ភ្នំពេញ ៖ ជនសង្ស័យ ដែលបានបើកឡានកៀគេ និងបានបាញ់គំរាមមួយគ្រាប់ មកលើរថយន្ដរបស់ប្រជាពលរដ្ឋនៅតាមដងផ្លូវនោះ ត្រូវបាននគរបាលរាជធានីភ្នំពេញបញ្ជូនទៅអង្គភាពដើមគឺស្នងការនគរបាលខេត្តកណ្តាលវិញហើយកាលពីរសៀលថ្ងៃទី១២ ខែមិថុនា ឆ្នាំ២០១៧នេះ។នេះបើតាមនាយឧត្តមសេនីយ៍ ជួន សុវណ្ណស្នងការនគរបាលរាជធានី ភ្នំពេញ ។
លោកជួនសុវណ្ណឲ្យដឹងថា៖ ថក្រោយបញ្ចប់ការសួរនាំនោះ ជនល្មើសបានសារភាព និងទទួលស្គាល់ពីកំហុសរបស់ខ្លួន ហើយដោយមានការណែនាំផ្ទាល់ពី នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ ជនល្មើសរូបនេះ ត្រូវបានបញ្ជូនទៅអង្គភាពរបស់ខ្លួនគឺស្នងការដ្ឋាននគរបាល ខេត្តកណ្ដាល ដើម្បីចាត់វិធានការតាមផ្លូវច្បាប់ និងដាក់ទោសពិន័យរបស់កងកម្លាំងនគរបាលជាតិ។
សូមបញ្ជាក់់ថា៖ករណី នគរបាលស្ទាវឈ្មោះ លឹម ចំណានដែលគេស្គាល់ថាជាកូនប្រុសលោកប៉ុលលឹមរ្ដឋលេខាធិការក្រសួងមហាផ្ទៃ បើករថយន្តកាមរីបាឡែនពាក់ស្លាកលេខ ភ្នំពេញ 2AM-2762ប៉ះគេហើយដកកាំភ្លើងបាញ់គម្រាមថែមទៀតនោះ ត្រូវបានគេបិទបាំង បិទបាំងត្រង់ថា កាលពីព្រឹកមិញនគរបាល លឹម ចំណាន បានចូលទៅបំភ្លឺនៅស្នងការដ្ឋាននគរបាលរាជធានីភ្នំពេញហើយ ដោយនាំទាំងរថយន្តបង្កទៅជាមួយផង តែការចូលខ្លួននេះត្រូវបាននគរបាលរាជធានីហាមប្រាមអ្នកកាសែតមិនឲ្យចូលសួរនាំ និងថតរូបភាពទេ ហើយមិនផ្ដល់ព័ត៌មានលម្អិតណាមួយចំពោះដើមចមនៃការបាញ់បោះ និងវិធានការច្បាប់យ៉ាងដូចម្ដេចឡើយ។
ករណីនេះ នៅយប់ថ្ងៃទី១១ ខែមិថុនា ឆ្នាំ២០១៧លោក គឹម សន្តិភាព អ្នកនាំពាក្យក្រសួងយុត្តិធម៌បានឲ្យកាសែតដឹងថា បើទោះជននោះជាមន្ត្រីអនុវត្តច្បាប់ក៏ដោយ បើប្រព្រឹត្តអំពើល្មើសច្បាប់ ត្រូវទទួលខុសត្រូវចំពោះមុខច្បាប់ជាដាច់ខាត។ «អំពើល្មើសច្បាប់ ត្រូវទទួលខុសត្រូវចំពោះមុខច្បាប់ ទោះជននោះជាមន្ត្រីអនុវត្តច្បាប់ក៏ដោយ»។
លោក លឹម ចំណាន មានតួនាទីជានាយរងការិយាល័យចរាចរណ៍ នៃស្នងការដ្ឋាននគរបាលខេត្តកណ្តាល និងជាកូនប្រុសរបស់លោកប៉ុលលឹមរដ្ឋលេខាធិការនៅក្រសួងមហាផ្ទៃនិងលោកស្រី សម មុន្នីកា អតីតរដ្ឋលេខាធិការក្រសួងទេសចរណ៍ ដែលត្រូវបានបង្ខំឲ្យតំណែងដោយសារមានរឿងអាស្រូវហួងហែងជំរិតទារលុយសំណងចំនួន៤ ០០០ដុល្លារអាមេរិកពីអ្នករត់រថយន្តឈ្នួលរាជធានីភ្នំពេញ-ខេត្តរតនគិរីម្នាក់ ព្រោះតែរថយន្តខូចតាមផ្លូវធ្វើឲ្យួគាត់ភយ័ខ្លាចនិងយឺតយ៉ាវដំណើរ ។
បញ្ជាក់ថា នៅថ្ងៃទី១០ ខែមិថុនា ឆ្នាំ២០១៧ វេលាម៉ោង១៧៖៥៨នាទី មានករណីដ៏សាហាវមួយបានកើតឡើងនៅ នៅតាមបណ្តោយផ្លូវជាតិលេខ១ ជិតបុរីប៉េងហួតបឹងស្នោរ ដោយរថយន្តបាឡែន ពណ៌ទឹកមាស ពាក់ស្លាកលេខ ភ្នំពេញ 2AM-2762 មួយគ្រឿង ក្នុងទិសដៅស្របគ្នា បានជិះវ៉ាខាងស្តាំ ហើយប៉ះជាមួយរថយន្តមួយគ្រឿងទៀតមិនព្រមឈប់ បែរជាបង្អង់ល្បឿន បើកញ្ចក់រថយន្តបាញ់មួយគ្រាប់គម្រាម និងបើករត់គេចខ្លួនបាត់ ៕