ខេត្តបាត់ដំបង ៖ កិច្ចប្រជុំលើកទី ៨ របស់ក្រុមប្រឹក្សាសមាគម ក្រុមប្រឹក្សា ក្រុង ស្រុក ឃុំ សង្កាត់ ខេត្តបាត់ដំបង បានប្រព្រឹត្តទៅកាល ពីថ្ងៃទី ២៥ ខែកុម្ភះ នៅសាលាខេត្ត ក្រោមវត្តមានឯកឧត្តម អេ សារ៉ុម សមាជិក ក្រុមប្រឹក្សាខេត្តបាត់ដំបង។
លោក យស់ យឿន ប្រធានសមាគមក្រុមប្រឹក្សាខេត្តបានបញ្ជាក់ថា កិច្ចប្រជុំនាពេលនេះ គឺក្នុងគោលបំណងបូកសរុប លទ្ធផលការងារ ប្រចាំឆ្នាំ២០១៤ និងកំណត់ផែនការ សកម្មភាពការងារ ថវិការ ឆ្នាំ២០១៥។ ក្នុងនាមសមាគមក្រុមប្រឹក្សាថ្នាក់ មូលដ្ឋានខេត្តបាត់ដំបង សូមថ្លែងអំណរគុណចំពោះអង្គពិធីទាំងមូល ដែលបានចូលរួមគាំទ្ររាល់ដំណើរការ របស់សមាគម និងបានជំរុញឱ្យ សមាគមក្រុមប្រឹក្សាថ្នាក់មូលដ្ឋាន ខេត្តបាត់ដំបងយើងខ្ញុំ កាន់តែមានឆន្ទះមុះមុត ខិតខំប្រឹងប្រែង សំរេចឱ្យបាន តាមគោលបំណង និងទិសដៅរបស់ខ្លួន ព្រមទាំងផែនការយុទ្ធសាស្ត្រ និងសម្ពន្ធភាពជាតិ ក្រុមប្រឹក្សាថ្នាក់មូលដ្ឋាន នាពេលដ៏ខ្លី ខាងមុខនេះ។
សមាគម ក្រុមប្រឹក្សាក្រុង ស្រុក ឃុំ សង្កាត់ ខេត្តបាត់ដំបង បន្តនិរន្តរភាពពីសមាគមក្រុមប្រឹក្សា ឃុំ សង្កាត់ តាម រយៈមហាសន្និបាទ កាលពីថ្ងៃទី ១១ ខែ មេសា ឆ្នាំ២០១៤ ត្រូវបានចុះបញ្ជីរទទួលស្គាល់ជាផ្លូវការ ដោយក្រសួងមហាផ្ទៃ តាម រយៈលិខិតលេខ ០៣៤៥ ស,ជ,ណ ចុះថ្ងៃទី២៦ ខែមិថុនា ឆ្នាំ២០១៤។ តាមរយៈនៃកិច្ចប្រជុំថ្ងៃនេះ ខ្ញុំមានជំនឿថា សមាជិក សមាជិការសមាគម ក្រុមប្រឹក្សា និងយកអស់ស្មារតី ពិនិត្យសកម្មភាពផែនការ ប្រកបដោយការទទួលខុសត្រូវខ្ពស់។
ក្នុងប្រសាសន៍ប្រកាសបើក កិច្ចប្រជុំឯកឧត្តម អេ សារ៉ុម បានបញ្ជាក់ថា វត្តមានលោក លោកស្រីនាពេលនេះជា សក្ខីភាពឆ្លុះបញ្ចាំង ពីការប្តេជ្ងាចិត្ត របស់សមាជិកសមាជិការសមាគម ក្រុមប្រឹក្សា ក្រុង ស្រុក ឃុំ សង្កាត់ ក្នុងការងាររួមមួយ ឱ្យមានអង្គការមួយដែលជាតំណាង និងការពារផលប្រយោជន៍រួមរបស់ក្រុមប្រឹក្សា ឃុំ សង្កាត់ ខេត្តបាត់ដំបង។ដើម្បីលើកកំពស់ គុណភាពនៃជីវភាពរស់នៅ និង សុខុមាលភាព របស់ប្រជាពលរដ្ឋតាមរយៈអភិបាលកិច្ច តាមបែបវិមជ្ឈការ និង វិសហមជ្ឈការ ព្រមទាំងអភិវឌ្ឍន៍សមត្ថភាព និងបង្កើនសមត្ថភាព នៃ ការផ្តល់សេវាដល់ប្រជាពលរដ្ឋក្នុងមូលដ្ឋាន។
កិច្ចប្រជុំ នាពេលនេះ រៀបចំឡើងក្នុងគោលបំណង ពិនិត្យពិភាក្សា និងអនុម័ត សេចក្តីព្រាងផែនការ របស់សមាគម និងថវិការ ព្រមទាំងបានសំរួល រចនាសម្ព័ន្ធសំរាប់ឆ្នាំ២០១៥ របស់សមាគម ដូចជាប្រធានអនុប្រធានសមាជិកក្រុមប្រឹក្សា និងសមាជិកគណកម្មការប្រតិបត្តិ របស់រដ្ឋាភិបាលបានស្វាគមន៍ គំនិតផ្តួចផ្តើម របស់ក្រុមប្រឹក្សារដ្ឋាបាលថ្នាក់ក្រោមជាតិ ក្នុងការបង្កើតឱ្យមានស្ថាប័ណ្ណមួយ ដែល ជាតំណាងឱ្យក្រុមប្រឹក្សាទាំងអស់នៅថ្នាក់ខេត្ត និង ថ្នាក់ជាតិ។
ថ្ងៃនេះជាការពិនិត្យ និងអនុម័តចុងក្រោយលើផែនការបទបញ្ជាផ្ទៃក្នុង របស់សមាគមក្រុមប្រឹក្សា ក្រុង ស្រុក ឃុំ សង្កាត់ខេត្តបាត់ដំបង ខ្ញុំសូមលើកទឹកចិត្តដល់អង្គពិធីទាំងមូល សូមយកចិត្តទុកដាក់ ស្តាប់ហើយពិភាក្សា និង អនុម័ត ផែនការ យុទ្ធសាស្ត្របទបញ្ជាផ្ទៃក្នុង ដើម្បីបង្កើនការយល់ដឹងឹ ឱ្យកាន់តែស៊ីជំរៅ ពីតួនាទីភារៈកិច្ច និងដំណេរិការ របស់សមាគម ក្រុមប្រឹក្សា ក្រុង ស្រុក ឃុំ សង្កាត់ ក្នុងខេត្តបាត់ដំបងយើងនេះ ៕
