ខេត្តរតនគិរីៈ ប្រជាពលរដ្ឋនៅស្រុកអណ្តូងមាស ថ្លែងអំណរគុណដល់អាជ្ញាធរខេត្ត ដែលបើកអោយដំណើរការឆ្លងស្ពានតេជោសេសាន្តបណ្តោះអាសន្ន បើទោះបីស្ពាននោះនៅមិនទាន់បានបញ្ចប់ការសាងសង់នៅឡើយក្តី។ ជាមួយនឹងការថ្លែងអំណរគុណនេះ ក៏មានសំណូមពរអោយជួសជុលផ្លូវដ៏លំបាកដែលតភ្ជាប់ពីស្ពាននោះផងដែរ។
សូមបញ្ជាក់ថា នៅមុនពេលអាជ្ញាធរខេត្តមិនទាន់បើកអោយឆ្លងស្ពានបណ្តោះអាសន្ននេះ ការធ្វើដំណើរឆ្លងរបស់ប្រជាពលរដ្ឋជាពិសេសសិស្សានុសិស្សមានភាពលំបាកយ៉ាងខ្លាំង។ សិស្សានុសិស្សត្រូវខកពេលចូលរៀន ដោយសារតែត្រូវអង្គុយក្រោមដើមឈើក្បែរច្រាំងទន្លេ ដើម្បីរង់ចាំទូកដ ដែលត្រូវរង់ចាំក្នុងពេលម្តងៗនោះ។ ជាងនេះអ្នកជម្ងឺ ដែលត្រូវទៅព្យាបាលនៅមណ្ឌលសុខភាពឬទៅសំរាលកូននៅមន្ទីរពេទ្យបង្អែក ក៏នឹងត្រូវរង់ចាំការចម្លងរបស់ទូកដដ៏យឺតយ៉ាវបំផុតនោះផងដែរ រហូតមានពេលមួយនោះ ស្ត្រីម្នាក់ត្រូវគេនិយាយថា បានសំរាលកូន នៅនឹងមាត់ច្រាំងទន្លេដែលជាទីកន្លែងរង់ចាំទូកដនោះផងទៀត។ ជាមួយគ្នានោះ សំភារៈបំរើអោយការដ្ឋានសំណង់នានា ក៏ត្រូវគេរាយការណ៏ថា មានការយឺតយ៉ាវនិងលំបាកបំផុត ក្នុងដំណើរការសាងសង់អគារគ្រឹះស្ថាននានា ឬសំណង់ផ្ទះឯកជនជាដើម។ល។
ពួកគាត់បន្តថាៈ អ្វីដែលលើកឡើងទាំងអស់នេះ គឺត្រូវចំណាយថវិកាអស់យ៉ាងច្រើន ទម្រាំបានសំរេចលទ្ធផលផ្លែផ្កាអ្វីមួយនោះ។
ដោយមើលឃើញពីភាពលំបាករបស់ប្រជាពលរដ្ឋ និងការចម្លងរបស់ទូកដមានការយឺតយ៉ាវផងនោះ ទើបក្នុងកំឡុងពេលប្រមាណ១ខែកន្លងទៅនេះ អាជ្ញាធរបានចុះទៅសំរួលបើកអោយប្រជាពលរដ្ឋធ្វើដំណើរឆ្លងស្ពាន បើទោះបីស្ពាននោះនៅមិនទាន់បានបញ្ចប់ការសាងសង់នៅឡើយក្តី។
ទទ្ទឹមនឹងបើកអោយឆ្លងស្ពានបណ្តោះអាសន្ននេះ ពួកគាត់បានសប្បាយចិត្តក្រៃលែងនិងថ្លែងអំណរគុណដល់អាជ្ញាធរខេត្ត ប៉ុន្តែក៏បានសំណូមពរថ្នាក់ដឹកនាំមេត្តាជួសជុលផ្លូវដ៏លំបាកដែលតភ្ជាប់ពីក្បាលស្ពាន ដល់ឃុំញ៉ាងចម្ងាយជាង១០គីឡូម៉ែត្រផងដែរ។ (ស្តាប់សម្លេងដើមប្រជាពលរដ្ឋ)
ដើម្បីជាការឆ្លើយតបចំពោះសំណូមពរប្រជាពលរដ្ឋ លោក ខេន សានីត អភិបាលស្រុកអណ្តូងមាស បានឲ្យដឹងថា លោកបានដាក់សំណើរទៅមន្ទីរអភិវឌ្ឍន៍ជនបទហើយ ក៏ប៉ុន្តែសំណើរនេះមិនអាចទាន់តម្រូវការរបស់ប្រជាពលរដ្ឋទេ ដូច្នេះលោកនឹងធ្វើការកៀងគរ ដល់អាជីវករអ្នកដែលមានលទ្ធភាព ក្រុមហ៊ុន អ្នកដែលមានដីចំការនៅតំបន់នេះ ដើម្បីដឹកគ្រួស ដឹកថ្ម ចាក់តាមចំណុចដែលលំបាក ដើម្បីសម្រួលឲ្យប្រជាពលរដ្ឋ អាជីវករមានភាពងាយស្រួលធ្វើដំណើរបណ្ណោះអាសន្ននៅរដូវវស្សានេះសិន ទម្រាំគម្រោងអភិវឌ្ឍន៍ធា្លក់មក ៕
ដោយ សុខ គឹមសន