រាជធានីភ្នំពេញ៖ជនជាតិចិនសឹង្ហបុរីម្នាក់ត្រូវបាននគរបាលការិយាល័យព្រហ្មទណ្ឌកម្រិតធ្ងន់ ក្រសួងមហាផ្ទៃ ឃាត់ខ្លួនកាលពីព្រលប់ថ្ងៃទី២៣ មិថុនា ២០១៧ នៅព្រលានយន្តហោះអន្តរជាតិភ្នំពេញពាក់ពន្ធពី.ឆបោក.ប្រាក់អតិថិជនរបស់ក្រុមហ៊ុន ស៊ីឃ្យួរខម មេឌា ខេមបូឌា (SECURECOM MEDIA)CO.LTDជាង៣លាន២សែនដុល្លាអាមេរិក ហើយបំរុងឡើង យន្តហោះគេចខ្លួន ។
ជនសង្ស័យរូបនោះឈ្មោះ ENG WEI KHIONG ភេទប្រុស អាយុ៣៤ឆ្នាំ ក្រោយពីឃាត់ខ្លួននៅព្រឹកថ្ងៃទី២៥ មិថុនាសមត្តកិច្ចបានបញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរលើបទ.ឆបោក ប្រាក់នោះត្រូវលោក ហ៊ឹង ប៊ុនថន ព្រះរាជអាជ្ញារងធ្វើការសាកសួរ ។
ប្រភពពីសមត្ថកិច្ចបានឲ្យដឹងទៀតថា នៅពេលឃាត់ខ្លួននេះគឺឃាត់បានឈ្មោះ YEO BOON YONGនិងឈ្មោះ ENG WEI KHIONG ។ នៅពេលនោះមានឧកញ៉ាឌួង ឆាយចេញមុខធ្វើអន្តរាគមន៍ជួយដោះស្រាយកុំឲ្យសមត្ថកិច្ចឃាត់ឈ្មោះ YEO BOON YONGគឺគ្រាន់តែដកលិខិតឆ្លងដែនទុកបានហើយដោយសន្យាថានឹងនាំឈ្មោះ YEO BOON YONGមកបំភ្លឺនៅចំពោះមុខសមត្ថកិច្ចឬតុលាការនៅពេលក្រោយ។ប៉ុន្តែឧកញ៉ាឌួង ឆាយមិនបានគោរពតាមការសន្យាទេបែរជាលាក់បំពួនឈ្មោះ YEO BOON YONGទៅវិញ។
ដោយឡែកឈ្មោះ ENG WEI KHIONG ក្រោយពេលសាកសួរចប់ហើយ នាល្ងាចថ្ងៃដដែលនោះ តំណាងអយ្យការបានប្រគល់ជនសង្ស័យទៅសមត្ថកិច្ចវិញ លុះព្រឹកថ្ងៃទី២៦ មិថុនា ឲ្យយកមកសាកសួរបន្ត រហូតដល់ថ្ងៃត្រង់លោក ហ៊ឹង ប៊ុនថន បានចោទប្រកាន់ជនសង្ស័យជាផ្លូវការក្រោមបទឆបោក តាមាត្រា៣៧៧.៣៧៨ នៃក្រមព្រហ្មទណ្ឌ។ ពេលតំណាងអយ្យការចោទប្រកាន់ហើយ ជនសង្ស័យបានចាត់បញ្ជូនទៅខាងចៅក្រមស៊ើប ដើម្បីសម្រេចឃុំខ្លួនដាក់ពន្ធនាគារជាបណ្តោះអាសន្ន។ ខណៈចៅក្រមមិនទាន់បានសាកសួរផង ជនសង្ស័យបានដួលសន្លប់នៅមុខបន្ទប់ ធ្វើឲ្យមានការភ្ញាក់ផ្អើល ពេលនោះបានលេចមុខលោកឧកញ៉ា ឌួង ឆាយ ទៅខ្នះខ្នែងហៅរថយន្តសាមុយដឹកជនសង្ស័យទៅសង្រោះនៅមន្ទីរពេទ្យកាល់ម៉ែត។
សមត្តកិច្ចឲ្យដឹងថា ជនសង្ស័យមានជំងឺបេះដូង ដែលជំងឺនេះឲ្យតែមានការភ័យខ្លាច គឺប្រតិកម្មភ្លាម ។ ឧកញ៉ា ឌួង ឆាយ តាមជនសង្ស័យទៅដល់មន្ទីរពេទ្យ ក្នុងគោលបំណងជួយផ្គត់ផ្គង់ទាំងអាហារ និងការព្យាបាលលើជនសង្ស័យ ដែលលោកឧកញ៉ាបន្លយពាក្យថា គេ (ENG WEI KHIONG)ជាមិត្តភក្តិ ទំនាក់ទនងការងាររកស៊ីជាមួយគ្នា បានជាតាមជួយមើលដូច្នេះ ។
បើទោះបីជនសង្ស័យគាំងបេះដូងដួលសន្លប់ចូលពេទ្យយ៉ាងនេះក្តី នីតិវិធីរបស់តុលាការនៅដំណើរទៅមុខ នៅវេលារសៀលថ្ងៃដដែលនោះ លោក ហន សុខេមរិន ចៅក្រមស៊ើបសួរ បានសម្រេចចេញដីការឃុំខ្លួនលើជនជាតិសឹង្ហបុរីរូបនោះ នៅពេលសុខភាពជនសង្ស័យបានធូរស្រាល តម្រូវឲ្យសមត្ថកិច្ចនាំទៅពន្ធនាគារតែម្តង។សូមបញ្ជាក់ដែរថាកាលពីព្រឹកថ្ងៃទី២៦មិថុនាក្នុងពីធីបិទវគ្គសិស្សសាលភូមិន្ទរដ្ឋបាលលោកឌួងឆាយដែលជាឧកញ៉ាវ័យក្មេងត្រូវជាកូនប្រុសលោកឧកញ៉ាដួងងៀបមន្ត្រីនគរបាលជាន់ខ្ពស់និងជាមេក្រុមហ៊ុនម៉ៅការផ្សាយប៉ាណូពាណិជ្ជកម្មក្នុងរាជធានីត្រូវបានសម្តេចតេជោហ៊ុនសែនកោតសសើថាជាក្មេងដែលចេះកែខ្លួន ។
ប្រភពព័ត៍មានពីសមត្តកិច្ចបានបង្ហើបឲ្យដឹងថា ដើមចមក្នុងសំណុំរឿងនេះ គឺលោកមេធាវី សំ មនោរម្យ និងលោក មេធាវី ដារ៉ា សុបញ្ញា ជាមេធាវីតំណាងដោយអាណត្តិឲ្យក្រុមហ៊ុន ស៊ីឃ្យួរខម មេឌា បានប្តឹងលើជនសង្ស័យឈ្មោះ ENG WEI KHIONG ជានាយកក្រុមហ៊ុនខាងលើនេះ ដែលបានមកស្នាក់នៅអាគារ SILVER TOWN ស្ថិតតាមផ្លូវលេខ៦៣(មហាវិថីត្រសក់ផ្អែម) សង្កាត់បឹងងកេងកង១ ខណ្ឌចំការមន រាជធានីភ្នំពេញ ពីបទ.ឆបោក និងរំលោភទំនុកចិត្ត ពីអតិថិជនរបស់ក្រុមហ៊ុនជាង១០០នាក់ លើទឹកប្រាក់ជាង៣លាន២សេនដុល្លារអាមេរិក ។
ក្នុងពាក្យបណ្តឹងបានបញ្ចាក់ថា កាលពីអំឡុងខែសីហា ឆ្នាំ២០១៦ ក្រុមហ៊ុន ស៊ីឃ្យួរខម មេឌា បានប្រកាសផ្សាយពាណិជ្ជកម្មធ្វើអាជីវកម្មលក់ភាគហ៊ុន ដែលមានទីតាំងស្ថិតនៅក្នុងក្រុមហ៊ុន FUGI ។ បន្ទាប់ពីមានការផ្សព្វផ្សាយធ្វើឲ្យអតិថិជនជឿទុកចិត្តរួចមក ក៏មានអតិថិជនមួយចំនួនបានបើកគណនី និងដាកប្រាក់ក្នុងក្រុមហ៊ុននោះជាច្រើនលានដុល្លារ ដើម្បីធ្វើអាជីវកម្មវិនិយោគតាមការផ្សព្វផ្សាយរបស់ក្រុមហ៊ុន ស៊ីឃ្យួរខម មេឌា (ខេមបូឌា) ។
ក្រោយពេលដំណើរការបានមួយរយៈប្រហែលជា៣ទៅ៤ខែ ដល់ខែវិច្ឆិកា ឆ្នាំ២០១៦ ក្រុមហ៊ុននេះក៏បានប្តូរលក្ខន្តិកៈ និងដកលោក ឯក សារឿន ជា នាយកចេញ ហើយដាក់ឈ្មោះ ENG WEI KHIONG ជំនួសវិញ ។ ចាប់តាំងពីនោះមកក្រុមនេះបានផ្លាស់ប្តូរលក្ខន្តិកៈ និងគោលការណ៍ផ្ទៃក្នុងជាញឹកញាប់ផ្ទុយពីខ្លឹមសារកិច្ចព្រមព្រៀងចុះថ្ងៃទី១ ខែសីហា ២០១៦ ទាំងស្រុង ។ មិនតែប៉ុណ្ណោះសូម្បីតែការប្រាក់ចំណេញ ដែលកាលពីមុនក្រុមហ៊ុនកំណត់ឲ្យដកក្នុងរយៈពេល១០ថ្ងៃម្តង ក្នុង១ខៃ ឥឡូវនេះរយៈពេលមិនពិតប្រកដ ពន្យាពេលលើសរយៈពេល១០ថ្ងៃ ដោយមិនកំណត់ពេលជាក់លាក់ទាល់តែសោះ ។
ពិសេសទៀតនោះនាយកក្រោយគឺឈ្មោះ ENG WEI KHIONG ជនជាសឹង្ហបុរីនេះប្រើល្បិចកលលួងលោមអតិថិជន ដោយភូតកុហក់ថាក្រុមហ៊ុនធំនៅប្រទេសអង់គ្លេសមិនព្រមបង្វែប្រាក់ឲ្យមកអតិថិជនទេ ដោយកំណត់ឲ្យអតិថិជនទាំងអស់បង្វែប្រាក់ចំណេញ ទៅដាក់ជាហ៊ុនបន្ថែមនៅទីផ្សារធំប្រទេសអង់គ្លេស រង់ចាំស្ថានភាពនឹងនរ ទើបឲ្យដកប្រាក់មកឲ្យអតិថិជននៅពេលក្រោយវិញ ។
បញ្ហាទាំងអស់នេះហើយដែលធ្វើឲ្យអតិថិជន មានការលំបាកយ៉ាងខ្លាំងក្នុងការតាមដានព័ត៍មាន ដើម្បីដកប្រាក់ពីគណនីរបស់ខ្លួនមកវិញ ។
ពាក្យបណ្តឹងបានបញ្ជាក់ទៀតថា ម្យ៉ាងទៀតឈ្មោះ ENG WEI KHIONG ជានាយក ហាក់បីដូចជាមានចេតនាចង់ដោះដៃ មិនទទួលខុសត្រូវលើទឹកប្រាក់ដែលអតិថិជន ដែលបានដាក់ចូលក្នុងគណនីក្រុមរបស់ខ្លួន និងបំរុងរត់គេចខ្លួនចេញពីប្រទេសកម្ពុជាទៀតផង ។ ទង្វើ និងសកម្មភាពរបស់ឈ្មោះ ENG WEI KHIONG ជានាយកក្រុមហ៊ុនធ្វើនេះ គឺចេតនាទុច្ចរិត ប្រើល្បិចកលធ្វើឲ្យអតិថិជនជឿទុកចិត្តហើយដាក់ប្រាក់វិនិយោគជាមួយក្រុមហ៊ុនខ្លួន ប៉ុន្តែបែជាបង្វែប្រាក់ទាំងអស់នោះ ទៅធ្វើសកម្មសិទ្ធិផ្ទាល់ខ្លួននៅឯបរទេស ហើយគេចវេសមិនព្រមទទួលខុសត្រូវបណ្តាលឲ្យខូចខាត និងបាត់បង់ផលប្រយោជន៍របស់អតិថិជនយ៉ាងធ្ងន់ធ្ងរជាទីបំផុត ។
លោកវរៈសេនីយ៍ឯក ជីវ វិបុល ប្រធានការិយាល័យនគរបាលព្រហ្មទណ្ឌកម្រិតធ្ងន់បានឲ្យថា ក្រោយពេលទទួលបានពាក្យបណ្តឹងនោះ ទើបសមត្តកិច្ចរបស់លោកឈានទៅដល់ការឃាត់ខ្លួនជនសង្ស័យ នៅព្រលានយន្តហោះអន្តរជាតិភ្នំពេញ និងនាំមកជូនតុលាការចាត់ការតាមផ្លូងច្បាប់ ៕