ក្រចេះ៖ មានករណីគ្រោះថ្នាក់ចរាចរណ៍តាមដងផ្លូវជាតិលេខ៧៣ បង្កឡើងដោយខ្លួនឯង កាលពីវេលាម៉ោងប្រមាណជា ១០:៣៥នាទីយប់ថ្ងៃទី០៩ ខែមិថុនា ឆ្នាំ២០១៧ រថយន្តដឹកប្រេងឥន្ទនៈរបស់ក្រុមហ៊ុន L.H.R មួយគ្រឿង បានរេចង្កូតបុកនឹងបង្កាន់ដៃដែកបណ្តាលឲ្យធ្លាក់ផ្លូវ នៅចំនុចព្រៃច្រោក ឋិតក្នុងឃុំបុសលាវ ស្រុកចិត្របុរី ខេត្តក្រចេះ ។
អ្នកបើកបររថយន្តឈ្មោះ ស៊ី ណាវ ភេទប្រុស អាយុ ៣៥ឆ្នាំ រស់នៅភូមិទឹកល្អក៣ សង្កាត់សែនសុខ ខ័ណ្ឌសែនសុខ រាជធានីភ្នំពេញ ។ បើយោងតាមសម្តីរបស់អ្នកបើកបររថយន្ត បានឲ្យដឹងថា នៅពេលកើតហេតុគឺមេឃភ្លៀងធ្លាក់ខ្លាំងពេក មើលផ្លូវអត់ច្បាស់ទើបបណ្តាលឲ្យជួបគ្រោះថ្នាក់កើតឡើង ប៉ុន្តែមិនបណ្តាលឲ្យនរណាម្នាក់រងរបួសឡើយ ។
ពាក់ព័ន្ធនឹងការខូចខាតបង្កាន់ដៃដែកនៅកន្លែងកើតហេតុនោះដែរ លោក សិន ស៊ីណាត ប្រធាអង្គភាព ស្ពាន ផ្លូវថ្នល់នៃមន្ទីរសាធារណការ និងដឹកជញ្ជូនខេត្តក្រចេះ បានឲ្យដឹងថានៅព្រឹកថ្ងៃទី១០ ខែមិថុនានេះថា នៅមិនទាន់មានការដោះស្រាយពីភាគីខាងក្រុមហ៊ុន L.H.R នៅឡើយទេ ដោយឡែកទំហំនៃការខូចខាតបាក់អស់៨ផ្ទាំង ស្មើនឹង ៣២ម៉ែត្រ ក្នុងនោះលោកបានបញ្ជាក់ថា ក្នុង១ម៉ែត្រ ស្មើនឹង១២០ដុល្លា ។
បច្ចុប្បន្នរថយន្តខាងលើ ត្រូវបានសមត្ថកិច្ចស្ទួចយកមករក្សាទុកបណ្ដោះអាសន្ននៅស្នងការរដ្ឋាននគរបាលខេត្ត ដើម្បីរងចាំខាងក្រុមហ៊ុនប្រេងឥន្ទនៈមកធ្វើការដោះស្រាយតាមច្បាប់ ៕