផ្សឹតក្នុងទឹកដីខេត្តបន្ទាយមានជ័យដើម្បីប្រមូលលុយពីឈ្មួញ និងអាជីវករដែលដឹកជញ្ជូនទំនិញពីតំបន់ព្រំដែនខ្មែរសៀមឆ្លងកាត់ ខេត្តបន្ទាយមានជ័យ។
សមត្ថកិច្ចពាក់ព័ន្ធមួយចំនួនដែលមិនសប្បាយចិត្តនិងសកម្មភាពលោកស្នងការបានឲ្យដឹងថា លោក យឹមនីហៅធី គឺជាមន្ត្រីប៉ូលីសម្នាក់ស្និទនិងស្នងការ នគរបាលខេត្តបន្ទាយមានជ័យដែលឲ្យទទួលទទួលបន្ទុកបង្ក្រាបបទល្មើសសេដ្ឋកិច្ចនោះ កំពុងតែកាក់កបនិងមុខរបរជំនាញរបស់ខ្លួនបណ្តោយឲ្យមនុស្សជំនិត និងបក្ខពួកមួយចំនួន បង្កើតកុងត្រូលជជុះយ៉ាងគឃ្លើនគ្មានញញើតនឹងបទបញ្ជារបស់សម្តេចនាយករដ្ឋមន្ត្រី ហ៊ុន សែន ដែលបានតម្រូវឲ្យមន្ត្រីអាជ្ញាធរ និងសមត្ថកិច្ចគ្រប់បណ្តាខេត្តទូទាំងប្រទេសលុបបំបាត់កុងត្រូលជជុះទាំងស្រុងឡើយ ។
អ្នករកស៊ីឲ្យដឹងថា នៅខេត្តបន្ទាយមានជ័យ លោក យឹម នីហៅធី បានឃុបឃិតគ្នាឲ្យកូនចៅក្រោមឱវាទ បង្កើតប៉ុស្តិ៍ជជុះទី១នៅចំណុចភូមិសែសិន ផ្លូវជាតិលេខ៥ ខេត្តបន្ទាយមានជ័យ គ្រប់គ្រងដោយឈ្មោះ រស់ អៀមដែលជាអ្នកពូកែកោសរូសតាមឃ្លាំងស្កុបទំនិញក្នុងខេត្តនិងឡានដឹកឈើពិសេសឈើក្រញូង។ ទី២កុងត្រូលជជុះនៅគល់ស្ពានទី១ផ្លូវជាតិលេខ៦ បន្ទាយមានជ័យ-សៀមរាបគ្រប់គ្រងដោយឈ្មោះ រ័ត្ន និងប៉ុស្តិ៍ជជុះលេខ៣គ្រប់គ្រងដោយ លោក ឆេង សុវត្ថិ នៅចំណុចសាលាក្រហម ស្រុកអូរជ្រៅ ចំណែកប៉ុស្តិ៍ជជុះមួយទៀតនៅភូមិអូរបីជាន់ក្រោមដើមក្រខុបជាប់គល់ស្ពានគ្រប់គ្រងដោយ ឈ្មោះថា ។
តាមរយៈកុងត្រូលជជុះជាច្រើនកន្លែងដូចខាងលើនេះ គឺលោក យឹមនីហៅធី និងលោក ឆេង សុវត្ថិ ព្រមទាំងបក្ខពួក អាចប្រមូលលុយបានយ៉ាងច្រើនសន្ធឹកសន្ធាប់ យកទៅចែកគ្នាធ្វើមានធ្វើបានផ្ទាល់ខ្លួនហើយមួយផ្នែកធំ ដែលដាក់ខែពីក្រុមរកស៊ីម៉ូតូក្តៅ(របស់ថៃ) ត្រូវប្រគល់ជូនលោកផ្កាយ២ អាត់ ខែម ស្នងការនគរបាលខេត្តបន្ទាយមានជ័យ ។
មន្ត្រីរាជការនិងប្រជាពលរដ្ឋក្នុងខេត្តបន្ទាយមានជ័យបានឲ្យដឹងថា ឈ្មួញជាច្រើននាក់ដែលប្រករបររកស៊ីដឹកទំនិញ ពីតំបន់ព្រំដែនស្រុកម៉ាឡៃ ក្រុងប៉ោយប៉ែត ស្រុកអូរជ្រៅ ស្រុកថ្មពួក និងស្រុកស្វាយចេក ឆ្លងកាត់ផ្លូវជាតិលេខ៥និងផ្លូវជាតិលេខ៦ចូលទៅខេត្តបាត់ដំបង និងខេត្តសៀមរាបត្រូវក្រុមបក្ខពួកលោក ឆេង សុវត្ថិ ជំរិតយកលុយស្រេចតែអំពើចិត្ត។
បញ្ហានេះលោក នេត សាវឿន អគ្គស្នងការនគរបាលជាតិ មិនគួរបណ្តែតបណ្តោយតទៅទៀតទេ ព្រោះក្រុមមន្ត្រីនគរបាលប្រឆាំងបទល្មើសសេដ្ឋកិច្ច ខេត្តបន្ទាយមានជ័យ បាននឹងកំពុងតែឃុបឃិតគ្នាជាប្រពន្ធ័ ប្រព្រិត្តអំពើរពុករលួយ មិនខ្លាចក្រែងច្បាប់ប្រឆាំងអំពើពុករលួយបន្តិចសោះឡើយ ។
ពាក់ពន្ធ័និងបញ្ហាខាងលើ អតីតនគរបាលដែលត្រូវលោកអាត់ខែម ដកទូនាទី បានឲ្យដឹងថា មន្ត្រីនគរបាលប្រឆាំងបទល្មើសសេដ្ឋកិច្ចមានទូនាទី ទប់ស្កាត់ បង្ការ និងបង្ក្រាប រាល់បទល្មើសសេដ្ឋកិច្ច ប៉ុន្តែមន្ត្រីខាងលើគេមិនដែលបានឃើញ បង្ក្រាបបទល្មើសសេដ្ឋកិច្ចតាមដងផ្លូវបានម្តងណាទេ ជាក់ស្តែងក្រុមអ្នករត់ពន្ធ័ម៉ូតូពីប្រទេសថៃ ដូចហ្វូងគោនៅតាមតំបន់ឈរជើងរបស់ពួកគេ គឺមិនដែលបង្ក្រាបសោះឡើយ តើនេះឬជាកម្លាំងជំនាញ ? ៕
