ពិធីបញ្ចុះបឋមសិលា សាងសង់អាគារបណ្ណាល័យ អ្នកនិពន្ធ នូ ហាច ក្នុងវិទ្យាល័យសម្តេចឱ បានប្រព្រឹត្តទៅកាលពីថ្ងៃ ទី ១៤ ខែមករា ឆ្នាំ២០១៥ ក្រោមអធិបតីភាព លោក ជាម ច័ន្ទសោភ័ណ អភិបាលរងនៃគណអភិបាលខេត្តបាត់ដំបង។
ក្នុងរបាយការណ៍របស់លោក យា យូគួង នាយករងវិទ្យាល័យសម្តេចឱ បានឱ្យដឹងថាការសាងសងអាគារបណ្ណាល័យ អ្នកនិពន្ធ នូ ហាច ក្នុងវិទ្យាល័យសម្តេចឱនាពេលនេះ ជាអំណោយរបស់លោក នូ វិ ជាកូនប្រុសបង្កើត របស់លោកតា នូ ហាច ជាអ្នកនិពន្ធល្បីល្បាញ ក្នុងទស្សវត្សទី ៦០ ដែលមានទឹកប្រាក់ប្រមាណជា ១០ ម៉ឺនដុល្លារ។ នេះជាភព្វសំណាងដ៏ល្អ ដែលវិទ្យាល័យសម្តេចឳ ទទួលបាននូវមហាកិត្តិយស ដោយក្រសួងក៏ដូចជាមន្ទីរអប់រំយុវជន និងកីឡាខេត្ត បានផ្តល់ការទុកចិត្តធ្វើជា បណ្ណាល័យបង្អែកក្នុងខេត្តបាត់ដំបង។ ក្រោយពីការបើកវគ្គបណ្តុះបណ្តាល ផ្នែកការងារបណ្ណាល័យរយៈពេល២លើក ក្រសួង បានអញ្ជើញថ្នាក់ដឹកនាំសាលា និងបណ្ណារក្សចូលរួម ធ្វើទស្សនៈកិច្ចសិក្សា លើបណ្ណាល័យ សម្តេចនាយករដ្ឋមន្ត្រី ហ៊ុន សែន បណ្ណាល័យជាតិ និងបណ្ណាល័យសាកលវិទ្យាល័យបញ្ញាសាស្ត្រថែមទៀត។ ជាតំរូវការចាំបាច់របស់ក្រសួងអប់រំយុវជន និងកីឡា បណ្ណាល័យបង្អែក គឺជាអាគារដាច់ដោយឡែក ដែលមានលក្ខណៈងាយស្រួល ដលក់ការចូលអានគ្រប់ពេលវេលារបស់មហាជន គ្រប់ស្រទាប់។
លោក ជាម ច័ន្ទសោភ័ណ បានបញ្ជាក់ថានេះជាកាយវិការមួយដ៏ល្អប្រសើរក្នុងការចូលរួមជំរុញវិស័យអប់រំឱ្យកាន់តែ មានភាពល្អប្រសើរ រួមគ្នាឆ្ពោះទៅសំរេចគោលដៅ របស់រាជរដ្ឋាភិបាលក្រោមការដឹកនាំ របស់សម្តេចអគ្គមហាសេនាបតីតេជោ ហ៊ុន សែន គឺជំរុញអោយសំរេចបាន ១០០ %នូវទិសដៅអប់រំទាំងអស់គ្នាក្នុងឆ្នាំ២០១៥នេះ។ ដោយឡែកនៅក្នុងខេត្តបាត់ដំបង យើងសង្កេតឃើញថា នៅក្នុងខេត្តបាត់ដំបងយើងមានសាកលវិទ្យាល័យ ៨ ក្នុងនោះរបស់រដ្ឋមួយ គឺសាលកវិទ្យាល័យបាត់ដំបង ជាស្នាដៃយ៉ាងត្រចះត្រចង់របស់ឯកឧត្តម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ។ ក្រៅពីនោះនោមាន វិទ្យល័យគ្រប់ស្រុក ហើយស្រុកខ្លះ មាន២ រឺ ៣ ទៀតផង។ ជាងនេះទៀតនៅមានអនុវិទ្យាល័យគ្រប់ឃុំទូទាំងខេត្តទៀតផង ។
លោកបានបន្តទៀតថា អ្វីជាមោនៈភាពនៃខេត្តបាត់ដំបងយើងនោះ គឺក្រុងបាត់ដំបងបានជាប់ចំណាត់ថ្នាក់លេខ១ ប្រចាំព្រះរាជាណាចក្រកម្ពុជាជាទីក្រុងស្អាត ហើយក្រុងបាត់ដំបងនេះក៏ត្រូវបានទទួលពាន់រង្វាន់ និរន្តរភាពបរិស្ថានប្រទេសអាស៊ាន ពិសេសជានេះទៀតនោះទីក្រុងបាត់ដំបង ក៏ត្រូវបានចាត់ចូលជាសម្បត្តិបេតិកភណ្ឌពិភពលោកទៀតផង ។
លោកអភិបាលរងខេត្ត ក៏បានសំណូមពរដល់លោកគ្រូ អ្នកគ្រូ បន្តយកចិត្តទុកដាក់ បណ្តុះបណ្តាលផ្តល់នូវចំណេះដឹងពិសេសក្មួយៗ ត្រូវខិតខំរៀនសូត្រ គេចឱ្យផុតពីថ្នាំញៀន គោរពតាមដំបូន្មាន មាតាបិតា លោកគ្រូ អ្នកគ្រូ យកពេលទំនេរចូលសិក្សាស្រាវជ្រាវ នៅក្នុងបណ្ណាល័យ របស់យើងនេះដើម្បីក្លាយទៅជាសិស្សល្អ កូនល្អ និងក្លាយទៅជាមនុស្សមានប្រយោជន៍សំរាប់សង្គមជាតិនាពេលអនាគត។ ពិធីនេះត្រូវបានបញ្ចប់ ក្រោយពីគណៈអធិបតីចែកជូនក្រណាត់ស ក្រម៉ា និងថវិកា មួយចំនួនដល់លោកតា លោកយាយ ប្រជាពលរដ្ឋ និង បញ្ចុះបឋមសិលារួចមក ៕
