ខេត្តមណ្ឌលគិរី៖ ទីតាំងប្រមូលទិញ ស្តុកឈើ ដើម្បីនាំចេញទៅប្រទេសវៀតណាមដ៏ធំជាងគេប្រចាំខេត្តមណ្ឌលគីរី២កន្លែងស្ថិតនៅចំណុចភូមិពូត្រំ សង្កាត់រម្យនា ក្រុងសែនមនោរម្យ ខេត្តមណ្ឌលគិរី ត្រូវបានសមត្ថកិច្ចនគរបាលខេត្តនិងជំនាញរដ្ឋបាលព្រៃឈើចុះឡោមព័ទ្ធកាលពីវេលាម៉ោង៥ព្រឹកថ្ងៃទី១៤ ខែមិថុនា ឆ្នាំ២០១៧និងឃាត់ខ្លួន ជនសង្ស័យម្នាក់ឈ្មោះ ប៉ោហេង ភេទប្រុស អាយុ១៨ ឆ្នាំ ត្រូវជាប្អូនថ្លៃលោក គួយ សុឃុន ជាម្ចាស់ទីតាំងស្តុកឈើ ។
អ្នករកស៊ីឈើបានទម្លាយឲ្យដឹងថា៖ ទីតាំងស្តុកឈើចំនួន២កន្លែងខាងលើជារបស់លោកគួយ សុឃុនមុខរបរជាមន្ត្រីនគរបាលវរៈព្រុំដេនគោកលេខ៦២១និងត្រូវជា ប្អូនបង្កើតលោកស្វាយសំអ៊ាងអភិបាលនៃគណៈអភិបាលខេត្តមណ្ឌលគិរី និងឈ្មោះ ភ័ក្រ ដែលមានឈើលាក់ទុកជាង១០០ម៉ែត្រគូប ហើយសមត្ថកិច្ចកម្លាំងក្រុមការងារស្រាវជ្រាវ ទប់ស្កាត់បង្ក្រាបបទល្មើសធនធានធម្មជាតិ កងរាជអាវុធហត្ថលើផ្ទៃប្រទេសនឹងសហការជាមួយកម្លាំងកងរាជអាវុធហត្ថខេត្តស្រាវជ្រាវរកឃើញ។
ប៉ុន្តែករណីនេះប្រហែលខាងខេត្តខ្លាចកម្លាំងកងរាជអាវុធហត្ថលើផ្ទៃប្រទេសចាប់ឈានដល់បំពេញនីតិវិធីឈានដល់ឃាត់ខ្លួនជនពាក់ព័ន្ធដាក់គុក ពិសេសមុខមាត់អាជ្ញាធរ សមត្ថកិច្ច ជំនាញនៅទីនោះសុទ្ធតែមានប្រយោជន៍ឆ្នាំងបាយ ក៏ខាងខេត្តគេក៏ចេញមុខដឹកនាំទៅបង្ក្រាបវិញ។ បើតាមប្រភពពីអ្នករកស៊ីឈើទៅស្រុកយួនបាននិយាយថា៖លោក គួយ សុឃុន ជាម្ចាស់ទីតាំងស្តុកឈើ ខាងលើ បានយកលុយពីថៅកែស្រីជនជាតិវៀតណាមជិត១០ម៉ឺនដុល្លារមកប្រមូលទិញឈើយកមកស្តុក ដើម្បីដឹកទៅវៀតណាមតាមច្រកកោះញែក ប៉ុស្តិ៧ និងប៉ុស្តិកែវសីមា ។
ប្រជាពលរដ្ឋលើកឡើងថា៖ លោក ស្វាយ សំអ៊ាង ជាអភិបាលនៃគណៈអភិបាលខេត្តមណ្ឌលគិរី មានតួនាទីសំខាន់ណាស់បង្ក្រាបបទល្មើសព្រៃឈើក្នុងនាមជាសមាជិកគណៈកម្មការជាតិបង្ក្រាបបទល្មើសធនធានធម្មជាតិ តែផ្ទុយទៅវិញបែជាមានប្អូនបង្កើតជាមេខ្លោងប្រមូលទិញ ស្តុកទុកឈើ និងនាំចេញទៅវៀតណាមទៅវិញ ហើយមុខរបរនេះកើតមានរាប់ឆ្នាំមកហើយ? ។ លោក ស្វាយ សំអ៊ាង អភិបាលនៃគណៈអភិបាលខេត្ត និងលោក វង់ សុខសេរី នាយខណ្ឌរដ្ឋបាលខេត្តមណ្ឌលគិរីអ្នកសារពតិមានមិនអាចសុំការបំភ្លឺបានដែរ ដោយទូរស័ព្ទចូលគ្មានអ្នកទទួល។ ប៉ុន្តែគេអោយដឹងថា៖ បើសមត្ថកិច្ចចាប់ខ្លួន គួយ សុឃុន ជាម្ចាស់ទីតាំងស្តុកឈើ ហើយជាប្អូនបង្កើតលោកអភិបាលនៃគណៈអភិបាលខេត្តមណ្ឌលគិរី បានវិញនោះ បទល្មើសព្រៃឈើនៅខេត្តនេះនឹងត្រូវស្ងប់ស្ងាត់ ។
សូមបញ្ជាក់ដែរថា កាលពីយប់ថ្ងៃទី១៣ ខែមិថុនា ឆ្នាំ២០១៧កំលាំងអាវុធហត្ថលើផ្ទៃសហកាជាមួយមេព្រៃប៉ូលិសបានធ្វើការឃាត់បានរថយន្តឡង់ពណ៌ខ្មៅមួយគ្រឿងមានដឹកឈើពេញនឹងតៃកុងម្នាក់ បំរុងនាំទៅស្រុកពេជ្រាដា ប៉ុស្តិ៍៧ រីឯម្នាក់រត់រួចម្នាក់។ អ្នកបើកបរបានប្រាប់ថាឡានឈើជារបស់ឈ្មោះ ឃុន ហើយបាននាំទៅបង្ហាញកន្លែងស្តុកដ៍ធំ ស្តិតនៅ ភូមដំរីជាន់ សង្កាត់រម្យនា ក្រុងសែនមនោរម្យ រីឯរថយន្តបច្ចប្បន្នរក្សាទុក នៅក្នុងប៉េអឹមខេត្ត។ចឹងហើយបានជាឈានដល់សមត្តកិច្ចខេត្តចុះបង្ក្រាបទីតាំងខាងលើនេះ។ចាំមើលថាតើបទល្មើសជាក់ស្តែងមានភស្តុតាងប៉ុនណឹងចៅហ្វាយខេត្តគិតម៉េចវិញ? ៕
