ប្រជាពលរដ្ឋក្រីក្រចាស់ជរា ជនពិកា ស្ត្រីមេម៉ាយ ចំនួន១០០គ្រូសារនៅស្រុកអូររាំង ខេត្តមណ្ឌល គិរី ទទួលបានអំណោយពីរាជរដ្ឋាភិបាលដែលបានផ្តល់តាមរយៈមន្ទីរកិច្ចការនារីខេត្ត ពិធីចែកអំណោយនេះ ធ្វើឡើងនៅវត្តស្រុកអូររាំង ក្រោមអធិបតីភាពឯកឧត្តម អេង ប៊ុនហ៊ាង អភិបាលខេត្តមណ្ឌលគិរី និងមន្ត្រីពាក់ព័ន្ធជុំវិញខេត្ត កាលពីព្រឹកថ្ងៃទី៣០ ខែធ្នូ ឆ្នាំ២០១៤។
តាមការលើកឡើងរបស់លោក នង ទុណ្ណរី អភិបាលស្រុកអូររាំង និងលោកស្រី ម៉ាលី សុខនី ប្រធាន មន្ទីរកិច្ចការនារីខេត្តបានមានប្រសាសន៍ថាអំណោយដែលចែកជូនដល់ប្រជាពលរដ្ឋក្រីក្រ ចាស់ជរា ជនពិកា ស្ត្រីមេម៉ាយនាពេលនេះជាអំណោយរបស់រាជរដ្ឋាភិបាលដែលផ្តល់តាមរយៈមន្ទីរកិច្ចការនារីខេត្ត ។
លោកស្រីបន្តថា រាជរដ្ឋាភិបាលបានយកចិត្តទុកដាក់លើស្ត្រីច្រើនណាស់ អំពីឋានៈ តួនាទីនៅក្នុងសង្គម ពិសេសក្នុងគោល ដៅអភិវឌ្ឈសហវត្សកម្ពុជាគោលដៅទី៣ គឺនិយាយអំពីការអនុវត្តគោលនយោបាយលើកកម្ពស់សមភាពយេនឌ័រ និងផ្តល់ភាពអង់អាចដល់ស្ត្រី នៅក្នុងផែនការយុទ្ធសាស្ត្រអភិវឌ្ឈ ជាតិក្រសួងកិច្ចការនារីដែលតំណាងឲ្យស្ត្រីទូទាំងប្រទេសបានដាក់បញ្ចូលនូវសូចនាករដ៍សំខាន់ៗមួយចំនួនទៅក្នុងផែនការយុទ្ធសាស្ត្រអភិវឌ្ឈជាតិនេះផងដែរ។
មានមតិសំណេះសំណាលឯកឧត្តម អេង ប៊ុនហ៊ាង អភិបាលខេត្តមណ្ឌលគិរី មានប្រសាសន៌ថា អំណោយថ្ងៃនេះ ជារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ កម្ពុជា ជានិច្ចជាកាល សម្តេចលោកតែងតែយកចិត្តទុកដាក់គិតគូរពីតម្រូវការ និងបំពេញនូវកង្វះខាតជីវភាព របស់បងប្អូនប្រជាពលរដ្ឋក្រីក្រនៅគ្រប់មូលដ្ឋាន។ ឯកឧត្តមបានបន្តថា ទោះបីអំណោយទាំងនេះតិចតួចក៏ពិតមែន ក៍បានបញ្ជាក់ឲ្យឃើញថាជា ឆន្ទៈមុះមុតដ៍ឆ្នើមនិងទឹកចិត្តថ្លៃថ្លា ក្នុងការរួមចំណែកការលើកកម្ពស់ស្ថានភាពជីវភាពរស់នៅរបស់ប្រជាពលរដ្ឋដែលកំពុងជួបការលំបាកជាបណ្តើរៗ។
ឆ្លៀតក្នុងឱកាសនេះផងដែរ ឯកឧត្តមក៍បានផ្តាំផ្ញើដល់ប្រជាពលរដ្ឋក្រោយពីការប្រមូលផលរួចត្រូវចេះបង្កបង្កើនផលដំណាំរួមផ្សំ និងការចិញ្ចឹមសត្វផ្សេងៗ ដើម្បីរកប្រាក់ចំណូលនៅក្នុងជីវភាពគ្រួសារឲ្យកាន់តែរីកចំរើនថែមទៀត។ហើយត្រូវជៀសវាងនូវអំពើហឹង្សាក្នុងគ្រូសារ ល្បែងស៊ីសង ការប្រើប្រាស់គ្រឿងញៀន -ល-។
អំណោយដែលចែកជូនប្រជាពលរដ្ឋក្រីក្រចំនួន១០០គ្រួសារនៅក្នុងឃុំសែនមនោរម្យ ស្រុកអូររាំង នាពេលនោះ ក្នុងមួយគ្រូសារទទួលបាន អង្ករ២០គីឡូក្រាម សារុង១ កន្ទេល១ ត្រីខ ទឹកស៊ីអ៊ីវ អំបិល និងសាប៊ូ ៕
ហ៊ិន សុគន់
