ព្យុងយ៉ាង ៖ ទីភ្នាក់ងារព័ត៌មានចិន ស៊ិនហួរ បានរាយការណ៍ថា លោក គីម ជុងអ៊ុន ប្រមុខដឹកនាំកំពូល កូរ៉េខាងជើងបានចេញបញ្ជាឲ្យកងទ័ពអាកាសរបស់ខ្លួន ត្រៀមបើកការវាយប្រហារទៅលើនាវាដឹកយន្តហោះចម្បាំងអាមេរិក ខណៈដែលកំពុងធ្វើ ប្រតិបត្តិការនៅដែនទឹកក្បែរឧបទ្វីបកូរ៉េ។
ការលើកឡើងបែបនេះគ្រាដែលលោក គីម ជុងអ៊ុន បង្ហាញវត្តមានក្នុងព្រឹត្តិការណ៍ប្រកួតប្រជែងការហោះហើររបស់កងទ័ពអាកាសកូរ៉េខាងជើង ក្នុងគោលបំណងហ្វឹកហាត់អាកាសយានិកដ៏ឆ្នើមៗរបស់ខ្លួន ឲ្យមានសមត្ថភាពកាន់តែខ្លាំងក្លា ដែលអាចធ្វើការកម្ទេចរាល់គោលដៅទាំងអស់ រួមទាំងនាវាផ្ទុកយន្តហោះចម្បាំងរបស់សត្រូវថែមទៀតផង។
ជាមួយគ្នានេះសហរដ្ឋអាមេរិក ក៏បាននិងកំពុងបង្កើនការធ្វើសមយុទ្ធជើងទឹកបន្ថែមទៀត ជាមួយកូរ៉េខាងត្បូង ដោយមានការចូលរួមពីសំណាក់នាវាដឹកយន្តហោះចម្បាំង USS Carl Vinson និងបានបញ្ជូននាវាដឹកយន្តហោះចម្បាំងបីគ្រឿងហើយ មកកាន់ឧបទ្វីបកូរ៉េផងដែរ៕