ខេត្តតាកែវ ៖ ជាមួយនិងការណែនាំឲ្យខិតខំពង្រឹងវិន័យឲ្យបានម៉ឹងម៉ាត់ ជៀសវាងប្រព្រឹត្តបទល្មើសផ្សេងៗនៅព្រឹកថ្ងៃទី៧ក្កដាឆ្នាំ២០១៧នេះ លោកនាយឧត្តមសេនីយ៍ នេត សាវឿន អគ្គស្នងការនគបាលជាតិ បានថ្លែងព្រមានដកសក្តិឬដេញចោលនូវមន្ត្រីនគបាល ណា ដែលប្រព្រឹត្តខុសពីវិន័យរបស់កងកម្លាំងនគបាលជាតិ ។អគ្គស្នងការនគរបាលជាតិថ្លែងបែបនេះ ធ្វើឡើងក្នុងពិធីប្រកាសតែងតាំងលោកឧត្តមសេនីយ៍ត្រីសុខសំណាងជាស្នង ស្នងការនគរបាលខេត្តតាកែវ ។
ឯលោកឧត្តមសេនីយ៍ទោ អ៊ុក សំណាង ដែលជាស្នងការខេត្តតាកែវចាស់ ត្រូវបានផ្ទេរទៅធ្វើជាស្នងការនគរបាលខេត្តមណ្ឌលគិរី ដោយដកលោកឧត្តមសេនីយ៍ត្រី តូច យ៉ុន ចេញពីស្នងការនគរបាលខេត្តមណ្ឌលគិរី ទៅជាអនុប្រធាននាយកដ្ឋានបច្ចេកទេសព្រំដែន ក្រសួងមហាផ្ទៃវិញ។
នេះបើយោងតាមសេចក្ដីប្រកាសផ្ទេរភារកិច្ច និងតែងតាំងរបស់សម្ដេចក្រឡាហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃ ដែលចេញកាលពីថ្ងៃទី៣ខែក្កដាឆ្នាំ២០១៧។លោកឧត្តមសេនីយ៍សុខសំណាងត្រូវបានគេស្គាល់ថាជាសាច់ញាតិលោកនាយឧត្តមសេនីយ៍សុខផលអគ្គស្នងការនគរបាលអន្តោប្រវេសន៍។
ក្នុងពិធីនោះ លោកនាយឧត្តមសេនីយ៍ នេត សាវឿន ថ្លែងថា មកដល់ម៉ោងនេះហើយ គ្មានការយោគយល់អីនោះទេ មន្ត្រីនគបាលណាម្នាក់ដែលប្រព្រឹត្តអ្វីមួយខុសច្បាប់ ឬខុសវិន័យកងកម្លាំងធ្ងន់ធ្ងរត្រូវដកស័ក្តិ ដកតួនាទី បណ្ដេញចោល ឬបញ្ជូនទៅតុលាការដើម្បីកាត់ទោសទៅតាមច្បាប់តែម្ដង៕
