ភ្នំពេញ៖ប្រជាពលរដ្ឋដែលខ្ចីលុយពីធនាគារនឹងត្រូវជាប់ពន្ធអាករលើតម្លៃបន្ថែម១០%ក្នុងពេលឆាប់ៗនេះ។នេះបើតាមក្នុងសេចក្ដីប្រកាសព័ត៌មាន អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី៧ មិថុនា ឆ្នាំ២០១៧។ការប្រកាសអនុវត្តពន្ធអាករលើតម្លៃបន្ថែម១០% ពីអ្នកខ្ចីលុយពីស្ថាប័នហិរញ្ញវត្ថុ ក្រោយពីក្រសួងសេដ្ឋកិច្ចកំណត់អត្រាការ ខ្ពស់បំផុតត្រឹម១៨%ក្នុងមួយឆ្នាំឬ១,៥ក្នុងមួយខែកាលពីមុនបោះឆ្នោត ឃុំ សង្កាត់។អគ្គនាយកដ្ឋានពន្ធដារអះអាងថា ការដាក់ឲ្យអនុវត្ដអាករលើតម្លៃបន្ថែម១០%នេះ មិនមែនជាការបង្កើត ឬអនុវត្តពន្ធថ្មីនោះទេ ដោយថា ពន្ធនេះត្រូវបានដាក់អនុវត្តតាំងពីឆ្នាំ១៩៩៩មកម្ល៉េះ ប៉ុន្ដែរដ្ឋាភិបាលបានអនុគ្រោះមិនយកពន្ធនេះ ដើម្បីសម្រួលដល់ជីវភាពប្រជាពលរដ្ឋ។
លោក ហួត អៀងតុង ប្រធានសមាគមមីក្រូហិរញ្ញវត្ថុកម្ពុជាបាន ឲ្យដឹងថា បន្ទុកបង់ពន្ធនេះ ត្រូវអនុវត្តលើកម្រៃសេវាកម្មហិរញ្ញវត្ថុ ដូចជា សេវាផ្ញើប្រាក់ ការទទួលកម្ចី សេវាផ្នែកច្បាប់ សេវាផ្នែកគណនេយ្យ និងសេវាផ្សេងៗទៀត។ លោកថា មិនមែនតែគ្រឹះស្ថានមីក្រូហិរញ្ញវត្ថុ និងពលរដ្ឋទេ ដែលជាប់កាតព្វកិច្ចបង់ពន្ធនោះ ប៉ុន្ដែក៏មានក្រុមហ៊ុនគ្រឹះស្ថានឯកជន ក្រុមហ៊ុនចម្រុះ និងសមាគមនានាផងដែរ។
លោក ហួត អៀងតុង យល់ថា ការអនុវត្តពន្ធថ្មីនេះគឺប្រជាពលរដ្ឋត្រូវបង់។ «ប្រជាពលរដ្ឋគឺគាត់ត្រូវជាប់បន្ទុកបង់ពន្ធលើកម្រៃបន្ថែមហ្នឹង វា Value Added Tax ហ្នឹង អញ្ចឹងពេលប្រជាពលរដ្ឋគាត់ប្រើប្រាស់សេវាកម្មហិរញ្ញវត្ថុ អញ្ចឹងអ្នកដែលប្រើប្រាស់សេវាកម្មហ្នឹង គឺគាត់ត្រូវចំណាយបន្ថែមទៅលើការបង់ពន្ធហ្នឹង»។លោក អ៊ិន ចាន់នីប្រធាននាយកប្រតិបត្តិធនាគារអេស៊ីលីដា បានឲ្យកាសែតដឹងថា កាតព្វកិច្ចបង់ពន្ធលើតម្លៃបន្ថែម១០ភាគរយ ក៏ត្រូវធ្លាក់លើពលរដ្ឋ និងអ្នកដែលប្រើប្រាស់សេវាមួយចំនួនពីធនាគារ លើកលែងតែការប្រាក់ឥណទាន និងកម្រៃប្តូរប្រាក់។
អ្នកជំនាញការផ្នែកហិរញ្ញវត្ថុ ប៉ាន់ប្រមាណថា ចំណូលសរុបរបស់គ្រឹះស្ថានហិរញ្ញវត្ថុ រួមមានធនាគារ និងមីក្រូហិរញ្ញវត្ថុ ទទួលបានពីកម្រៃសេវានិងសោហ៊ុយមានប្រមាណ៣០០លានដុល្លារក្នុងមួយឆ្នាំ ដោយថា រដ្ឋាភិបាលនឹងរកចំណូលចូលជាតិបន្ថែមប្រមាណ៣០លានដុល្លារ ក្នុងមួយឆ្នាំ លើសេវាហិរញ្ញវត្ថុទាំងអស់នេះ ក្រោយអនុវត្តពន្ធអាករលើតម្លៃបន្ថែម១០%នេះ ៕