ភ្នំពេញ៖ប្រភពពីមន្ត្រីរដ្ឋបាលសាលាដំបូងរាជធានីភ្នំពេញលោកអ៊ី រិន ប្រធានលេខារដ្ឋានឲ្យដឹងថា៖ សំណុំរឿងពុករលួយពាក់ព័ន្ធនឹងការឃុបឃឹតជួញដូរឈើក្នុងខេត្តមណ្ឌលគិរីដោយបើកឲ្យយួនចូលមកកាប់ឈើនៅតំបន់អូរហ៊ុច ត្រួវបានបញ្ជូនមកដល់សាលាដំបូងរាជធានីភ្នំពេញ វិញហើយ។ករណីនេះដែរលោកមាស ប្រុស អ្នកនាំពាក្យសាលាដំបូងខេត្តមណ្ឌលគីរីក៏បានឲ្យកាសែតដឹងថា សំណុំរឿងខាងលើនេះត្រូវបានបញ្ជូនមកសាលាដំបូងក្រុងភ្នំពេញ កាលពីថ្ងៃសុក្រទី៧ក្កដាមកតែលោកមិន បញ្ជាក់អត្តសញ្ញាណ ចំពោះអ្នកជាប់ពាក់ព័ន្ធទាំង១១នាក់ដែលពាក់ពន្ធ័និងការទទួលលុយ១៧ម៉ឺដុល្លារអាមេរិកជាថ្នូនោះទេ។
សូមបញ្ជាក់ថាកាលពីខែកុម្ភៈឆ្នាំ២០១៧កម្លាំងចម្រុះចាប់បានយួនចំនួន ៧ នាក់ដែលថ្លើមធំហ៊ានបើកឡានបង្កង់ឆ្លងដែនខុសច្បាប់ចូលមកកាប់ដឹកឈើ ១៤៥ កំណាត់ក្នុងស្រុកអូររាំង។ក្រោយពីចាប់បាន មន្ត្រីនគរបាល និងយោធាព្រំដែនលេខ ១០៣ ជាង ១០ នាក់ដែលមានខ្លួនបានបិតសាប៊ូរត់ចោលអង្គភាព ។
បើតាមលទ្ធផលស្រាវជ្រាវដែលចុះហត្ថលេខាដោយនាយឧត្តមសេនីយ៍នេតសាវឿនអគ្គស្នងការនគរបាលជាតិផ្ញើជូនសម្តេចក្រឡាហោមសខេងរដ្ឋមន្ត្រីក្រសួងមហាផ្ទៃកាលពីថ្ងៃទី ៩ ខែមីនា បានឲ្យដឹងថាមានថាមន្ត្រីចំនួន ៣ នាក់បានឃុបឃិត និងទទួលប្រាក់ពីឈ្មួញឈើជនជាតិវៀតណាមឈ្មោះ អ៊ុក ញ៉ ចំនួន ១៧ ម៉ឺនដុល្លារព្រឹត្តបទល្មើស។
មន្ត្រីទាំង ៣ នាក់រួមមានឈ្មោះ ទា ខៃម៉េង ប្រធាន គ ៣ នៃយោធាក្នុងស្រុកកែវសីមា, ឯម សុងហ៊ួ ជាមន្ត្រីយោធាការពារព្រំដែនប្រចាំប៉ុស្តិ៍ អូរហ៊ុច និង ជុំ រតនា ជានាយប៉ុស្តិ៍នគរបាលការពារព្រំដែនអូរជុំ។ ទឹកប្រាក់ពុករលួយនេះត្រូវបានបែងចែកជា ២ ផ្នែកដែលក្នុងនោះចំនួន ៨៥ ០០០ ដុល្លារឲ្យមន្ត្រីយោធាគឺលោក ឯម សុងហ៊ួ និង ទា ខៃម៉េង។ រីឯទឹកប្រាក់ ៨៥ ០០០ ដុល្លារផ្សេងទៀតត្រូវលោក ជុំ រតនា ចែកទៅឲ្យលោក សាក់ សារុន មេបញ្ជាការអាវុធហត្ថស្រុកកែវសីមា ៥ ពាន់ដុល្លារលោក សាក់ សារ៉ាង មេបញ្ជាការអាវុធហត្ថខេត្ត ១ ម៉ឺនដុល្លារលោក ឌុល មន្ត្រីអាវុធហត្ថចល័តលើផ្ទៃប្រទេស ៧ ពាន់ដុល្លារលោក ណាក់ មន្ត្រីព្រៃឈើ ៦ ពាន់ដុល្លារ និងលោក លាង ភារ័ត្ន នាយប៉ុស្តិ៍នគរបាលការពារព្រំដែនអូរហុច ២២៥០០ ដុល្លារ។ នៅពេលដែលដឹកឈើចេញមេឈ្មួញរូបនោះក៏បង់លុយឲ្យមន្ត្រីទាំង ៣ នាក់នោះទៀតដែរ។
នាយឧត្តមសេនីយ៍ នេត សាវឿន សន្និដ្ឋានថា៖ «ឈ្មោះ ជុំ រតនា, លាង ភារ័ត្ន, ទា ខៃម៉េង, ឯម សុងហ៊ួ និងមេឈ្មួញវៀតណាម អ៊ុក ញ៉ ជាមេខ្លោងបានប្រព្រឹត្តអំពើឃុបឃិតគ្នាកាប់បំផ្លាញ ប្រមូល និងដឹកជញ្ជូនផលអនុផលព្រៃឈើ ឆ្លងដែនខុសច្បាប់ ទៅប្រទេសវៀតណាមពិតប្រាកដមែន»។
អគ្គស្នងការនគរបាលជាតិបានសំណូមពរ និងស្នើសុំគោលការណ៍ពីលោក ស ខេង រដ្ឋមន្ត្រីក្រសួងមហាផ្ទៃក្នុងការកសាងសំណុំរឿងរបស់លោក ជុំ រតនា និង លាង ភារ័ត្ន ទៅតុលាការដើម្បីចាត់ការតាមផ្លូវច្បាប់។ រីឯមន្ត្រីនគរបាល ៩ នាក់ត្រូវស្នើដាក់វិន័យដូចជាអប់រំ ព្រមាន និងផ្ទេរភារកិច្ចទៅកាន់កន្លែងផ្សេងក្នុងនោះមានឈ្មោះ ព្រំ វណ្ណៈ, យ៉ា សុផា, សា ផល្លា, ស្រេវ ម្នើប (នាយរងប៉ុស្តិ៍អូរជុំ), អន សំអាត, ប៊ុន ភារម្យ, សូត្រ ពន្លៃ, ពិត ជឿន, និង ពៅ ឆឡៃហៀង។
ចំពោះមន្ត្រីយោធា និងអាវុធហត្ថដែលពាក់ព័ន្ធគឺស្ថិតក្រោមចំណាត់ការរបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។
លោកប៉ែន ប៊ុណ្ណារ៍ មន្ត្រីអាដហុក ដែលតាមដានករណីនេះ បានចាត់ទុកថា ការបញ្ជូនករណីអំពើពុករលួយក្នុងការជួញដូរឈើនេះ ធ្វើឡើងដោយសារតែសមាសភាពពាក់ព័ន្ធដល់មន្ត្រីក្នុងស្ថាប័នតុលាការខេត្តមណ្ឌលគិរី។ លោកប៊ុណ្ណារ៍ យល់ឃើញថា ប្រសិនបើសំណុំរឿងនេះ បន្តទុកស៊ើបអង្កេតនៅក្នុងខេត្តមណ្ឌលគីរី នោះនឹងមិនអាចរកយុត្តធម៌ឃើញទេ។
យោងតាមលោក ជឹង សុចន្ថា អភិបាលរងខេត្តមណ្ឌលគិរីបានឲ្យកាសែតដឹងថាបញ្ជីឈ្មោះមន្ត្រី១១រូបដែលត្រូវបានស៊ើបអង្កេតនោះរួមមានលោក តូច យ៉ុន ស្នងការនគរបាលខេត្តដែលនឹងចាកចេញពីតំណែង លោក សាក់ សារ៉ាង មេបញ្ជាការកងរាជអាវុធហត្ថខេត្ត និងលោក ឈិត ម៉េងស្រេង មេបញ្ជាការយោធាខេត្ត។
លោក ជឹង សុចន្ថាបានថ្លែងថា វាក៏រួមមានលោក លាង ភារ័ត្ន ដែលជានាយប៉ុស្តិ៍ច្រកព្រំដែន អូរហ៊ុច ព្រមទាំងលោក ជុំ រតនា ជានាយរងប៉ុស្តិ៍ផងដែរ។ ឧត្តមសេនីយ៍ត្រី តូច យ៉ុន ត្រូវបានផ្ទេរមកកាន់នាយកដ្ឋាននគរបាលបច្ចេកទេសព្រំដែននៃនគរបាលជាតិរួចហើយ។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរីបាន ឲ្យដឹងថា៖ លោក ឡុង ហុកម៉េង ព្រះរាជអាជ្ញាអមសាលាដំបូងខេត្តត្រូវ បានកោះហៅមកសាកសួរដោយឧត្តមសេនីយ៍ សៅ សុខា ផងដែរ ប៉ុន្តែ លោកមិនច្បាស់ថា តើវាពាក់ព័ន្ធសំណុំរឿងថ្មីៗនេះឬយ៉ាងណានោះឡើយ។
ចៅក្រមស៊ើបសួរដែលត្រូវបានចាត់តាំងឲ្យទទួលបន្ទុកសំណុំរឿងនេះក្នុងរាជធានីភ្នំពេញ គឺលោក យ៉ា ណារិន បានមានប្រសាសន៍ថា សុំណុំរឿងនេះត្រូវបានបញ្ជូនមកកាលពីថ្ងៃសុក្រតាមការបង្គាប់របស់លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌ ប៉ុន្តែ លោកបានបដិសេធមិនធ្វើអត្ថាធិប្បាយអំពីចំនួនឬអត្តសញ្ញាណជនសង្ស័យទាំងនោះឡើយ។
