ក្រចេះ៖ លោកឧត្តមសេនីយ៍ត្រី សាន្ត ប៊ុនថាន មេបញ្ជាការកងរាជអាវុធហត្ថខេត្តក្រចេះ បានចេញបញ្ជាយ៉ាងម៉ឺងម៉ាត់ដល់កងកម្លាំងអាវុធហត្ថខេត្ត ស្រុក និងស្នាក់ការសន្តិសុខ ត្រូវពង្រឹង គោរពវិន័យ និងតួនាទីរបស់ខ្លួនឲ្យបានល្អ និងត្រូវការពារសន្តិសុខសណ្ដាប់ធ្នាប់សង្គមឲ្យបានដាច់ខាត នៅពេលបោះឆ្នោតជ្រើសរើសក្រុមប្រឹក្សាឃុំសង្កាត់ ឃុំ សង្កាត់ សម្រាប់ អាណត្តទី០៤ ឆ្នាំ២០១៧ ។
ការដាក់បញ្ជាយ៉ាងម៉ឺងម៉ាត់ពីសំណាក់លោកឧត្តមសេនីយ៍ត្រី មេបញ្ជាការកងរាជអាវុធហត្ថខេត្ត គឺត្រូវបានធ្វើឡើងនៅព្រឹកថ្ងៃទី៣០ ខែឧសភា ឆ្នាំ២០១៧ នៅទីបញ្ជាការរដ្ឋានកងរាជអាវុធហត្ថខេត្តក្រចេះ ក្នុងអង្គប្រជំុផ្សព្វផ្សាយផែនការ ស្តីពីការការពារសន្តិសុខសុវត្ថិភាពការិយាល័យបោះឆ្នោត នាពេលដំណើរការបោះឆ្នោត ជ្រើសរើសក្រុមប្រឹក្សាឃុំសង្កាត់ ឃុំ សង្កាត់ សម្រាប់ អាណត្តទី០៤ នាពេលខាងមុខនេះ ។
លោក ឧត្តមសេនីយ៍ មេបញ្ជាការកងរាជអាវុធហត្ថខេត្ត បានមានប្រសាសន៍បន្តថា មន្ត្រីអាវុធហត្ថគ្រប់រូប ត្រូវត្រៀមលក្ខណៈឲ្យស្រេច ដើម្បីការពារសន្តិសុខសុវត្ថិភាពនៅតាមការិយាល័យបោញឆ្នោតនីមួយៗ ហើយត្រូវគោរពពេលវេលាម៉ោងធ្វើការ គោរពវិន័យ ដឹងពីតួនាទី ជាពិសេសគោរពនូវបទបញ្ជារបស់ថ្នាក់លើ និងត្រូវរាយការណ៍អំពីសភាពលការឲ្យបានច្បាស់លាស់ទាន់ពេលវេលា ។
លោក បានបន្តទៀតថា ដោយឡែកសម្រាប់មន្ត្រីអាវុធហត្ថដែលគ្មានភារៈកិច្ចកាពារសុវត្ថិភាពនៅពេលបោះឆ្នោត មិនត្រូវស្លៀកសម្លៀកបំពក់ឯកសណ្ឋានទៅបោះឆ្នោត ឬទៅរំខាននៅការិយាល័យបោញឆ្នោតឡើយ ។ ត្រូវដឹងនឹងក្តាប់ទីតាំងភូមិសាស្ត្រនីមួយៗឲ្យបានច្បាស់ ដើម្បីបង្កភាពងាយស្រួលនៅពេលការពារសន្តិសុខ និងពេលមានបាតុភាពអ្វីមួយកើតឡើងផងដែរ ។
លោក បានរំលឹកដល់មន្ត្រីអាវុធហត្ថថា មិនត្រូវស្រវឹងជាដាច់ខាតទាំងនៅមុនថ្ងៃបោះឆ្នោត និងនៅក្នុងថ្ងៃបោះឆ្នោត ព្រោះវាធ្វើឲ្យប៉ះពាល់ដល់កិត្តិយសរបស់អារាជអាវុធហត្ថខេត្តក្រចេះទាំរមូល និងប៉ះពាល់ដល់ការងារថែមទៀតផង ។
លោកឧត្តមសេនីយ៍ សាន្ត ប៊ុនថាន បានបញ្ជាក់ថា ការបោះឆ្នោតជ្រើសរើសក្រុមប្រឹក្សាឃុំ/សង្កាត អាណត្តិទី៤ ដែលប្រព្រឹត្តទៅនៅថ្ងៃទី៤ មិថុនាខាងមុខនេះ គឺជាការបោះឆ្នោតដោយសេរី យុត្តិធម៌ និងតម្លាភាព ហើយមន្ត្រីអាវុធហត្ថទាំងអស់ត្រូវនាំគ្នាទៅបោះឆ្នោតឲ្យបានគ្រប់ៗគ្នា ៕
