ភ្នំពេញ៖ឈ្មោះ ហេង សំនាង ហៅយាយព្រឿង ដែលគេស្គាល់ថាជាឈ្មួញឈើដ៏ធំនៅភូមិភាគឦសាននិងមានទីតាំងស្តុកឈើជាច្រើនកន្លែងនៅក្នុងខេត្តស្ទឹងត្រែងទីបំផុតនៅរសៀលថ្ងៃទី២៧ ខែមិថុនា នេះត្រូវជាប់គុក២ឆ្នាំនិងពិន័យប្រាក់ចំនួន៥០លានរៀល ។ យាយព្រឿង ត្រូវបានកម្លាំងក្រុមស្រាវជ្រាវព័ត៌មាន និងបង្ក្រាបបទល្មើសព្រៃឈើ របស់កងរាជអាវុធហត្ថលើផ្ទៃប្រទេស ធ្វើការឃាត់ខ្លួនកាលពីវេលាម៉ោង៤ទាបភ្លឺថ្ងៃទី១៣ ខែតុលា ឆ្នាំ២០១៦ នៅក្នុងបរិវេណសង្កាត់រដ្ឋបាលព្រៃឈើអូរពងមាន់ ខេត្តស្ទឹងត្រែង បន្ទាប់ពីមេឈ្មួញដ៏ធំរូបនេះ បានយករថយន្ត២គ្រឿង និងកម្មករ៧នាក់មានបំណងទៅរំដោះយកឈើ ដែលសមត្ថកិច្ចបង្ក្រាបចាប់ ហើយនាំយកទៅរក្សាទុក នៅក្នុងសង្កាត់រដ្ឋបាលព្រៃឈើអូរពងមាន់នោះ។
ក្រោយការចាប់ខ្លួន យាយព្រឿង ត្រូវបានគេផ្ទេរសមត្ថកិច្ចតុលាការពីខេត្តស្ទឹងត្រែង មកកាន់តុលាការរាជធានីភ្នំពេញវិញលោក ពេជ្រ វិជ្ជាធរ ចៅក្រមជំនុំជម្រះសាលាដំបូងរាជធានីភ្នំពេញគឺជាអ្នកសម្រេចជោកវាសនាយាយព្រឿងនៅក្នុងសវនាការ។យាយព្រឿង ដែលមានឈ្មោះ ហេង សំនាង មានអាយុ៥៧ឆ្នាំ ជនជាតិវៀតណាម អាស័យដ្ឋានស្នាក់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង។
ឥឡូវយាយព្រឿងជាប់គុកហើយនៅឡើយតែយាយម៉ៃឈ្មួញឈើល្បីឈ្មោះនៅខេត្តឧត្តរមានជ័យដែលមានបញ្ជារពីលោកសថាវីចៅហ្វាយខេត្តឧត្តរមានជ័យឲ្យតាមចាប់ខ្លួននិងព្រះរាជអាជ្ញាខេត្តកំពង់ធំចេញដីការឲ្យចូលខ្លួនពាក់ពន្ធ័និងការប្រព្រឹត្តបទល្មើសព្រៃឈើបែរជានៅស្ងាត់ឈឹងនៅឡើយមិនដឹងថាយាយម៉ៃគាត់ខ្លាំងឬចៅហ្វាយខេត្តនិងព្រះរាជអាជ្ញារខេត្តកំពង់ធំខ្សោយនោះទេ?៕
