កោះកុង ៖ មានសេចក្តីរាយការណ៍ពីអ្នកនេសាទនៅខេត្តកោះកុងបានលើកឡើងថាលោក ឡាង គិរីមេជលផលខេត្តគឺជាអ្នកបើកដៃឲ្យទូកនេសាទយួនសៀមចូលមកឈ្លានពានដែនសមុទ្រខ្មែរក្នុងខេត្តកោះកុងដោយដោះដូរនិងលាភសក្ការៈពីម្ចាស់ទូកនាសាទជាជនបរទេស គ្រប់ក្បាលទូកទាំងអស់ ។ នេះមិននិយាយពីការទាមទារឲ្យបង់សេវាផ្សេងៗទៀត ទៅតាមការទាមទាររបស់លោកនាយខណ្ឌឡើយ ។ការចោទប្រកាន់របស់ប្រជានេសាទគឺពួកគាត់ផ្អែកទៅលើកការកើតឡើងនូវបទល្មើសនៅដែនសមុទ្របង្កឡើងដោយទូកនេសាទបរទេសតែបែជាមិនឃើញមានចមណាត់ការអ្វីពីមេជលផលខេត្តកោះកុងឡើយគឺសំងំឈឹង។
ប្រជានេសាទខ្មែរនៅខេត្តកោះកុងនិយាយថា លោកឡាង គិរី នាយខណ្ឌរដ្ឋបាលជលផល បានប្រើឈ្មោះហ៊ិនឡាជា ប្រធានផ្នែកជលផលខេត្តកោះកុងប្រចាំការនៅស្រុកបុទុមសារគរឲ្យចុះប្រមូលប្រាក់ពីទូកនេសាទវៀតណាម, ថៃ ។ ប្រភពបានបញ្ជាក់ថា អ្នកនេសាទខ្មែរ និងខ្មែរ អ៊ីស្លាម នេសាទមិនបានផលប៉ុន្មានទេ ដោយសារតែពួកអ្នកនេសាទបរទេសមានឧបករណ៍នេសាទទំនើបៗ អាចចាប់ត្រីបានច្រើនក្នុងដែនសមុទ្រខ្មែរ ។
ប្រជានេសាទត្អួញត្អែរចំពោះផលលំបាកនៃការរកស៊ីក្នុងដែនទឹក ព្រោះសមត្ថកិច្ចជំនាញ បានលក់ដែនទឹកឲ្យទៅអ្នកនេសាទបរទេស្ទើរអស់ទៅហើយ ។ប្រ ជានេសាទ ខ្មែរដែលឃ្លាំមើល បទល្មើសនេសាទ បានឲ្យដឹងថា៖ ឃុំកោះស្តេច ស្រុកគិរីសាគរ ខេត្តកោះកុង ជាតំបន់ ដែលទូកនេសាទ វៀតណាម និងសៀម ចូលមកនេសាទ យ៉ាងអនាធិបតេយ្យ ។
ប្រភពបានឲ្យដឹងថា ឈ្មោះ ហិន ឡា ជាអ្នកចេញមុខសម្របសម្រួល ពោលជាអ្នកដើរប្រមូលប្រាក់ឲ្យលោក ឡាង គិរី ក្នុងមួយខែៗរាប់សែនបាត(ប្រាក់ថៃ) ។ ពួកអ្នកនេសាទវៀតណាម និងថៃ ចូលមកនេសាទក្នុងដែនទឹកខ្មែរ ដោយមិនញញើតអ្នកនេសាទខ្មែរជាម្ចាស់ស្រុកនោះឡើយ ។
ទាំងនេះដោយសារតែការបើកដៃហួសហេតុ របស់មន្ត្រីរដ្ឋបាលជលផល ពោលគឺលោកឡាង គិរី ជាមេ នេះឯង ។ សង្ឃឹមថាពតិមានស្តីពីទូកនេសាទយួនសៀមឈ្លានពានដែនទឹកខ្មែរក្នុងខេត្តកោះកុងនេះនឹងមានចំណាត់ការស្រាវជ្រាវលប់បំបាត់ពីលោកស្រីចៅហ្វាយខេត្តវ័យក្មេងមិថុនាភូថងដែលនឹងក្លាយជាប្រធានគណបញ្ជាការឯកភាពខេត្តត្រួតត្រាទាហ៊ាននគរបាលជាមិនខាន៕
