សន្និបាតបូកសរុបលទ្ធផលការងារ របស់រដ្ឋប្ឋាលខេត្តបាត់ដំបងឆ្នាំ២០១៤ និង លើកទិសដៅការងារឆ្នាំ២០១៥ ប្រព្រឹត្តទៅរយៈពេល២ថ្ងៃ ១០-១១ ខែកុភ្ភៈ ២០១៥ បានធ្វើពិធីបិទ ក្រោមអធិបតីភាព ឯកឧត្តម ស ខេង ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី ១១ ខែកុម្ភៈ ឆ្នាំ២០១៥ នៅសាលាខេត្តបាត់ដំបង។
ឯកឧត្តម ច័ន្ទ សុផល អភិបាលនៃគណៈអភិបាលខេត្តបាត់ដំបង មានប្រសាសន៍ឱ្យដឹងថាៈ សន្និបាត បានធ្វើការវាយ តម្លៃ ដោយបានរំលេចឱ្យឃើញនូវលទ្ធផលដែលសំរេចបាន ក្នុងខេត្តដូចជាការងារសន្តិសុខ សណ្តាប់ធ្នាប់សាធារណៈ ក្នុងឆ្នាំ ២០១៤ នេះបទល្មើសកើតមានចំនួន ១៦៤លើក ធៀបនឹងឆ្នាំ២០១៣ កើនឡើង ១៨លើក ក្នុងនោះបទល្មើសឧក្រិដ្ឋមានឡើង ចំនួន ១៣៨ ករណី និងឃាត់ខ្លួនជនល្មើសបានចំនួន ២៤៦ នាក់ ។ គ្រោះថ្នាក់សង្គមកើតមានចំនួន ៤៦៣ លើក ក្នុងនោះមាន គ្រោះថ្នាក់ចរាចរណ៍ ២៧០ លើក ធៀបឆ្នាំមុនថយ ៦២ លើក បណ្តាលឱ្យមនុស្សស្លាប់ចំនួន ១២៩ នាក់ របួស ៤០២នាក់ ។ ការបង្ក្រាបបទល្មើសគ្រឿងញៀនបានចំនួន ៨៧ ករណី ដែលក្នុងនោះឃាត់ខ្លួនជនល្មើសបាន ១៥៥ នាក់ រឹបអូសនូវវត្ថុតាងមួយ ចំនួនទៀត។
ការងារចុះបញ្ជីដីធ្លីលក្ខណៈប្រព័ន្ធ បាននឹងកំពុងដំណើរការអនុវត្តក្នុងភូមិចំនួន ៣១ ភូមិ ក្នុងឃុំ-សង្កាត់ចំនួន ០៨ លើ ស្រុក-ក្រុងចំនួន ០៥ និងបានបញ្ជូលទិន្នន័យក្បាលដីសម្រេចចំនួន ១៧៧,៦០៧ ក្បាលដី ក្នុងនោះបាន ចែកប័ណ្ណជូនប្រជាពល រដ្ឋ រួចចំនួន ១៣៥,៨៧៦ ប័ណ្ណ។
ការងារកសិកម្មដាំដុះស្រូវរដូវវស្សាលើផ្ទៃដី ២៩៥,០៦១ ហ,ត ស្មើនឹង ១១៧,០៩ %នៃផែនការចំនួន ២៥២,០០០ ហិកតា តិចជាងឆ្នាំមុន ១,៨៩៣ ហិកតា ដោយសារបញ្ហាគ្រោះរាំងស្ងួតអូសបន្លាយ និងទឹកជំនន់ នៅស្រុកមួយចំនួន ហើយផ្ទៃដី អាចប្រមូលផលបានមានចំនួន ២៨៥,៣៥១ ហិកតា និងទិន្នផលស្រូវសរុប ៧១៥,០៨៩តោន។
ទិន្នផលស្រូវវស្សាមធ្យមមានចំនួន ២,៥០៦ តោន , ហិកតា បរិមាណផលស្រូវវស្សាចំនួន ៧១៥,០៨៩តោន តិចជាងឆ្នាំមុនចំនួន ៣៩,៦១១ តោន និងទិន្នផលស្រូវប្រាំងជាមធ្យម ៣,៨៧៧ តោន ហិកតា បរិមាណដែលស្រូវប្រាំងសរុប ៣៦,៨៣០តោន។
ឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍ ក្នុងពិធីនេះថាៈ សូមកោតសរសើរចំពោះ អាជ្ងាធរខេត្ត កងកំលាំងប្រដាប់អាវុធ និងថ្នាក់ដឹកនាំគ្រប់អង្គភាព ដែលបានយកចិត្តទុកដាក់ បំរើការងាររយៈកាលកន្លងមក ទទួលបានជោគជ័យ និងអភិវឌ្ឍន៍បានរីកចំរើនលើគ្រប់វិស័យ។
សូមសរសើរខេត្តបាត់ដំបង ដែលបានបំផុសធ្វើអនាម័យក្នុងក្រុងបានស្អាតល្អ ធ្វើឱ្យខេត្តបាត់ដំបងទទួលបានពាន់រង្វាន់ ជាក្រុងស្អាត និងខេត្តបាត់ដំបង បានចូលជាបតិកភ័ណ្ឌពិភពលោកមានភ្ងៀវទេសចរណ៍ច្រើន ធ្វើឱ្យប្រជាពលរដ្ឋ រកចំណូលគ្រប់ គ្រាន់ និងកាត់បន្ថយភាពក្រីក្រជូនដល់ពួកគាត់ថែមទៀត។
ឯកឧត្តម ស ខេង មានប្រសាសន៍បន្តទៀតថាៈ អាជ្ងាធរគ្រប់លំដាប់ថ្នាក់ ត្រូវរួបរួមគ្នាដោះស្រាយឱ្យបានសមស្រប
នូវបញ្ហាអ្វីមួយដែលប្រជាពលរដ្ឋកំពុងមានបញ្ហាកើតឡើង ត្រូវរួមគ្នាអនុវត្តកម្មវិធីកែទំរង់ស៊ីជំរៅ តាមនយោបាយចតុកោណ របស់រាជរដ្ឋាភិបាល និងបន្តការពារអនុវត្ត នយោបាយភូមិឃុំ មានសុវត្ថភាព នៅក្នុងតំបន់របស់ខ្លួនបន្ថែមទៀត។
ឯកឧត្តម បានផ្តាំផ្ងើរ ដល់សមត្ថកិច្ច ត្រូវទប់ស្កាត់ជនអន្តោប្រវេសន៍ខុសច្បាប់ឱ្យបានត្រឹមត្រូវ ត្រូវកាត់ផ្តាច់ ឱ្យបាន ច្បាស់លាស់ នូវបញ្ហាដីធ្លី ទៅនឹងបញ្ហានយោបាយ ទើបដោះស្រាយបានលទ្ធផល ល្អប្រសើរ ពិសេសតម្លៃសេវា រដ្ឋបាលត្រូវផ្តល់ ព័តមាន ជូនដល់ប្រជាពលរដ្ឋ ជាមុន និងច្បាស់លាស់ទើបពួកគាត់ពុំមានបញ្ហា ៕