ក្រចេះ ៖ សមត្ថកិច្ចជំនាញនិងមន្ត្រីពាក់ព័ន្ធនៅខេត្តក្រចេះ ហាក់បីដូចជាមិនទាន់មានចំណាត់ការលើវិធាន ការបង្ក្រាបក្បួនរថយន្តសាំយ៉ុងដឹកឈើខុសច្បាប់យ៉ាងអានាធិបតេយ្យនៅឡើយទេ បើទោះបីក្បួនរថយន្តដឹកឈើ ខុសច្បាប់ទាំងនេះ នៅតែបន្តដឹកជញ្ជូនឈើទាំងយប់ទាំងថ្ងៃនោះមិនក្រោមពី១០០គ្រឿងទេហើយតែងតែបង្កគ្រោះថ្នាក់តាមដងផ្លូវជាញឹកញ៉ាប់។
ប្រភពព័ត៌មានបានឲ្យដឹងថា រាល់ការដឹកជញ្ជូនឈើខុសច្បាប់តាមរថយន្តសាំយ៉ុងពីក្រុមឈ្មួញដែលគេស្គាល់សុទ្ឋ សឹងជាឈ្មួញរស់នៅខេត្តត្បូងឃ្មុំនិងខេត្តព្រៃវែង បានមកប្រកបរបររកស៊ីដឹកឈើខុសច្បាប់ចេញពីព្រំប្រទល់ខេត្តក្រចេះ ស្ទឹងត្រែងឆ្លងកាត់ស្រុកសំបូរ និងក្រុង ក្រចេះ ឆ្ពោះទៅស្រុក ឆ្លងដើម្បីបន្តទៅលក់នៅខេត្តព្រៃវែង និងខេត្ដត្បូងឃ្មុំ បានដោយរលូននោះ គឺមកពីក្រុមឈ្មួញ មានការឃុំឃិតជាមួយមន្ត្រីស្ទើរតែគ្រប់ស្ថាប័នពាក់ព័ន្ធក្នុងខេត្តទៅហើយ។
ហេតុនេះហើយទើបមានការដឹកជញ្ជូនជាក្បួនយ៉ាងអានាធិបតេយ្យបើកប្រដេញគ្នាប្រសាចពេញផ្លូវជាតិលេខ៧ជាពិសេសក្នុងក្រុងក្រចេះតែម្ដងហើយបើក ក្នុងល្បឿនលឿនថែមទៀតផង។ ថែមទាំងបង្កគ្រោះថ្នាក់ជាញឹក ញ៉ាប់ដល់អ្នកធ្វើដំណើរនិងប្រជាពលរដ្ឋរស់នៅក្បែរចិញ្ចើមផ្លូវជាញឹកញាប់ទៀតផង។
ប្រភពបានបន្តទៀតថា ក្រៅតែពីការធ្លាប់បង្កគ្រោះថ្នាក់បុកចូលផ្ទះប្រជាពលរដ្ឋបង្កឲ្យគ្រោះថ្នាក់ម្ចាស់ផ្ទះទាំង មិនដឹងខ្លួន បើកក្រឡាប់ដោយខ្លួនឯងបង្កឲ្យអ្នកដ៍ទៃរងគ្រោះថ្នាក់ និងការបើកបុកកៀរលើ រថយន្តសមត្ថកិច្ចនៅក្បែរចិញ្ចើមផ្លូវបង្កឲ្យខូចខាតដោយមិនមានអ្នកទទួលខុសត្រូវនោះ។
ជាក់ស្តែង កាលពីព្រឹកថ្ងៃទី២១ខែមិថុនា ឆ្នាំ២០១៧នេះមានក្បួនរថយន្តសាំយ៉ុងជាច្រើនគ្រឿងបានបើកប្រជែងគ្នា យ៉ាងអាណាធិបតេយ្យនៅចំណុចស្ពានពាមទេស្ថិតក្នុងភូមិរការកណ្តាលក្រុងក្រចេះខេត្តក្រចេះ។
លោក ផូង គឹមឡាយ នាយសង្កាត់រដ្ឋបាល ព្រៃឈើឆ្លូងបានប្រាប់កាលពីព្រឹកថ្ងៃទី២១ ខែមិថុនា ឆ្នាំ២០១៧ ឲ្យដឹងថា រាល់ចំណាត់ការក្នុងការបង្ក្រាបក្បួនរថយន្តដឹកឈើល្មើសច្បាប់យ៉ាងអាណាធិបតេយ្យទាំងនោះទាល់តែមានការជួយសហការពីកងកម្លាំងប្រដាប់អាវុធទើបអាចចំណាត់ការលើក្រុមឈ្មួញបាន ។
លោកបានបន្ថែមថា រយះពេល៦ខែចុងក្រោយនេះ កម្លាំងរបស់លោកបានសហការជាមួយកងកម្លាំងប្រដាប់អាវុធឃាត់បានរថយន្តដឹកឈើល្មើសច្បាប់ចំនួន៦គ្រឿងដែរក្រោយពីការវាស់វែងរួចហើយមានចំនួនឈើសរុប១៦ម៉ែត្រគីប ។
ទាក់ទិននឹងបញ្ហាខាងលើនេះលោក ប៊ួយ រតនា នាយផ្នែក រដ្ឋបាលព្រៃឈើក្រចេះ មិនអាចសុំការបំភ្លឺពីបញ្ហាខាងលើនេះបានទេព្រោះទូរស័ព្ទរបស់លោកមិនអាចទំនាក់ទំនងបានតែក៏នៅរងចាំទទួលការបញ្ជាក់ និងផ្សាយនៅពេលក្រោយទៀត ៕